Kuwait drug trafficking case : കുവൈത്ത് സിറ്റി: കൊക്കെയ്ൻ, സൈക്കോട്രോപിക് ലഹരിവസ്തുക്കൾ എന്നിവയുടെ കടത്തും 73,000 കുവൈത്ത് ദിനാറിലധികം വരുന്ന മയക്കുമരുന്ന് ഇടപാടുകളിലൂടെ ലഭിച്ച പണം വെളുപ്പിക്കലും ഉൾപ്പെട്ട കേസിൽ മൂന്ന് പേർക്ക് വധശിക്ഷ വിധിച്ച് കുവൈത്തിലെ ക്രിമിനൽ കോടതി. ഒരു കുവൈത്ത് പൗരൻ, ഈജിപ്ഷ്യൻ വനിത, ഇവരുടെ ഈജിപ്ഷ്യൻ മകൻ എന്നിവരെയാണ് കോടതി വധശിക്ഷയ്ക്ക് വിധിച്ചത്.
കൗൺസിലർ അഹമ്മദ് അൽ സാദിയുടെ നേതൃത്വത്തിലുള്ള ബെഞ്ചാണ് വിധി പുറപ്പെടുവിച്ചത്. ജഡ്ജിമാരായ യൂസഫ് അൽ സലാഹി, ഇമ്രാൻ സാദിഖ് എന്നിവരും കോടതി സെക്രട്ടറി ഇബ്രാഹിം അൽ ഫാർസിയും നടപടികളുടെ ഭാഗമായി പങ്കെടുത്തു.
കുവൈത്തിലെ മയക്കുമരുന്ന് വിരുദ്ധ വിഭാഗത്തിലെ ഉദ്യോഗസ്ഥർ നടത്തിയ ഓപ്പറേഷനുമായി ബന്ധപ്പെട്ടാണ് കേസ് കോടതിയിലെത്തിയത്. കൊക്കെയ്ൻ, സൈക്കോട്രോപിക് ലഹരിവസ്തുക്കൾ എന്നിവയുടെ കടത്തിൽ പ്രതികൾക്ക് പങ്കുണ്ടായിരുന്നുവെന്നാണ് കേസ്. കുവൈത്തിലും ഈജിപ്തിലും നടത്തിയ സാമ്പത്തിക ഇടപാടുകളിലൂടെ മയക്കുമരുന്ന് വിൽപ്പനയിൽനിന്ന് ലഭിച്ച 73,000 ദിനാറിലധികം വെളുപ്പിച്ചതായും അന്വേഷണത്തിൽ കണ്ടെത്തിയതായി റിപ്പോർട്ടിൽ പറയുന്നു.
മയക്കുമരുന്ന് വിരുദ്ധ ഉദ്യോഗസ്ഥർ നടത്തിയ രഹസ്യനീക്കത്തിനും തുടർന്നുള്ള അന്വേഷണത്തിനും ശേഷമാണ് പ്രതികളെ പിടികൂടിയത്. ഇതുമായി ബന്ധപ്പെട്ട തെളിവുകൾ പരിശോധിച്ച ശേഷമാണ് കോടതി ശിക്ഷ വിധിച്ചത്.
അതേസമയം, വധശിക്ഷ നടപ്പാക്കുന്നതിന് മുമ്പ് ബാധകമായ നിയമനടപടികളും അപ്പീൽ നടപടികളും പൂർത്തിയാകേണ്ടതുണ്ട്. നിലവിൽ കോടതി പുറപ്പെടുവിച്ച വിധി നിയമപരമായ തുടർനടപടികൾക്ക് വിധേയമാണ്.
