Uae labour law:ദുബായ്: പ്രവാസികള്‍ ഉള്‍പ്പെടെ ദശലക്ഷക്കണക്കിന് ആളുകള്‍ യുഎഇയില്‍ താമസിക്കുകയും ജോലി ചെയ്യുകയും ചെയ്യുന്നുണ്ട്. എന്നാല്‍ സ്വകാര്യ മേഖലയിലെ തൊഴില്‍ നിയമങ്ങളെ കുറിച്ചും ജീവനക്കാര്‍ക്ക് നിയമം ഉറപ്പുനല്‍കുന്ന അവകാശങ്ങളെ കുറിച്ചും പലരും ബോധവാന്‍മാരല്ല. അതുകൊണ്ടുതന്നെ പലരും വലിയ ചൂഷണത്തിന് വിധേയരാവുന്നവരുമുണ്ട്. രാജ്യത്ത് താമസിക്കുന്ന മുഴുവന്‍ ജീവനക്കാരും അവരുടെ ഉത്തരവാദിത്തവും അവകാശങ്ങളെ കുറിച്ചും ബോധവാന്‍മാരാവേണ്ടതുണ്ടെന്ന് തൊഴില്‍ മന്ത്രാലയം അറിയിച്ചു.
യുഎഇയിലെ ജോലി സമയം – യുഎഇ തൊഴില്‍ നിയമത്തിലെ ആര്‍ട്ടിക്കിള്‍ 65 സ്വകാര്യ മേഖലയിലെ സാധാരണ ജോലി സമയം പ്രതിദിനം 8 മണിക്കൂറോ ആഴ്ചയില്‍ 48 മണിക്കൂറോ ആയി നിര്‍വചിച്ചിട്ടുണ്ട്. ദുഷ്‌കരമോ അനാരോഗ്യകരമോ ആയ ജോലികളിലും വ്യവസായങ്ങളിലും ഒരു ദിവസം 7 മണിക്കൂറില്‍ കൂടുതല്‍ ജോലി ചെയ്യുന്നത് നിരോധിച്ചിരിക്കുന്നു.
പ്രതിവാര അവധി- ഷാര്‍ജ സര്‍ക്കാര്‍ ജീവനക്കാര്‍ക്ക് ആഴ്ചയില്‍ മൂന്ന് ദിവസത്തെ അവധി നല്‍കിവരുന്നുണ്ട്. 2022ല്‍ നടത്തിയ ഒരു സര്‍വേയില്‍ 4 ദിവസത്തെ പ്രവൃത്തി ആഴ്ച നടപ്പിലാക്കിയതിനുശേഷം ജീവനക്കാര്‍ ഉല്‍പ്പാദനക്ഷമതയില്‍ 88 ശതമാനം വര്‍ധനവും ജോലി സംതൃപ്തിയില്‍ 90 ശതമാനം വര്‍ധനവും റിപ്പോര്‍ട്ട് ചെയ്തതായി കണ്ടെത്തി. മറ്റു എമിറേറ്റുകളില്‍ വെള്ളിയാഴ്ച ഉച്ചമുതല്‍ തിങ്കളാഴ്ച വരെയുള്ള ദിവസങ്ങള്‍ ലീവാണ്.
നോട്ടീസ് കാലയളവ് യുഎഇ തൊഴില്‍ നിയമപ്രകാരം, ‘കരാറില്‍ സമ്മതിച്ച നോട്ടീസ് കാലയളവ് പാലിക്കാന്‍ ഒരു ജീവനക്കാരന് ബാധ്യസ്ഥനാണെന്ന് നിയമം അനുശാസിക്കുന്നു. നോട്ടീസ് കാലയളവ് (30) മുപ്പത് ദിവസത്തില്‍ കുറയാത്തതും (90) തൊണ്ണൂറ് ദിവസത്തില്‍ കൂടുതലാകാത്തതുമായിരിക്കണമെന്നാണ് ചട്ടം.
അസുഖ അവധികള്‍- തൊഴില്‍ നിയമത്തിലെ ആര്‍ട്ടിക്കിള്‍ 31 (3) ല്‍ പരാമര്‍ശിച്ചിരിക്കുന്നതുപോലെ, യുഎഇയിലെ ഒരു ജീവനക്കാരന് 45 ദിവസത്തെ ശമ്പളത്തോടുകൂടിയ അസുഖ അവധിക്ക് (സിക്ക് ലീവ്) അര്‍ഹതയുണ്ട്.
ഓവര്‍ടൈം ജോലി- ജീവനക്കാരന് എടുക്കുന്ന ഓവര്‍ടൈം ജോലിയുടെ മണിക്കൂറുകളെ അടിസ്ഥാനമാക്കി, അടിസ്ഥാന ശമ്പളത്തിന്റെ 25 ശതമാനം അധിക ഓവര്‍ടൈം വേതനത്തിന് ഒരു ജീവനക്കാരന് അര്‍ഹതയുണ്ട്. എന്നാല്‍ അധിക സമയം ഒരു ദിവസം രണ്ട് മണിക്കൂറില്‍ കൂടുതല്‍ ആകാന്‍ പാടില്ല എന്നത് ശ്രദ്ധിക്കേണ്ടതാണ്.
ദുബായിലെ ഏറ്റവും കുറഞ്ഞ വേതനം – 2021 മുതല്‍, ആര്‍ട്ടിക്കിള്‍ (27), മന്ത്രിയുടെ നിര്‍ദേശത്തെ അടിസ്ഥാനമാക്കിയും ബന്ധപ്പെട്ട അധികാരികളുമായി ഏകോപിപ്പിച്ചും തൊഴിലാളികള്‍ക്കോ അതിന്റെ ഏതെങ്കിലും വിഭാഗത്തിനോ ഉള്ള ഏറ്റവും കുറഞ്ഞ വേതനം നിര്‍ണ്ണയിക്കാന്‍ മന്ത്രിസഭയ്ക്ക് ഒരു പ്രമേയം പുറപ്പെടുവിക്കാവുന്നതാണെന്നാണ് പറയുന്നത്.
ഉച്ചഭക്ഷണ ഇടവേള- യുഎഇയില്‍, ഒരു ജീവനക്കാരന് ജോലി സമയങ്ങള്‍ക്കിടയിലുള്ള ഇടവേളയ്ക്ക് അര്‍ഹതയുണ്ട്, അത് മൊത്തം ഒരു മണിക്കൂറില്‍ കുറയാത്തതായിരിക്കാം.
പിരിച്ചുവിടല്‍ വേതനം – തൊഴിലാളി കുറഞ്ഞത് ഒരു വര്‍ഷത്തെ തുടര്‍ച്ചയായ സേവനം പൂര്‍ത്തിയാക്കിയിട്ടുണ്ടെങ്കില്‍, അവരുടെ അടിസ്ഥാന വേതനത്തിന്റെ അടിസ്ഥാനത്തില്‍ അവര്‍ക്ക് ഗ്രാറ്റുവിറ്റിക്ക് അര്‍ഹതയുണ്ടെന്ന് സേവനാവസാന ആനുകൂല്യങ്ങള്‍ (ഗ്രാറ്റുവിറ്റി പേ) – ആര്‍ട്ടിക്കിള്‍ (51)ല്‍ പറയുന്നു. ആദ്യത്തെ അഞ്ച് വര്‍ഷത്തെ സേവനത്തിന് പ്രതിവര്‍ഷം 21 ദിവസത്തെ വേതനവും അഞ്ച് വര്‍ഷത്തിന് ശേഷമുള്ള ഓരോ അധിക വര്‍ഷത്തിനും പ്രതിവര്‍ഷം 30 ദിവസത്തെ വേതനവും നല്‍കണം. മൊത്തം ഗ്രാറ്റുവിറ്റി രണ്ട് വര്‍ഷത്തെ വേതനത്തില്‍ കവിയാന്‍ പാടില്ല. ഗ്രാറ്റുവിറ്റി കണക്കുകൂട്ടുമ്പോള്‍ ശമ്പളമില്ലാത്ത അവധി ദിവസങ്ങള്‍ കണക്കാക്കില്ല.
