Magic Baby Tea Sleep Gripe Water Qatar ദോഹ: കുഞ്ഞുങ്ങൾക്കായി വിപണിയിലെത്തിച്ച ‘ബേബീസ് മാജിക് ടീ ബേബി സ്ലീപ്പ് ഗ്രൈപ്പ് വാട്ടർ’ എന്ന ഉൽപ്പന്നത്തിൽ ലേബലിൽ രേഖപ്പെടുത്താത്ത ആൽക്കഹോൾ കണ്ടെത്തിയതിനെ തുടർന്ന് മുന്നറിയിപ്പുമായി ഖത്തർ പൊതുജനാരോഗ്യ മന്ത്രാലയം (MoPH). ഉൽപ്പന്നം ഉപയോഗിക്കുന്നത് ഉടൻ നിർത്തണമെന്നും കൈവശമുള്ളവ നശിപ്പിക്കണമെന്നും മന്ത്രാലയം പൊതുജനങ്ങളോട് നിർദേശിച്ചു.
4 ഔൺസ് (120 മില്ലി) കുപ്പികളിൽ ലഭിക്കുന്ന ഉൽപ്പന്നത്തിലാണ് കുട്ടികളുടെ ആരോഗ്യത്തിന് അപകടമുണ്ടാക്കാൻ സാധ്യതയുള്ള അപ്രഖ്യാപിത ആൽക്കഹോൾ സാന്നിധ്യം കണ്ടെത്തിയത്.
ഉൽപ്പന്നം ഉപയോഗിക്കുന്നത് ഉടൻ നിർത്തണം
പ്രസ്തുത ഉൽപ്പന്നം ഖത്തറിൽ ഔദ്യോഗികമായി രജിസ്റ്റർ ചെയ്തിട്ടില്ല. എന്നാൽ ഓൺലൈൻ പ്ലാറ്റ്‌ഫോമുകൾ വഴി ഇത് വാങ്ങാൻ ലഭിക്കുന്നുണ്ടെന്ന് മന്ത്രാലയം അറിയിച്ചു.
ഉൽപ്പന്നം വാങ്ങിയിട്ടുള്ളവർ കുട്ടികൾക്ക് നൽകുന്നത് ഉടൻ നിർത്തുകയും കൈവശമുള്ള കുപ്പികൾ നശിപ്പിക്കുകയും വേണം. കുട്ടികൾ ഇതിനകം ഉൽപ്പന്നം ഉപയോഗിച്ചിട്ടുണ്ടെങ്കിൽ ആരോഗ്യപ്രശ്നങ്ങളുടെ ലക്ഷണങ്ങൾ പ്രകടമായാൽ ഉടൻ വൈദ്യസഹായം തേടണമെന്നും മന്ത്രാലയം നിർദേശിച്ചു.
കുഞ്ഞുങ്ങൾക്കുള്ള ഉൽപ്പന്നങ്ങൾ വാങ്ങുമ്പോൾ അവയുടെ സുരക്ഷയും അംഗീകാരവും ഉറപ്പാക്കണമെന്നും ഔദ്യോഗിക മുന്നറിയിപ്പുകൾ ശ്രദ്ധിക്കണമെന്നും ആരോഗ്യ മന്ത്രാലയം പൊതുജനങ്ങളോട് അഭ്യർഥിച്ചു.
