Kuwait introduces new kiosk rules കുവൈത്തിലെ സഹകരണ സംഘങ്ങളിലെ കിയോസ്കുകൾക്ക് പുതിയ നിയമങ്ങൾ; 50 ശതമാനം ചെറുകിട സംരംഭകർക്ക്

Kuwait introduces new kiosk rules കുവൈത്ത് സിറ്റി: കുവൈത്തിലെ സഹകരണ സംഘങ്ങളുടെ സെൻട്രൽ മാർക്കറ്റുകളിലെ കിയോസ്കുകളുടെ പ്രവർത്തനത്തിനും നിക്ഷേപത്തിനും പുതിയ നിയന്ത്രണങ്ങൾ ഏർപ്പെടുത്തി സാമൂഹികകാര്യ മന്ത്രാലയം. ചെറുകിട സംരംഭകർക്ക് കൂടുതൽ അവസരങ്ങൾ ഉറപ്പാക്കുന്നതിനായി ആകെ കിയോസ്കുകളുടെ കുറഞ്ഞത് 50 ശതമാനം ചെറുകിട ബിസിനസ് ഉടമകൾക്കായി മാറ്റിവെക്കണമെന്നും പുതിയ ഉത്തരവിൽ നിർദേശിക്കുന്നു.

സാമൂഹികകാര്യ, കുടുംബ, ബാല്യകാലകാര്യ മന്ത്രി ഡോ. അംതാൽ അൽ ഹുവൈല പുറപ്പെടുവിച്ച മന്ത്രിതല തീരുമാനം നമ്പർ 378/2026 നവംബർ 22-ന് ഔദ്യോഗിക ഗസറ്റായ ‘കുവൈത്ത് അൽ യൗം’ 1818-ാം പതിപ്പിൽ പ്രസിദ്ധീകരിച്ചു. പ്രസിദ്ധീകരിച്ച ദിവസം മുതൽ ഉത്തരവ് പ്രാബല്യത്തിൽ വന്നു.

താഴത്തെ നിലയിൽ മാത്രമേ കിയോസ്കുകൾ അനുവദിക്കൂ

സഹകരണ സംഘങ്ങളുടെ സെൻട്രൽ മാർക്കറ്റുകളുടെ താഴത്തെ നിലയിൽ മാത്രമേ കിയോസ്കുകൾ അനുവദിക്കാവൂ. ഇതിനായി ബന്ധപ്പെട്ട അധികൃതരുടെ അനുമതിയും ആവശ്യമായ ലൈസൻസുകളും നേടിയിരിക്കണം. കിയോസ്കുകളുടെ സ്ഥലം, വലുപ്പം, പ്രവർത്തനം എന്നിവ മന്ത്രാലയത്തിന്റെ മുൻകൂർ അനുമതിയില്ലാതെ മാറ്റാനും പാടില്ല.

കിയോസ്കുകളുടെ പ്രവർത്തനങ്ങളെ രണ്ട് വിഭാഗങ്ങളായി തിരിച്ചിരിക്കുന്നു:

  • അത്യാവശ്യവും പ്രധാനപ്പെട്ടതുമായ സേവനങ്ങൾ: മത്സ്യവിൽപ്പന, ഇറച്ചിക്കടകൾ, മില്ലുകൾ, പേസ്ട്രികൾ, മധുരപലഹാരങ്ങൾ, ബേക്കറി ഉൽപ്പന്നങ്ങൾ എന്നിവ.
  • മറ്റ് സേവനങ്ങൾ: താക്കോൽ നിർമ്മാണം, വാച്ച് അറ്റകുറ്റപ്പണി, പരമ്പരാഗത ഭക്ഷണ സ്റ്റാളുകൾ, മൊബൈൽ ഫോണുകളും അനുബന്ധ ഉപകരണങ്ങളും വിൽക്കുന്ന കടകൾ, പൂക്കളുടെയും ചെടികളുടെയും വിൽപ്പന എന്നിവ.

കിയോസ്കുകളുടെ വലുപ്പത്തിന് പരിധി

അത്യാവശ്യ വിഭാഗത്തിലെ കിയോസ്കുകൾക്കായി ആകെ അനുവദിക്കാവുന്ന സ്ഥലം 48 ചതുരശ്ര മീറ്ററിൽ കൂടരുത്. ഓരോ കിയോസ്കിനും പരമാവധി 12 ചതുരശ്ര മീറ്റർ മാത്രമാണ് അനുവദിക്കുക. മത്സ്യ, ഇറച്ചി കടകളിൽ മെക്കാനിക്കൽ വെന്റിലേഷൻ, ദുർഗന്ധം നീക്കംചെയ്യാനുള്ള സംവിധാനങ്ങൾ എന്നിവയും ഒരുക്കണം.

സേവന വിഭാഗത്തിലെ കിയോസ്കുകൾക്കായി ആകെ 20 ചതുരശ്ര മീറ്റർ മാത്രമേ അനുവദിക്കൂ. ഓരോ കിയോസ്കിന്റെയും പരമാവധി വിസ്തീർണം നാല് ചതുരശ്ര മീറ്ററായിരിക്കും.

നിക്ഷേപ കരാറുകൾക്ക് പുതിയ കാലാവധി

കിയോസ്കുകൾ നിക്ഷേപത്തിനായി അനുവദിക്കുമ്പോൾ നിശ്ചിത യോഗ്യതകൾ പാലിക്കുന്ന അപേക്ഷകരിൽ ഏറ്റവും ഉയർന്ന തുക വാഗ്ദാനം ചെയ്യുന്നവർക്കായിരിക്കും കരാർ നൽകുക. കിയോസ്കിന്റെ വലുപ്പം, പ്രവർത്തന മേഖല, സ്ഥാനം എന്നിവ പരിഗണിച്ചായിരിക്കും അടിസ്ഥാന നിക്ഷേപ തുക നിശ്ചയിക്കുക.

അത്യാവശ്യ വിഭാഗത്തിലെ കിയോസ്കുകൾക്ക് മൂന്ന് വർഷത്തെ കരാറും സേവന വിഭാഗത്തിലുള്ളവയ്ക്ക് ഒരു വർഷത്തെ കരാറുമാണ് അനുവദിക്കുക. വ്യവസ്ഥകൾ പാലിക്കുന്ന പക്ഷം സമാന കാലയളവിലേക്ക് കരാർ പുതുക്കാനും സാധിക്കും.

50 ശതമാനം ചെറുകിട സംരംഭകർക്ക്

പുതിയ ഉത്തരവിലെ പ്രധാന വ്യവസ്ഥകളിലൊന്നാണ് ആകെ കിയോസ്കുകളുടെ കുറഞ്ഞത് 50 ശതമാനം ചെറുകിട സംരംഭകർക്ക് അനുവദിക്കണമെന്നത്. 2019-ലെ മന്ത്രിതല പ്രമേയം നമ്പർ 75/T-യും അതിന്റെ ഭേദഗതികളും അനുസരിച്ചായിരിക്കും ഈ നടപടി നടപ്പാക്കുക.

നിലവിലുള്ള കിയോസ്കുകൾക്ക് മൂന്ന് മാസം

നിലവിലുള്ള എല്ലാ കിയോസ്കുകളുടെയും വിവരങ്ങൾ ശേഖരിച്ച് മൂന്ന് മാസത്തിനകം മന്ത്രാലയത്തിന് വിശദമായ റിപ്പോർട്ട് സമർപ്പിക്കാൻ സഹകരണ സംഘങ്ങൾക്ക് നിർദേശം നൽകിയിട്ടുണ്ട്. ഓരോ കിയോസ്കിന്റെയും സ്ഥലം, വലുപ്പം, പ്രവർത്തനം, നിക്ഷേപകൻ, കരാർ വിവരങ്ങൾ, ലൈസൻസുകൾ എന്നിവ റിപ്പോർട്ടിൽ ഉൾപ്പെടുത്തണം.

പുതിയ വ്യവസ്ഥകൾ പാലിക്കാത്ത കിയോസ്കുകൾ നിയമാനുസൃതമാക്കാൻ കഴിയാത്ത സാഹചര്യത്തിൽ അവ നീക്കം ചെയ്യുകയോ പ്രവർത്തനം അവസാനിപ്പിക്കുകയോ വേണം. നിലവിൽ സാധുവായ കരാറുകൾ കാലാവധി തീരുന്നതുവരെ തുടരും. എന്നാൽ പുതിയ വ്യവസ്ഥകൾ പാലിക്കാത്ത കിയോസ്കുകൾക്ക് കരാർ പുതുക്കാൻ കഴിയില്ല. നിയമലംഘനങ്ങൾ കണ്ടെത്തിയാൽ ബന്ധപ്പെട്ടവർക്കെതിരെ നിയമനടപടികൾ സ്വീകരിക്കുമെന്നും മന്ത്രാലയം വ്യക്തമാക്കിയിട്ടുണ്ട്.

കൂടുതൽ കുവൈറ്റ് വാർത്തകൾക്ക് ചാനൽ ഇപ്പോൾ തന്നെ ഫോളോ ചെയ്യൂ

Related Posts

Leave a Reply

Your email address will not be published. Required fields are marked *

© 2026 Pravasi News Daily - WordPress Theme by WPEnjoy