Expats loan; അബുദാബി: തൊഴിൽത്തേടി മലയാളികളടക്കം ആയിരക്കണക്കിന് വിദേശികളാണ് ദിവസേന യുഎഇയിലെത്തുന്നത്. തങ്ങളുടെ നാട്ടിലെ സ്റ്റുഡന്റ് ലോണുകൾ അടച്ചുതീർക്കാൻ യുഎഇയിലേയ്ക്ക് എത്തിയവരും അനേകമാണ്. ഇതിന്റെ കാരണങ്ങൾ വെളിപ്പെടുത്തുകയാണ് ചില പ്രവാസികൾ. യുഎഇയിൽ ശ്രദ്ധയോടെ പണം ചെലവാക്കുന്നത് മിച്ചം പിടിക്കാൻ സഹായിക്കുമെന്നും ഇത് ലോണുകൾ അടച്ചുതീർക്കാൻ സഹായിച്ചുവെന്നും ചിലർ ചൂണ്ടിക്കാട്ടിയപ്പോൾ മറ്റ് പലരും പറഞ്ഞത് ലോണുകൾ അടച്ചുതീർക്കാൻ തങ്ങളെ സഹായിച്ചത് യുഎഇയിലെ ഉയർന്ന വേതനമാണ് എന്നാണ്.
യുഎഇയിലെത്തുന്ന മിക്കവാറും പ്രവാസികൾക്കും നാട്ടിലെ വിദ്യാഭ്യാസ ലോൺ അധിക തലവേദനയാണ്. നാട്ടിൽ നിന്നാൽ ജോലി ചെയ്തുകിട്ടുന്ന ശമ്പളമെല്ലാം ലോണുകൾ അടച്ചുതീർക്കാൻ മാത്രമേ കാണുകയുള്ളൂ, സമ്പാദ്യമൊന്നും ഉണ്ടാവുകയില്ലെന്നും പല പ്രവാസികളും അഭിപ്രായപ്പെട്ടു. യുഎഇയിലെ കുറഞ്ഞ ജീവിതച്ചെലവുകളും ഉയർന്ന വേതനവും ലോണുകൾ അടച്ചുതീർക്കാൻ സഹായിക്കുന്നതിനൊപ്പം പണം സമ്പാദിക്കാനും സഹായിക്കുന്നുവെന്ന് ചെറുപ്പക്കാരായ പ്രവാസികൾ പറയുന്നു.
ലോൺ തിരിച്ചടവുകൾക്കൊപ്പം സമ്പാദ്യത്തിനും ജീവിതശൈലി മെച്ചപ്പെടുത്തുന്നതിനും പ്രാധാന്യം നൽകുന്ന ബജറ്റ് സൃഷ്ടിക്കേണ്ടത് നിർണായകമാണെന്ന് സാമ്പത്തിക വിദഗ്ദ്ധ ഡോ. അന്യ പട്ടേൽ അഭിപ്രായപ്പെട്ടു. സാമ്പത്തിക ഉപദേശം തേടേണ്ടതിന്റെ ആവശ്യകതയെപ്പറ്റിയും ഡോ. പട്ടേൽ ചൂണ്ടിക്കാട്ടി. വായ്പകളുടെ നിബന്ധനകൾ മനസിലാക്കുന്നതും റീഫിനാൻസിംഗ് പോലുള്ള ഓപ്ഷനുകൾ തിരഞ്ഞെടുക്കുന്നതിനും ഇത് സഹായിക്കും. കടം അമിതമാകുന്നതുവരെ കാത്തിരിക്കുന്നതിനുപകരം മുൻകരുതൽ നടപടികൾ സ്വീകരിക്കേണ്ടത് പ്രധാനമാണെന്നും ഡോ. അന്യ പട്ടേൽ വ്യക്തമാക്കി.
