
Strait of Hormuz tanker attack : ഹോർമുസ് കടലിടുക്കിൽ ഇന്ത്യൻ നാവികർ ജോലി ചെയ്തിരുന്ന എൽപിജി ടാങ്കർ കപ്പലിന് നേരെ മിസൈലാക്രമണം. പനാമയുടെ പതാകയേന്തിയ ‘താര ഗ്യാസ്’ എന്ന കപ്പലാണ് ആക്രമിക്കപ്പെട്ടത്. കപ്പലിലുണ്ടായിരുന്ന 24 ഇന്ത്യക്കാർ ഉൾപ്പെടെ 25 ജീവനക്കാരും പരുക്കുകളില്ലാതെ സുരക്ഷിതരാണെന്ന് കേന്ദ്ര തുറമുഖ, ഷിപ്പിങ് മന്ത്രി സർബാനന്ദ സോനോവാൾ അറിയിച്ചു.
കപ്പലിലെ ജീവനക്കാരെല്ലാം സുരക്ഷിതരാണെന്നും സംഭവത്തെക്കുറിച്ച് ബന്ധപ്പെട്ട അധികൃതർ നിരീക്ഷണം തുടരുകയാണെന്നും മന്ത്രി സമൂഹമാധ്യമമായ എക്സിലൂടെ വ്യക്തമാക്കി. കപ്പൽ മാനേജ്മെന്റുമായി നിരന്തരം ബന്ധപ്പെടുന്നുണ്ടെന്നും അദ്ദേഹം അറിയിച്ചു.
കഴിഞ്ഞ ഒരാഴ്ചയ്ക്കിടെ ഇന്ത്യൻ ജീവനക്കാരുള്ള കപ്പലിന് നേരെ ഹോർമുസ് മേഖലയിൽ നടക്കുന്ന രണ്ടാമത്തെ ആക്രമണമാണിത്. ഈ മാസം 11-നും സമാനമായ രീതിയിൽ മറ്റൊരു കപ്പലിന് നേരെ ആക്രമണമുണ്ടായിരുന്നു. അന്നത്തെ സംഭവത്തിൽ കപ്പലിലുണ്ടായിരുന്ന മുഴുവൻ ജീവനക്കാരെയും യുഎഇ കോസ്റ്റ് ഗാർഡ് അതിവേഗം ഇടപെട്ട് സുരക്ഷിതമായി ഒഴിപ്പിച്ചിരുന്നു.
ലോകത്തിലെ എണ്ണക്കയറ്റുമതിയുടെ വലിയൊരു പങ്കും കടന്നുപോകുന്ന തന്ത്രപ്രധാനമായ ജലപാതയാണ് ഹോർമുസ് കടലിടുക്ക്. ആഗോള ഊർജവിതരണത്തിൽ നിർണായക പങ്കുവഹിക്കുന്ന ഈ മേഖലയിലൂടെ നിരവധി ചരക്കുകപ്പലുകളും എണ്ണ-വാതക ടാങ്കറുകളും സഞ്ചരിക്കുന്നുണ്ട്.
അടുത്തിടെയായി ഗൾഫ് മേഖലയിലും ഹോർമുസ് കടലിടുക്കിലും ചരക്കുകപ്പലുകൾക്ക് നേരെയുള്ള ആക്രമണങ്ങൾ വർധിക്കുന്നത് അന്താരാഷ്ട്ര തലത്തിൽ ആശങ്ക സൃഷ്ടിച്ചിട്ടുണ്ട്. മേഖലയിലെ സംഘർഷാവസ്ഥ കണക്കിലെടുത്ത് കടൽപ്പാതയിലുടനീളം കപ്പലുകൾക്കും ജീവനക്കാർക്കും സുരക്ഷ ഉറപ്പാക്കുന്നതിനുള്ള ജാഗ്രത തുടരുകയാണ്.
