Doha Film Festival : ദോഹ: നവംബർ 19 മുതൽ 27 വരെ നടക്കുന്ന ദോഹ ഫിലിം ഫെസ്റ്റിവൽ 2026-ന് പിന്തുണയുമായി പ്രമുഖ അന്താരാഷ്ട്ര സ്ഥാപനങ്ങളും സാംസ്കാരിക സംഘടനകളും മാധ്യമങ്ങളും സ്വകാര്യ മേഖലാ കമ്പനികളും പങ്കാളികളായി. സിനിമ, സർഗാത്മകത, സാംസ്കാരിക കൈമാറ്റം എന്നിവ പ്രോത്സാഹിപ്പിക്കുകയാണ് ഈ സഹകരണങ്ങളുടെ പ്രധാന ലക്ഷ്യം.
ലോകത്തിന്റെ വിവിധ ഭാഗങ്ങളിൽ നിന്നുള്ള സിനിമകളും വ്യത്യസ്തമായ കഥകളും പ്രേക്ഷകരിലേക്ക് എത്തിക്കുന്നതിലൂടെ ദോഹയെ ആഗോള സിനിമാ-സാംസ്കാരിക സംഗമകേന്ദ്രമാക്കി മാറ്റാനുള്ള ശ്രമത്തിന്റെ ഭാഗമായാണ് ഫെസ്റ്റിവൽ സംഘടിപ്പിക്കുന്നത്. ഖത്തറിന്റെ സർഗാത്മക വ്യവസായ മേഖലയെ ശക്തിപ്പെടുത്തുന്നതിനും പുതിയ പ്രതിഭകളെ വളർത്തുന്നതിനും ഈ പങ്കാളിത്തങ്ങൾ സഹായിക്കുമെന്ന് സംഘാടകർ പ്രതീക്ഷിക്കുന്നു.
ദോഹ ഫിലിം ഇൻസ്റ്റിറ്റ്യൂട്ട് സി.ഇ.ഒയും ദോഹ ഫിലിം ഫെസ്റ്റിവൽ ഡയറക്ടറുമായ ഫാത്തിമ ഹസൻ അൽ റിമൈഹി, സംസ്കാരത്തിന് അതിർത്തികൾ മറികടന്ന് ജനങ്ങളെ ഒന്നിപ്പിക്കാനും പരസ്പര ധാരണ വളർത്താനും കഴിയുമെന്ന് പറഞ്ഞു. വിവിധ സ്ഥാപനങ്ങളുടെ സഹകരണം ഫെസ്റ്റിവലിന്റെ സ്വാധീനം വർധിപ്പിക്കുമെന്നും സിനിമാ മേഖലയിലെ പുതിയ ശബ്ദങ്ങൾക്കും ആശയങ്ങൾക്കും അന്താരാഷ്ട്ര വേദി ഒരുക്കുമെന്നും അവർ വ്യക്തമാക്കി.
പ്രധാന പങ്കാളികൾ
മീഡിയ സിറ്റി ഖത്തറിലെ ഫിലിം കമ്മിറ്റി സ്ട്രാറ്റജിക് പാർട്ണറായും കത്താറ കൾച്ചറൽ പാർട്ണറായും വിസിറ്റ് ഖത്തർ പ്രിൻസിപ്പൽ പാർട്ണറായും പ്രവർത്തിക്കും.
ഹമദ് അന്താരാഷ്ട്ര വിമാനത്താവളം ഔദ്യോഗിക എയർപോർട്ട് പാർട്ണറായും റോസ്‌വുഡ് ദോഹ ഔദ്യോഗിക ഹോട്ടൽ പാർട്ണറായും പങ്കുചേരും.
BYD അൽ മന്നായി ഔദ്യോഗിക മൊബിലിറ്റി പാർട്ണറായിരിക്കും. ഖത്തർ മ്യൂസിയംസ്, മ്യൂസിയം ഓഫ് ഇസ്‌ലാമിക് ആർട്ട്, ഇയേഴ്സ് ഓഫ് കൾച്ചർ, ഖത്തർ ക്രിയേറ്റ്സ്, VOX സിനിമാസ് എന്നിവയും ഫെസ്റ്റിവലിന്റെ സംഭാവനാ പങ്കാളികളായി പ്രവർത്തിക്കും.
അന്താരാഷ്ട്ര മാധ്യമ പങ്കാളികൾ
അൽ അറബി 2 ഔദ്യോഗിക ബ്രോഡ്കാസ്റ്റ് പാർട്ണറായിരിക്കും. അൽ അറബി പ്ലസ്, ഡെഡ്‌ലൈൻ, സ്ക്രീൻ ഡെയ്ലി, വെറൈറ്റി, അൽ ജസീറ, ഐ ലവ് ഖത്തർ, ഖത്തർ ലിവിങ്, TOD എന്നിവയും മാധ്യമ പങ്കാളികളായി ചേരും. ഖമ്മ്യൂണിക്കേഷൻ സോഷ്യൽ മീഡിയ പാർട്ണറായും പ്രവർത്തിക്കും.
ഹമദ് ബിൻ ഖലീഫ സർവകലാശാലയിലെ കോളേജ് ഓഫ് ഹ്യുമാനിറ്റീസ് ആൻഡ് സോഷ്യൽ സയൻസസ്, കോർഗെയിം, FIPRESCI, ഫ്രഞ്ച് ഇൻസ്റ്റിറ്റ്യൂട്ട് ഓഫ് ഖത്തർ, ഹയ്യ, കത്താറ സ്റ്റുഡിയോസ്, ഖത്തർ റെഡ് ക്രസന്റ്, ഖിൻവാൻ, മെസ്റ്റൂർ ഇൽഹാം, ടെ-മാസ്ക് എന്നിവയാണ് ഫെസ്റ്റിവലിന്റെ മറ്റ് സുഹൃദ് പങ്കാളികൾ. ടെ-മാസ്ക് ഔദ്യോഗിക ബ്യൂട്ടി പാർട്ണറായും പ്രവർത്തിക്കും.
ദോഹ ഫിലിം ഇൻസ്റ്റിറ്റ്യൂട്ടിന്റെ നേതൃത്വത്തിൽ സംഘടിപ്പിക്കുന്ന ഒമ്പത് ദിവസം നീളുന്ന ഫെസ്റ്റിവലിൽ ചലച്ചിത്ര പ്രവർത്തകർ, സിനിമാ മേഖലയിലെ വിദഗ്ധർ, പ്രേക്ഷകർ എന്നിവർ പങ്കെടുക്കും. മികച്ച സിനിമാ പ്രദർശനങ്ങൾ, ചർച്ചകൾ, വിവിധ സാംസ്കാരിക പരിപാടികൾ എന്നിവയും മേളയുടെ ഭാഗമായി നടക്കും.
