UAE weather alert November : ദുബായ്: അറബിക്കടലിൽ നിന്നുള്ള ഈർപ്പമുള്ള കാറ്റും സമീപിക്കുന്ന ന്യൂനമർദ്ദ സംവിധാനവും കാരണം ബുധനാഴ്ച മുതൽ യുഎഇയുടെ വിവിധ ഭാഗങ്ങളിൽ ഇടിമിന്നലോടുകൂടിയ മഴയ്ക്കും ശക്തമായ മഴയ്ക്കും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ദുബായ്, അബുദാബി, വടക്കൻ എമിറേറ്റുകൾ എന്നിവിടങ്ങളിൽ മഴ ലഭിക്കുമെന്നാണ് പ്രവചനം.

രാജ്യത്തിന്റെ വിവിധ ഭാഗങ്ങളിൽ മേഘങ്ങൾ രൂപപ്പെടുകയും നീങ്ങുകയും ചെയ്യുന്നതിനാൽ മഴയുടെ തീവ്രതയിൽ വ്യത്യാസമുണ്ടാകും. ചില പ്രദേശങ്ങളിൽ ശക്തമായ മഴയ്ക്കും സാധ്യതയുണ്ട്. മണിക്കൂറിൽ 45 കിലോമീറ്റർ വരെ വേഗതയിൽ കാറ്റ് വീശിയേക്കാം. ഇതോടെ പൊടിയും മണലും ഉയരുന്നതിനൊപ്പം കടൽക്ഷോഭത്തിനും സാധ്യതയുണ്ട്.

തിങ്കൾ മുതൽ വ്യാഴം വരെ അസ്ഥിരമായ കാലാവസ്ഥ തുടരുമെന്നാണ് NCM പ്രവചിച്ചിരിക്കുന്നത്. മേഘാവരണം വർധിക്കുന്നതിനും മഴ വ്യാപകമാകുന്നതിനുമൊപ്പം താപനില ക്രമേണ കുറയുമെന്നും അധികൃതർ അറിയിച്ചു.

അറബിക്കടലിൽ നിന്നുള്ള ഈർപ്പമുള്ള കാറ്റ്

പടിഞ്ഞാറുനിന്നുള്ള ദുർബലമായ ഉപരിതല ന്യൂനമർദ്ദവും മുകളിലെ അന്തരീക്ഷത്തിലുള്ള ന്യൂനമർദ്ദ സംവിധാനവുമാണ് കാലാവസ്ഥാ മാറ്റത്തിന് കാരണമാകുന്നത്.

അറബിക്കടലിൽ നിന്ന് തെക്കുപടിഞ്ഞാറൻ ദിശയിൽ വീശുന്ന ഈർപ്പമുള്ള കാറ്റും സൗദി അറേബ്യയിൽ രൂപപ്പെട്ട മേഘങ്ങൾ യുഎഇയിലേക്ക് നീങ്ങുന്നതും മഴയ്ക്ക് അനുകൂലമായ സാഹചര്യമൊരുക്കുമെന്ന് NCM കാലാവസ്ഥാ നിരീക്ഷകൻ ഡോ. അഹമ്മദ് ഹബീബ് ഖലീജ് ടൈംസിനോട് പറഞ്ഞു.

ചെങ്കടൽ ന്യൂനമർദ്ദത്തിന്റെ സ്വാധീനത്തിൽ രൂപപ്പെട്ട ഉപരിതല ന്യൂനമർദ്ദത്തോടൊപ്പം വടക്കുപടിഞ്ഞാറ് നിന്നുള്ള മുകളിലെ അന്തരീക്ഷ ന്യൂനമർദ്ദവും മേഖലയിലേക്ക് കൂടുതൽ ഈർപ്പം എത്തിക്കുന്നുണ്ട്. സൗദി അറേബ്യയുടെ വിവിധ ഭാഗങ്ങളിൽ രൂപപ്പെട്ട മേഘങ്ങൾ ക്രമേണ യുഎഇയിലേക്ക് നീങ്ങുകയാണെന്നും അദ്ദേഹം വ്യക്തമാക്കി.

ഏതെല്ലാം പ്രദേശങ്ങളിൽ ശക്തമായ മഴ ലഭിക്കും?

ചൊവ്വാഴ്ച മുതൽ പ്രധാനപ്പെട്ട മേഘരൂപീകരണം ആരംഭിക്കുമെന്നാണ് പ്രവചനം. തുടക്കത്തിൽ രാജ്യത്തിന്റെ പടിഞ്ഞാറൻ മേഖലകൾ, ദ്വീപുകൾ, തീരപ്രദേശങ്ങൾ, വടക്കൻ മേഖലകൾ എന്നിവിടങ്ങളിലായിരിക്കും മഴയ്ക്ക് സാധ്യത.

എന്നാൽ ന്യൂനമർദ്ദം കൂടുതൽ ശക്തമാകുന്നതോടെ ബുധനാഴ്ച ഉച്ചകഴിഞ്ഞ് ഇടിമിന്നലോടുകൂടിയ ശക്തമായ മഴയ്ക്ക് സാധ്യതയുണ്ട്.

ആദ്യം പടിഞ്ഞാറൻ മേഖലകളിൽ മഴ ആരംഭിക്കുകയും പിന്നീട് അബുദാബി, ദുബായ് ഉൾപ്പെടെയുള്ള തീരപ്രദേശങ്ങളിലേക്കും പ്രധാന നഗരങ്ങളിലേക്കും വ്യാപിക്കുകയും ചെയ്യുമെന്നാണ് വിലയിരുത്തൽ.

മഴയുടെ തീവ്രത നേരിയതുമുതൽ മിതമായതുവരെയും ചില സമയങ്ങളിൽ ശക്തമായ മഴയായും മാറാം. നവംബർ 12 ഉച്ചകഴിഞ്ഞ് വരെ ഈ കാലാവസ്ഥ തുടരുമെന്നാണ് പ്രവചനം.

റാസൽഖൈമ ഉൾപ്പെടെയുള്ള വടക്കൻ മേഖലകളിലും പർവതപ്രദേശങ്ങളിലുമായിരിക്കും ഏറ്റവും ശക്തമായ മഴയ്ക്ക് സാധ്യത. വടക്കൻ തീരപ്രദേശങ്ങളിലും അൽ ദഫ്റയിലും മഴ ലഭിച്ചേക്കാം.

ദുബായ്, അബുദാബി, ഷാർജ എന്നിവിടങ്ങളിലും മഴ പ്രതീക്ഷിക്കുന്നുണ്ടെങ്കിലും പൊതുവെ നേരിയതോ മിതമായതോ ആയ മഴയ്ക്കാണ് സാധ്യത.

ദുബായ്ക്കും അൽ ഐനിനും ഇടയിലുള്ള പ്രദേശങ്ങളിലും അൽ ഐനിന്റെ വടക്കുകിഴക്കൻ മേഖലകളിലേക്കും ഇടിമിന്നലോടുകൂടിയ മേഘങ്ങൾ വ്യാപിച്ചേക്കാമെന്നും കാലാവസ്ഥാ നിരീക്ഷകൻ മുന്നറിയിപ്പ് നൽകി.

കാറ്റിന്റെ വേഗം കൂടും; താപനില 6 ഡിഗ്രി വരെ കുറയും

മഴയ്ക്കൊപ്പം കാറ്റിന്റെ ശക്തിയും വർധിക്കുമെന്നാണ് പ്രവചനം. പ്രത്യേകിച്ച് കടലിൽ കാറ്റ് ശക്തമാകുന്നതോടെ കടൽ പ്രക്ഷുബ്ധമാകാനും ചില സമയങ്ങളിൽ അതീവ പ്രക്ഷുബ്ധമാകാനും സാധ്യതയുണ്ട്.

വടക്കുപടിഞ്ഞാറൻ കാറ്റ് മിതമായതുമുതൽ ശക്തമായതുവരെയുള്ള വേഗത്തിൽ വീശിയേക്കും. ഇതിന്റെ ഫലമായി ചില പ്രദേശങ്ങളിൽ പൊടിയും മണലും ഉയർന്ന് ദൂരക്കാഴ്ചയെ ബാധിക്കാനും സാധ്യതയുണ്ട്.

അടുത്ത മൂന്ന് ദിവസത്തിനുള്ളിൽ രാജ്യത്തെ താപനിലയിൽ ഏകദേശം 4 മുതൽ 6 ഡിഗ്രി സെൽഷ്യസ് വരെ കുറവുണ്ടാകുമെന്നാണ് കാലാവസ്ഥാ വകുപ്പിന്റെ വിലയിരുത്തൽ. ഇതോടെ രാജ്യത്ത് താരതമ്യേന തണുത്ത കാലാവസ്ഥ അനുഭവപ്പെടും.

ചൊവ്വാഴ്ച താപനിലയിൽ ആദ്യ കുറവുണ്ടാകുമെന്നും വെള്ളിയാഴ്ച വീണ്ടും കുറയുമെന്നും ഡോ. അഹമ്മദ് ഹബീബ് പറഞ്ഞു. എന്നാൽ താപനിലയിലെ മാറ്റം പെട്ടെന്നായിരിക്കില്ലെന്നും ക്രമേണയായിരിക്കുമെന്നും അദ്ദേഹം വ്യക്തമാക്കി.

നവംബർ 12 ഉച്ചകഴിഞ്ഞതോടെ പ്രധാന മഴക്കാല സാഹചര്യം ദുർബലമാകുമെന്നാണ് പ്രതീക്ഷിക്കുന്നത്. എന്നിരുന്നാലും വെള്ളിയാഴ്ചയും രാജ്യത്തിന്റെ വടക്കൻ, കിഴക്കൻ മേഖലകളിൽ ചില മേഘങ്ങൾ തുടരാൻ സാധ്യതയുണ്ട്.

ശരത്കാലത്ത് (Autumn) യുഎഇയിൽ ഇത്തരം കാലാവസ്ഥാ സംവിധാനങ്ങൾ സാധാരണയായി അനുഭവപ്പെടാറുണ്ടെന്നും കാലാവസ്ഥാ നിരീക്ഷകൻ കൂട്ടിച്ചേർത്തു.

യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ