
Kuwait Warns Employers of Penalties Over Salary Transfer Violations കുവൈത്ത് സിറ്റി: ജീവനക്കാരുടെ ശമ്പളം അവരുടെ വ്യക്തിഗത ബാങ്ക് അക്കൗണ്ടുകളിലേക്ക് നേരിട്ട് കൈമാറണമെന്ന നിയമബാധ്യത തൊഴിലുടമകളെ ഓർമിപ്പിച്ച് കുവൈത്ത് പബ്ലിക് അതോറിറ്റി ഫോർ മാൻപവർ (PAM). ശമ്പള കൈമാറ്റവുമായി ബന്ധപ്പെട്ട ചട്ടങ്ങൾ ലംഘിക്കുന്ന സ്ഥാപനങ്ങൾക്കെതിരെ നിയമനടപടികളും പിഴ ഉൾപ്പെടെയുള്ള നിയന്ത്രണ നടപടികളും സ്വീകരിക്കുമെന്ന് അതോറിറ്റി മുന്നറിയിപ്പ് നൽകി.
തൊഴിലുടമകൾക്കായി പുറത്തിറക്കിയ അറിയിപ്പിലാണ് അതോറിറ്റി ഇക്കാര്യം വ്യക്തമാക്കിയത്. ജീവനക്കാരുടെ വ്യക്തിഗത ബാങ്ക് അക്കൗണ്ടുകളിലേക്ക് ശമ്പളം നിക്ഷേപിക്കുന്നത് നിയമപരമായ ബാധ്യത മാത്രമല്ലെന്നും തൊഴിലാളികളുടെ അവകാശങ്ങളോടുള്ള ബഹുമാനത്തിന്റെ അടയാളമാണെന്നും അറിയിപ്പിൽ ചൂണ്ടിക്കാട്ടി.
ശമ്പളം നിശ്ചിത രീതിയിൽ കൈമാറാത്ത തൊഴിലുടമകൾക്കെതിരെ ആവശ്യമായ നടപടികൾ സ്വീകരിക്കാൻ അതോറിറ്റിക്ക് അധികാരമുണ്ടെന്നും സ്ഥാപനങ്ങളുടെ കീഴിൽ രജിസ്റ്റർ ചെയ്തിട്ടുള്ള തൊഴിലാളികളുടെ അവകാശങ്ങൾ സംരക്ഷിക്കുകയാണ് ഇതിന്റെ ലക്ഷ്യമെന്നും PAM വ്യക്തമാക്കി.
തൊഴിലാളികളുടെ വേതനം അവരുടെ വ്യക്തിഗത അക്കൗണ്ടുകളിലേക്ക് കൈമാറുന്നത് നിയമപരമായ ബാധ്യത നിറവേറ്റുന്നതിനൊപ്പം പിഴകളിൽനിന്ന് തൊഴിലുടമകളെ സംരക്ഷിക്കുമെന്നും അതോറിറ്റിയുടെ അറിയിപ്പിൽ പറയുന്നു.
കുവൈത്തിലെ തൊഴിൽനിയമങ്ങൾ കൃത്യമായി നടപ്പാക്കുന്നതിനും ശമ്പള വിതരണവുമായി ബന്ധപ്പെട്ട നിയമലംഘനങ്ങൾ തടയുന്നതിനും തൊഴിലാളികളുടെ അവകാശങ്ങൾ സംരക്ഷിക്കുന്നതിനുമുള്ള നടപടികളുടെ ഭാഗമായാണ് അതോറിറ്റിയുടെ പുതിയ ഓർമപ്പെടുത്തൽ.





