UAE Car Rental New Rules 2027;ദുബായ്: യുഎഇയിൽ കാർ വാടകയ്ക്ക് നൽകുന്ന കമ്പനികൾക്ക് കർശന നിയന്ത്രണങ്ങളുമായി പുതിയ ട്രാഫിക് നിയമം. 2027 ജനുവരി ഒന്ന് മുതൽ വാടകയ്ക്ക് നൽകുന്ന എല്ലാ വാഹനങ്ങളിലും അംഗീകൃത വെഹിക്കിൾ ട്രാക്കിങ് ഉപകരണങ്ങൾ സ്ഥാപിക്കണം. കൂടാതെ, വാഹനങ്ങൾ ഏകീകൃത ഇലക്ട്രോണിക് പ്ലാറ്റ്‌ഫോമിൽ രജിസ്റ്റർ ചെയ്യുകയും വേണം. രാജ്യത്തെ കാർ റെന്റൽ മേഖലയെ കൂടുതൽ നിയന്ത്രിതവും സുരക്ഷിതവുമാക്കുന്നതിന്റെ ഭാഗമായാണ് പുതിയ പരിഷ്കാരം.
2024-ലെ ഫെഡറൽ ഡിക്രി നിയമം നമ്പർ 14-ന്റെ അടിസ്ഥാനത്തിൽ പുറത്തിറക്കിയ 2026-ലെ മന്ത്രിസഭാ തീരുമാനം നമ്പർ 174-ലാണ് പുതിയ വ്യവസ്ഥകൾ ഉൾപ്പെടുത്തിയിരിക്കുന്നത്. 2027 ജനുവരി ഒന്നുമുതൽ നിയമം പ്രാബല്യത്തിൽ വരും.
എല്ലാ വാടക വാഹനങ്ങളിലും ട്രാക്കർ നിർബന്ധം
പുതിയ ചട്ടപ്രകാരം, വാടകയ്ക്ക് നൽകാൻ ഉദ്ദേശിക്കുന്ന ഓരോ വാഹനത്തിലും ലൈസൻസിങ് അതോറിറ്റി അംഗീകരിച്ച ട്രാക്കിങ് ഉപകരണം സ്ഥാപിച്ചിരിക്കണം. വാഹനങ്ങളുടെ ഭൂമിശാസ്ത്രപരമായ സഞ്ചാരം നിരീക്ഷിക്കാനും വാടക ഇടപാടുകളുമായി ബന്ധപ്പെട്ട വിവരങ്ങൾ രേഖപ്പെടുത്താനും പുതിയ സംവിധാനം സഹായിക്കും.
ഇതിനായി ആഭ്യന്തര മന്ത്രാലയം ഏകീകൃത ഇലക്ട്രോണിക് സംവിധാനം രൂപീകരിക്കും. റെന്റൽ കമ്പനികളുടെ ഉടമസ്ഥതയിലുള്ള വാഹനങ്ങൾ രജിസ്റ്റർ ചെയ്യുക, അവ സഞ്ചരിക്കുന്ന പ്രദേശങ്ങൾ നിരീക്ഷിക്കുക, വാടക ഇടപാടുകളുടെ വിവരങ്ങൾ രേഖപ്പെടുത്തുക എന്നിവയാണ് ഈ സംവിധാനത്തിന്റെ പ്രധാന ലക്ഷ്യങ്ങൾ.
റെന്റൽ കമ്പനികൾക്ക് വാർഷിക പെർമിറ്റ്
പുതിയ നിയമപ്രകാരം യുഎഇയിൽ കാർ റെന്റൽ ബിസിനസ് നടത്താൻ ബന്ധപ്പെട്ട ലൈസൻസിങ് അതോറിറ്റിയിൽനിന്ന് പെർമിറ്റ് നേടണം. ഇതിനായി നാല് പ്രധാന നിബന്ധനകളുണ്ട്.
- വാടകയ്ക്ക് നൽകുന്ന എല്ലാ വാഹനങ്ങളിലും അംഗീകൃത ട്രാക്കിങ് ഉപകരണം സ്ഥാപിക്കണം.
- ആഭ്യന്തര മന്ത്രാലയവും ലൈസൻസിങ് അതോറിറ്റിയും അംഗീകരിച്ച ഏകീകൃത ഇലക്ട്രോണിക് പ്ലാറ്റ്‌ഫോമിൽ രജിസ്റ്റർ ചെയ്ത് അംഗത്വമെടുക്കണം.
- ലൈസൻസിങ്, ട്രാഫിക് എൻഫോഴ്‌സ്‌മെന്റ് അതോറിറ്റികൾ നിർദേശിക്കുന്ന അധിക നിബന്ധനകൾ പാലിക്കണം.
- കാർ റെന്റൽ ബിസിനസ് നടത്തുന്നതിനുള്ള സാധുവായ വാണിജ്യ ലൈസൻസ് ഉണ്ടായിരിക്കണം.
പുതിയ പെർമിറ്റിന് ഒരു കലണ്ടർ വർഷമായിരിക്കും കാലാവധി. ഇതേ കാലയളവിലേക്ക് പുതുക്കാനും സാധിക്കും.
വാഹനം വാടകയ്ക്ക് നൽകുമ്പോൾ അഞ്ച് നിർബന്ധിത നിബന്ധനകൾ
പുതിയ ചട്ടപ്രകാരം ലൈസൻസുള്ള കാർ റെന്റൽ കമ്പനികൾ അഞ്ച് പ്രധാന ഉത്തരവാദിത്തങ്ങളും പാലിക്കണം.
- വാഹനം വാടകയ്ക്ക് എടുക്കുന്ന വ്യക്തിയുടെ ഡ്രൈവിങ് ലൈസൻസിന് സാധുതയുണ്ടെന്ന് ഉറപ്പാക്കണം.
- അംഗീകൃത വാഹന വാടക സംവിധാനത്തിലുള്ള ഏകീകൃത കരാർ ഉപയോഗിച്ചായിരിക്കണം ഇടപാട് പൂർത്തിയാക്കേണ്ടത്.
- ഓരോ വാടക കരാറും അംഗീകൃത ഇലക്ട്രോണിക് സംവിധാനത്തിലൂടെ ലൈസൻസിങ് അതോറിറ്റിയിൽ രജിസ്റ്റർ ചെയ്യണം.
- കമ്പനിയുടെ സ്വന്തം പേരിൽ രജിസ്റ്റർ ചെയ്തതും വാടകയ്ക്ക് നൽകാൻ അനുമതിയുള്ളതുമായ വാഹനങ്ങൾ മാത്രമേ ഉപയോഗിക്കാവൂ.
- ഒരു റെന്റൽ കമ്പനിക്ക് മറ്റൊരു റെന്റൽ കമ്പനിക്ക് വാഹനം കൈമാറണമെങ്കിൽ ബന്ധപ്പെട്ട അതോറിറ്റിയിൽ രജിസ്റ്റർ ചെയ്ത വാടക കരാർ ഉണ്ടായിരിക്കണം.
അതേസമയം, അതേ കമ്പനിയിലെ ജീവനക്കാർക്ക് വാഹനങ്ങൾ ഉപയോഗിക്കുന്നതിന് പ്രത്യേക നിബന്ധനകൾക്ക് വിധേയമായി ഇളവുണ്ടാകും.
2027 മുതൽ കൂടുതൽ നിയന്ത്രണങ്ങൾ
വാഹനങ്ങളുടെ സഞ്ചാരം നിരീക്ഷിക്കുന്നതിനൊപ്പം വാടക കരാറുകൾക്കും വാഹനങ്ങളുടെ ഉടമസ്ഥതയ്ക്കും കൂടുതൽ വ്യക്തമായ നിയന്ത്രണങ്ങൾ കൊണ്ടുവരുന്നതാണ് പുതിയ നിയമത്തിന്റെ ലക്ഷ്യം. ഇതോടെ യുഎഇയിലെ കാർ റെന്റൽ കമ്പനികൾക്ക് പുതിയ സംവിധാനങ്ങളിലേക്ക് മാറേണ്ടിവരും. വാഹനങ്ങൾ വാടകയ്ക്ക് എടുക്കുന്ന ഉപഭോക്താക്കൾക്കും സാധുവായ ഡ്രൈവിങ് ലൈസൻസും കൃത്യമായ കരാർ നടപടികളും ഉറപ്പാക്കേണ്ടിവരും.
