Defrauding Investor with Fake UAE Golden Visa Promise ദുബായ്: യുഎഇയുടെ 10 വർഷത്തെ ഗോൾഡൻ വിസ ലഭ്യമാക്കാമെന്ന് വാഗ്ദാനം ചെയ്ത് നിക്ഷേപകനിൽ നിന്ന് 44 ലക്ഷം ദിർഹം തട്ടിയെടുത്ത രണ്ട് പേർക്ക് പണം തിരിച്ചുനൽകാനും നഷ്ടപരിഹാരം നൽകാനും ദുബായ് സിവിൽ കോടതി ഉത്തരവിട്ടു. തട്ടിപ്പിനിരയായ വ്യക്തിക്ക് ആകെ 47 ലക്ഷം ദിർഹം നൽകണമെന്നാണ് കോടതിയുടെ വിധി. 44 ലക്ഷം ദിർഹം തട്ടിയെടുത്ത പണവും മൂന്ന് ലക്ഷം ദിർഹം നഷ്ടപരിഹാരവുമാണ് ഇതിൽ ഉൾപ്പെടുന്നത്.
കോടതി രേഖകൾ പ്രകാരം, ഗോൾഡൻ വിസ ലഭ്യമാക്കുന്നതിനുള്ള ഔദ്യോഗിക നിക്ഷേപ നടപടികൾ സുഗമമാക്കാമെന്ന് പറഞ്ഞാണ് രണ്ട് പേർ നിക്ഷേപകനെ സമീപിച്ചത്. നടപടികൾ എളുപ്പത്തിൽ പൂർത്തിയാക്കാമെന്നും 10 വർഷത്തെ ഗോൾഡൻ വിസ ലഭിക്കുമെന്നും വിശ്വസിപ്പിച്ച് ഇവർ 44 ലക്ഷം ദിർഹം കൈപ്പറ്റുകയായിരുന്നു.
എന്നാൽ പണം ലഭിച്ചതോടെ ഇരുവരും നിക്ഷേപകനുമായുള്ള ആശയവിനിമയം അവസാനിപ്പിച്ചു. വിസയ്ക്കായുള്ള നിയമാനുസൃതമായ നടപടികളൊന്നും സ്വീകരിച്ചില്ല. പണം സ്വന്തം ആവശ്യങ്ങൾക്കായി ഉപയോഗിക്കുകയും ചെയ്തു. താൻ തട്ടിപ്പിനിരയായെന്ന് തിരിച്ചറിഞ്ഞ നിക്ഷേപകൻ ഉടൻ ദുബായ് പൊലീസിൽ പരാതി നൽകി.
തുടർന്ന് നടത്തിയ അന്വേഷണത്തിൽ ബാങ്ക് ഇടപാടുകളുടെ രേഖകളും എഴുത്തുകുത്തുകളും മറ്റ് തെളിവുകളും പരിശോധിച്ചു. കേസിൽ രണ്ട് പ്രതികൾക്കെതിരെയും തട്ടിപ്പ്, മറ്റൊരാളുടെ പണം നിയമവിരുദ്ധമായി കൈക്കലാക്കൽ എന്നീ കുറ്റങ്ങൾ ചുമത്തി ക്രിമിനൽ കോടതി നടപടികൾ സ്വീകരിച്ചു. ഇരുവരും കുറ്റക്കാരാണെന്ന് കണ്ടെത്തിയതോടെ നിക്ഷേപകൻ പണം തിരിച്ചുപിടിക്കുന്നതിനായി സിവിൽ കോടതിയെ സമീപിക്കുകയായിരുന്നു.
ക്രിമിനൽ കോടതിയുടെ അന്തിമ വിധി തട്ടിപ്പ് നടന്നതിന്റെ തെളിവായി സിവിൽ കോടതി പരിഗണിച്ചു. നിക്ഷേപകന് ഉണ്ടായ സാമ്പത്തിക നഷ്ടത്തിനും മാനസിക ബുദ്ധിമുട്ടുകൾക്കും പ്രതികൾ ഉത്തരവാദികളാണെന്ന് കോടതി വിലയിരുത്തി.
ഇതിന്റെ അടിസ്ഥാനത്തിൽ 44 ലക്ഷം ദിർഹം നിക്ഷേപകന് തിരികെ നൽകാനും അധികമായി മൂന്ന് ലക്ഷം ദിർഹം നഷ്ടപരിഹാരം നൽകാനും കോടതി ഉത്തരവിട്ടു. നിയമപരമായ പലിശ, കോടതി ചെലവുകൾ, നിയമനടപടികളുമായി ബന്ധപ്പെട്ട മറ്റ് ചെലവുകൾ എന്നിവയും പ്രതികൾ വഹിക്കണം.
ഗോൾഡൻ വിസ ലഭ്യമാക്കാമെന്ന പേരിൽ പണം ആവശ്യപ്പെടുന്ന വ്യക്തികളെയും സ്ഥാപനങ്ങളെയും സമീപിക്കുമ്പോൾ ജാഗ്രത പാലിക്കേണ്ടതിന്റെ ആവശ്യകതയും ഈ സംഭവം ഓർമിപ്പിക്കുന്നു. യുഎഇയിലെ വിസ സംബന്ധമായ അപേക്ഷകളും നടപടികളും ഔദ്യോഗിക സർക്കാർ സംവിധാനങ്ങൾ വഴിമാത്രം നടത്തണമെന്ന് അധികൃതർ നേരത്തെയും മുന്നറിയിപ്പ് നൽകിയിട്ടുണ്ട്.
