Uae traffic law;ദുബായ്: യുഎഇയില്‍ ട്രാഫിക് സിഗ്നലുകളിലെ ചുവന്ന ലൈറ്റ് ലംഘിച്ച് വാഹനം ഓടിക്കുന്നത് അര ലക്ഷം ദിര്‍ഹം വരെ പിഴ ചുമത്താവുന്ന ഗുരുതര ഗതാഗത നിയമലംഘനമാണെന്ന് അധികൃതര്‍. അര ലക്ഷം ദിര്‍ഹം വരെ പിഴ നേരിടേണ്ടിവരുമെന്ന് മാത്രമല്ല, ഡ്രൈവിംഗ് ലൈസന്‍സിന് 12 ബ്ലാക്ക് പോയിന്റുകളും ലഭിക്കുകയും വാഹനം കുറഞ്ഞത് 30 ദിവസത്തേക്ക് കണ്ടുകെട്ടുകയും ചെയ്യുമെന്നും അധികൃതര്‍ വ്യക്തമാക്കി.
യുഎയിലെ വിവരങ്ങളെല്ലാം വിരല്‍ത്തുമ്പിലെത്താന്‍ ഈ ഗ്രൂപ്പിൽ അംഗമാവുക
https://chat.whatsapp.com/IXuNyAQ0lGeBzuRcaZal5K
യുഎഇ ട്രാഫിക് നിയമം അനുസരിച്ച്, ചുവപ്പ് ലൈറ്റ് അതിക്രമിച്ചുകടക്കുന്ന വാഹനങ്ങള്‍ക്ക് 1,000 ദിര്‍ഹം പിഴയും 12 ബ്ലാക്ക് പോയിന്റുകളും വാഹനം 30 ദിവസത്തേക്ക് കണ്ടുകെട്ടും. എന്നാല്‍ ഫെഡറല്‍ ട്രാഫിക് നിയമത്തിന് പുറമേ ഓരോ എമിറേറ്റിനും അതിന്റേതായ ട്രാഫിക് നിയന്ത്രണങ്ങളുണ്ട്. ഉദാഹരണത്തിന്, ദുബായില്‍, 2023 ലെ ഡിക്രി നമ്പര്‍ 30 പ്രകാരം, പോലിസ് പിടിച്ചെടുത്ത വാഹനം പവിട്ടുകിട്ടണമെങ്കില്‍ 50,000 ദിര്‍ഹം നല്‍കണം. ഇതേതുക തന്നെയാണ് പിടിച്ചെടുത്ത വാഹനം വിട്ടുകിട്ടാന്‍ അബൂദാബിയിലും നല്‍കേണ്ടത്. അബുദാബിയില്‍ വാഹനങ്ങള്‍ പിടിച്ചെടുക്കുന്നത് സംബന്ധിച്ച 2020 ലെ 5-ാം നമ്പര്‍ നിയമപ്രകാരമാണിത്.
അബൂദാബിയിലെ വാഹനം കണ്ടുകെട്ടുന്നതുമായി ബന്ധപ്പെട്ട നിയമപ്രകാരം വിവിധ നിയമലംഘനങ്ങള്‍ക്ക് വാഹനം പോലിസിന് പിടിച്ചെടുക്കാം. സിഗ്നലിലെ ചുവന്ന ലൈറ്റ് ലംഘിച്ചു പോകുന്നതാണ് ഇതില്‍ പ്രധാനം. അശ്രദ്ധമായ ഡ്രൈവിംഗ്, അവ്യക്തമായതോ മറച്ചതോ വികൃതമായതോ ആയ ലൈസന്‍സ് പ്ലേറ്റ് ഉപയോഗിച്ച് വാഹനമോടിക്കല്‍, റോഡ് റേസിംഗില്‍ ഏര്‍പ്പെടല്‍, ബോധപൂര്‍വം പോലീസ് വാഹനവുമായി കൂട്ടിയിടിക്കല്‍ തുടങ്ങിയവയാണ് വാഹനം പിടിച്ചെടുക്കാവുന്ന മറ്റ് ട്രാഫിക് ലംഘനങ്ങള്‍. അബുദാബി പോലീസ് പുറത്തുവിട്ട വിവരമനുസരിച്ച് ഡ്രൈവിങ്ങിനിടെ മൊബൈല്‍ ഫോണുകളുടെ ഉപയോഗമാണ് ചുവന്ന ലൈറ്റ് ചാടാനുള്ള പ്രധാന കാരണങ്ങളിലൊന്ന്.
മൊബൈല്‍ ഫോണുകളുടെ ഉപയോഗം നിരവധി ട്രാഫിക് ലംഘനങ്ങളിലേക്ക് നയിക്കുന്നതായി ഇതുമായി ബന്ധപ്പെട്ട് അബൂദാബി പോലിസ് നടത്തിയ പഠനത്തില്‍ വ്യക്തമായിരുന്നു. ലെയ്ന്‍ അച്ചടക്കം പാലിക്കാതിരിക്കുന്നതിലും പ്രധാന വില്ലന്‍ മൊബൈല്‍ തന്നെ. ബ്ലൂടൂത്ത് ഉപകരണങ്ങള്‍ പോലുള്ള ഹാന്‍ഡ്‌സ്-ഫ്രീ ഉപകരണം ഉപയോഗിക്കുമ്പോള്‍ പോലും ഇത് പ്രതികരണ സമയം 35 ശതമാനം കുറയ്ക്കുന്നതായി പഠനത്തില്‍ വ്യക്തമായി. യുഎഇയില്‍, ഡ്രൈവിങ്ങിനിടെ മൊബൈല്‍ ഫോണ്‍ ഉപയോഗിച്ചാല്‍ കുറഞ്ഞത് 400 ദിര്‍ഹം പിഴയും നാല് ബ്ലാക്ക് പോയിന്റുകളുമാണ് ശിക്ഷ. ദുബായില്‍, ഈ കുറ്റത്തിന് വാഹനം 30 ദിവസത്തേക്ക് കണ്ടുകെട്ടുകയും ചെയ്യും.
അതേസമയം, സിഗ്നലിലെ ചുവന്ന ലൈറ്റ് ചാടുന്നത് മാരകമായ അപകടത്തിലേക്ക് നയിച്ചാല്‍ ശിക്ഷ ഇതിലും കൂടുതലാണ്. യുഎഇയുടെ പുതിയ ട്രാഫിക് നിയമത്തിലെ ആര്‍ട്ടിക്കിള്‍ 40 അനുസരിച്ച്, റോഡില്‍ വാഹനം ഉപയോഗിച്ചതിന്റെ ഫലമായി സ്വന്തം തെറ്റ് കൊണ്ട് ഒരാളുടെ മരണത്തിന് കാരണമായാല്‍, തടവും 50,000 ദിര്‍ഹത്തില്‍ കുറയാത്ത പിഴയും ശിക്ഷയായി ലഭിക്കും. അതേസമയം, റെഡ് സിഗ്നല്‍ ലംഘിച്ചതാണ് മരണത്തിലേക്ക് നയിച്ച അപകടകാരണെങ്കില്‍ ശിക്ഷ വീണ്ടും കൂടും. ഒരു വര്‍ഷത്തെ തടവും 100,000 ദിര്‍ഹം പിഴയും ആയാണ് ഇത് വര്‍ദ്ധിക്കുക. മദ്യപിച്ചോ മയക്കുമരുന്ന് ഉപയോഗിച്ചോ വാഹനമോടിക്കുക, സസ്‌പെന്‍ഡ് ചെയ്തതോ റദ്ദാക്കിയതോ ആയ ഡ്രൈവിംഗ് ലൈസന്‍സ് ഉപയോഗിച്ച് വാഹനം ഓടിക്കുക, വെള്ളപ്പൊക്കത്തില്‍ താഴ്വരയില്‍ വാഹനമോടിക്കുക തുടങ്ങിയ കുറ്റങ്ങള്‍ക്കും ഇതേശിക്ഷയാണ് ലഭിക്കുക.