New UAE visa waiver rules for Indians;ദുബൈ: ആറ് രാജ്യങ്ങളില്‍ നിന്നുള്ള സാധുവായ വിസ, റെസിഡന്‍സ് പെര്‍മിറ്റ് അല്ലെങ്കില്‍ ഗ്രീന്‍ കാര്‍ഡ് എന്നിവയുള്ള ഇന്ത്യന്‍ പാസ്‌പോര്‍ട്ട് ഉടമകള്‍ക്ക് വിസ ഇളവ് നിയമങ്ങള്‍ വിപുലീകരിക്കാനുള്ള യുഎഇ തീരുമാനം തൊഴിലന്വേഷകര്‍ക്കും, ട്രാന്‍സിറ്റ് യാത്രക്കാര്‍ക്കും, ടൂറിസ്റ്റുകള്‍ക്കും നിരവധി നേട്ടങ്ങള്‍ നല്‍കുന്നുണ്ട്. ഇത് പ്രോപ്പര്‍ട്ടി നിക്ഷേപകര്‍ക്കും, യുഎഇയില്‍ ഉന്നത വിദ്യാഭ്യാസം ആഗ്രഹിക്കുന്ന വിദ്യാര്‍ത്ഥികള്‍ക്കും, ക്രൂയിസ് ടൂറിസ്റ്റുകള്‍ക്കും സഹായകരമാകുമെന്നാണ് ട്രാവല്‍ ഏജന്റുമാര്‍ പറയുന്നത്.
കൂടാതെ, സിംഗപ്പൂര്‍, ജപ്പാന്‍, ദക്ഷിണ കൊറിയ, ഓസ്‌ട്രേലിയ, ന്യൂസിലാന്‍ഡ്, കാനഡ എന്നിവിടങ്ങളില്‍ നിന്നുള്ള വിസയുള്ള ഇന്ത്യന്‍ യാത്രക്കാരാണ് ഈ വിപുലീകരണത്തിന്റെ ഗുണഭോക്താക്കള്‍. വിസ അപേക്ഷാ ഫീസില്‍ 200 ദിര്‍ഹം (സിംഗിള്‍ എന്‍ട്രി 30 ദിവസത്തെ ടൂറിസ്റ്റ് വിസയ്ക്കുള്ള ചെലവ്) മുതല്‍ 300 ദിര്‍ഹം (സിംഗിള്‍ എന്‍ട്രി 60 ദിവസത്തെ ടൂറിസ്റ്റ് വിസയ്ക്കുള്ള ചെലവ്) വരെ ലാഭിക്കാം. എന്നിരുന്നാലും, യോഗ്യരായ ഇന്ത്യന്‍ വിനോദസഞ്ചാരികള്‍ക്ക് 253 ദിര്‍ഹത്തിന് ഇമിഗ്രേഷന്‍ വെബ്‌സൈറ്റുകള്‍ (ICP, GDRFA) വഴി യാത്ര ചെയ്യുന്നതിന് മുമ്പ് മുന്‍കൂട്ടി അംഗീകാരം ലഭിച്ച എന്‍ട്രി പെര്‍മിറ്റിന് അപേക്ഷിക്കാം. ഇതിന്റെ പ്രോസസ്സിംഗ് സമയം 48 മണിക്കൂറാണ്.
‘യുഎഇയില്‍ ജോലി കണ്ടെത്താന്‍ ആഗ്രഹിക്കുന്ന ഇന്ത്യന്‍ പാസ്‌പോര്‍ട്ട് ഉടമകള്‍ക്ക് വിസ ഇളവ് നീട്ടുന്നത് വളരെയധികം സഹായകരമാകും. പ്രൊഫഷണലുകള്‍ക്ക് അഭിമുഖങ്ങളിലും നെറ്റ്‌വര്‍ക്കിംഗ് പരിപാടികളിലും പങ്കെടുക്കാന്‍ ഇനി കൂടുതല്‍ എളുപ്പമാകും,’ സ്മാര്‍ട്ട് ട്രാവല്‍സിന്റെ ചെയര്‍മാന്‍ അഫി അഹമ്മദ് പറഞ്ഞു.
‘നേരത്തെ, ഈ രാജ്യങ്ങളില്‍ നിന്നുള്ള തൊഴിലന്വേഷകര്‍ക്ക് 30 ദിവസത്തെ വിസിറ്റ് വിസയില്‍ ജോലി അഭിമുഖങ്ങളിലോ നെറ്റ്‌വര്‍ക്കിംഗ് അവസരങ്ങളിലോ പങ്കെടുക്കണമായിരുന്നു. അതിന് 200 ദിര്‍ഹം മുതല്‍ 300 ദിര്‍ഹം വരെ ചിലവാകും. മാത്രമല്ല, വിസ കാലാവധി നീട്ടണമെങ്കില്‍ 500 ദിര്‍ഹം കൂടി നല്‍കേണ്ടിയിരുന്നു,’ അദ്ദേഹം കൂട്ടിച്ചേര്‍ത്തു.