ദുബായ്: പതിവുപോലെ ഭക്ഷണം കഴിക്കാനെത്തിയവർക്ക് മുന്നിൽ അപ്രതീക്ഷിത അതിഥിയായി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം. ദുബായിലെ പ്രശസ്തമായ ചെറി ഹൗസ് (Cherry House) കഫേയിലായിരുന്നു അദ്ദേഹത്തിന്റെ അപ്രതീക്ഷിത സന്ദർശനം. ഭരണാധികാരിയെ നേരിൽ കണ്ടതിന്റെ അമ്പരപ്പിലും സന്തോഷത്തിലുമായി അവിടെയുണ്ടായിരുന്ന ഉപഭോക്താക്കൾ.
അൽ സഫ മേഖലയിലുള്ള ചെറി ഹൗസിലെത്തിയ ഷെയ്ഖ് മുഹമ്മദ് കുറച്ചുസമയം അവിടെ ചെലവഴിക്കുകയും സന്ദർശകരുമായി ഇടപഴകുകയും ചെയ്തു. കഫേയിലുണ്ടായിരുന്ന കുട്ടികൾക്കൊപ്പം ചിത്രങ്ങളെടുക്കാനും അദ്ദേഹം സമയം കണ്ടെത്തി. കുടുംബത്തോടൊപ്പം ഭക്ഷണം കഴിക്കാനെത്തിയവർക്ക് ജീവിതത്തിൽ മറക്കാനാകാത്ത അനുഭവമായി ഈ സന്ദർശനം മാറി.
സാധാരണ ഭക്ഷണശാലയിലെത്തിയ ഉപഭോക്താക്കൾ പ്രതീക്ഷിക്കാത്ത ഈ കൂടിക്കാഴ്ച വളരെ പെട്ടെന്ന് തന്നെ ശ്രദ്ധ നേടി. ദുബായ് ഭരണാധികാരിയെ നേരിൽ കാണാനും അദ്ദേഹത്തോടൊപ്പം ചിത്രങ്ങളെടുക്കാനും സാധിച്ചതിന്റെ സന്തോഷത്തിലായിരുന്നു സന്ദർശകർ.
കോഫി റോസ്റ്ററി, ബേക്കറി, എസ്പ്രസ്സോ ബാർ, റസ്റ്ററന്റ് എന്നിവ ഒരുമിച്ചുള്ള ഹോം ഗ്രോൺ കഫേയാണ് ചെറി ഹൗസ്. ദുബായിലെ അൽ സഫയിലാണ് സ്ഥാപനം പ്രവർത്തിക്കുന്നത്.
ഇതാദ്യമായല്ല ഷെയ്ഖ് മുഹമ്മദ് ചെറി ഹൗസ് സന്ദർശിക്കുന്നത്. 2026 മേയിലും അദ്ദേഹം ഇവിടെ എത്തിയിരുന്നു. പൊതുസ്ഥലങ്ങളിലും ഭക്ഷണശാലകളിലും ഷോപ്പിങ് കേന്ദ്രങ്ങളിലുമെല്ലാം അപ്രതീക്ഷിതമായി എത്തി ജനങ്ങളുമായി നേരിട്ട് ഇടപഴകുന്ന അദ്ദേഹത്തിന്റെ രീതി വീണ്ടും ശ്രദ്ധ നേടുകയാണ്.
ഒരു സാധാരണ ഭക്ഷണവേളയെ ജീവിതത്തിലെ മനോഹരമായ ഓർമയാക്കി മാറ്റിയ ഷെയ്ഖ് മുഹമ്മദിന്റെ പുതിയ സന്ദർശനത്തിന്റെ ചിത്രങ്ങളും ദൃശ്യങ്ങളും സമൂഹമാധ്യമങ്ങളിലും ശ്രദ്ധ നേടുന്നു.
