Travel Entry and Exit Notifications Through Sahel App കുവൈത്ത് സിറ്റി: കുവൈത്തിൽ പൗരന്മാർക്കും പ്രവാസികൾക്കും യാത്രയുമായി ബന്ധപ്പെട്ട അറിയിപ്പുകൾ ലഭ്യമാക്കുന്നതിനായി ഏകീകൃത സർക്കാർ സേവന ആപ്പായ സഹേലിൽ പുതിയ സംവിധാനം സജീവമാക്കി ആഭ്യന്തര മന്ത്രാലയം. രാജ്യത്തേക്കുള്ള പ്രവേശനവും പുറത്തേക്കുള്ള യാത്രയും സംബന്ധിച്ച വിവരങ്ങൾ ഇനി ആപ്പിലൂടെ അറിയാൻ സാധിക്കും.
പുതിയ സംവിധാനത്തിലൂടെ കുവൈത്തിൽ പ്രവേശിക്കുമ്പോഴും രാജ്യം വിടുമ്പോഴും ഉപയോക്താക്കൾക്ക് അറിയിപ്പുകൾ ലഭിക്കും. ഇതുവഴി സ്വന്തം യാത്രാ വിവരങ്ങൾ എളുപ്പത്തിൽ പരിശോധിക്കാനും യാത്രാ രേഖകളുമായി ബന്ധപ്പെട്ട വിവരങ്ങൾ കൈവശം വയ്ക്കാനും സാധിക്കും. യാത്രക്കാരുടെ പുറപ്പെടൽ, വരവ് നടപടികളുമായി നേരിട്ട് ബന്ധപ്പെട്ട സർക്കാർ സേവനങ്ങളും സഹേൽ ആപ്പിലൂടെ ലഭ്യമാകും. കൂടാതെ യാത്രാ വിവരങ്ങളിൽ തെറ്റുകളോ പൊരുത്തക്കേടുകളോ ശ്രദ്ധയിൽപ്പെട്ടാൽ അവ അധികൃതരെ അറിയിക്കാനുള്ള സൗകര്യവും പുതിയ സേവനത്തിലുണ്ട്.
യാത്രാ വിവരങ്ങളിലേക്കുള്ള പ്രവേശനം കൂടുതൽ എളുപ്പമാക്കുകയും സർക്കാർ സേവനങ്ങൾ ഡിജിറ്റൽ സംവിധാനത്തിലൂടെ കൂടുതൽ സൗകര്യപ്രദമാക്കുകയും ചെയ്യുകയാണ് പുതിയ സംവിധാനത്തിന്റെ ലക്ഷ്യം. കുവൈത്തിലെ വിവിധ സർക്കാർ വകുപ്പുകളുടെ സേവനങ്ങൾ ഒരൊറ്റ പ്ലാറ്റ്‌ഫോമിൽ ലഭ്യമാക്കുന്ന സംവിധാനമാണ് സഹേൽ ആപ്പ്. പൗരന്മാർക്കും താമസക്കാർക്കും സർക്കാർ അറിയിപ്പുകളും സേവനങ്ങളും മൊബൈൽ ഫോണിലൂടെ ലഭ്യമാക്കുന്നതിൽ ആപ്പ് പ്രധാന പങ്കുവഹിക്കുന്നുണ്ട്.
