Kuwait outdoor work ban കുവൈത്ത് സിറ്റി: കുവൈറ്റിൽ കടുത്ത വേനൽ ചൂടിനെ തുടർന്ന് ഏർപ്പെടുത്തിയിരുന്ന തുറസ്സായ സ്ഥലങ്ങളിലെ ജോലി നിരോധനം അവസാനിപ്പിച്ചതായി പബ്ലിക് അതോറിറ്റി ഫോർ മാൻപവർ (PAM) അറിയിച്ചു.

2026 ജൂൺ 1 മുതൽ ഓഗസ്റ്റ് 31 വരെയായിരുന്നു നിരോധനം. ഈ കാലയളവിൽ എല്ലാ ദിവസവും രാവിലെ 11 മുതൽ വൈകിട്ട് 4 വരെ നേരിട്ട് സൂര്യപ്രകാശം ഏൽക്കുന്ന തുറസ്സായ സ്ഥലങ്ങളിൽ ജോലി ചെയ്യുന്നത് നിരോധിച്ചിരുന്നു.

കുവൈറ്റിലെ പുതിയ തൊഴിൽ അവസരങ്ങൾ അറിയാൻ ഇവിടെ ക്ലിക്ക് ചെയ്യൂ

കടുത്ത ചൂടിൽ നിന്ന് തൊഴിലാളികളെ സംരക്ഷിക്കുന്നതിനും ഏറ്റവും ചൂടേറിയ സമയങ്ങളിൽ സുരക്ഷിതമായ തൊഴിൽ സാഹചര്യം ഉറപ്പാക്കുന്നതിനുമാണ് നിയന്ത്രണം ഏർപ്പെടുത്തിയിരുന്നത്.

നിരോധനം അവസാനിച്ചെങ്കിലും തൊഴിലാളികളുടെ സുരക്ഷ ഉറപ്പാക്കുന്നതിനായി പരിശോധനകൾ തുടരുമെന്ന് PAM വ്യക്തമാക്കി. തൊഴിൽ സുരക്ഷാ, ആരോഗ്യ നിയമങ്ങൾ പാലിക്കുന്നുണ്ടോയെന്ന് അധികൃതർ പരിശോധിക്കും. നിയമലംഘനം കണ്ടെത്തിയാൽ ആവശ്യമായ നടപടികൾ സ്വീകരിക്കുമെന്നും അതോറിറ്റി അറിയിച്ചു.

കുവൈറ്റ് ഫർവാനിയയിൽ പാർക്ക് ചെയ്തിരുന്ന വാഹനങ്ങൾക്ക് തീപിടിച്ചു

Kuwait Greeshma Staff Editor — September 1, 2026 · 0 Comment

Kuwait Farwaniya car fire : കുവൈത്തിലെ ഫർവാനിയയിൽ തുറസ്സായ സ്ഥലത്ത് പാർക്ക് ചെയ്തിരുന്ന നിരവധി വാഹനങ്ങൾക്ക് തീപിടിച്ചു. ചൊവ്വാഴ്ച പുലർച്ചെയാണ് തീപിടിത്തമുണ്ടായത്. സംഭവത്തിൽ നിരവധി കാറുകൾക്ക് കേടുപാടുകൾ സംഭവിച്ചു.

വിവരം ലഭിച്ചതിനെ തുടർന്ന് ഫർവാനിയ ഫയർ സ്റ്റേഷനിൽ നിന്നുള്ള അഗ്നിശമന സേനാംഗങ്ങൾ ഉടൻ സ്ഥലത്തെത്തി. തുടർന്ന് നടത്തിയ രക്ഷാപ്രവർത്തനത്തിലൂടെ തീ നിയന്ത്രണവിധേയമാക്കുകയും സമീപത്തെ മറ്റ് വാഹനങ്ങളിലേക്കും പ്രദേശങ്ങളിലേക്കും തീ പടരുന്നത് തടയുകയും ചെയ്തു.

തീപിടിത്തത്തിൽ ആർക്കും പരിക്കേറ്റിട്ടില്ലെന്ന് ജനറൽ ഫയർ ഫോഴ്സ് അറിയിച്ചു. അതേസമയം, തീപിടിത്തത്തിന്റെ കാരണം വ്യക്തമല്ല. സംഭവത്തിന്റെ കാരണം കണ്ടെത്തുന്നതിനായി അധികൃതർ അന്വേഷണം ആരംഭിച്ചിട്ടുണ്ട്.

കുവൈത്തിൽ പൊതുവിടങ്ങളിൽ പുകവലിച്ചാൽ എന്ത് സംഭവിക്കും ? കേസ് രജിസ്റ്റർ ചെയ്യും, പരിശോധന ശക്തമാക്കി

Kuwait Greeshma Staff Editor — September 1, 2026 · 0 Comment

Kuwait smoking fine കുവൈത്ത് സിറ്റി: പൊതുസ്ഥലങ്ങളിലും പുകവലി നിരോധിച്ച മേഖലകളിലും നിയമം ലംഘിച്ച് പുകവലിക്കുന്നവർക്കെതിരെ കുവൈത്തിൽ പരിശോധന ശക്തമാക്കി. അൽ മുബാറക്കിയ മാർക്കറ്റിൽ പരിസ്ഥിതി പൊലീസ് നടത്തിയ പ്രത്യേക പരിശോധനയിൽ 30 പുകവലി നിയമലംഘനങ്ങൾ കണ്ടെത്തി.

സെക്യൂരിറ്റി ഡയറക്ടറേറ്റ്സ് അഫയേഴ്‌സ് വിഭാഗത്തിന് കീഴിലുള്ള പരിസ്ഥിതി പൊലീസ് നടത്തിയ പരിശോധനയിലാണ് അടച്ചിട്ടതും ഭാഗികമായി അടച്ചിട്ടതുമായ നിരോധിത സ്ഥലങ്ങളിൽ പുകവലിച്ചതിന് 30 കേസുകൾ രജിസ്റ്റർ ചെയ്തത്.

ഇതിന് പുറമെ പൊതുസ്ഥലത്ത് മാലിന്യം വലിച്ചെറിഞ്ഞതിന് ഒരു കേസും, സ്ഥാപനത്തിനുള്ളിൽ ഉപഭോക്താക്കളെ പുകവലിക്കാൻ അനുവദിച്ചതിന് ഒരു സ്ഥാപനത്തിനെതിരെയും നടപടി സ്വീകരിച്ചു.

പരിസ്ഥിതി സംരക്ഷണ നിയമം കർശനമായി നടപ്പാക്കുന്നതിന്റെയും നിയമവിരുദ്ധ പ്രവർത്തനങ്ങൾ തടയുന്നതിന്റെയും ഭാഗമായാണ് പരിശോധന നടത്തിയതെന്ന് കുവൈത്ത് ആഭ്യന്തര മന്ത്രാലയം അറിയിച്ചു. പൊതുസ്ഥലങ്ങളുടെ ശുചിത്വവും രാജ്യത്തിന്റെ സാംസ്കാരിക ഭംഗിയും സംരക്ഷിക്കുകയാണ് പരിശോധനയുടെ മറ്റൊരു ലക്ഷ്യം.

പുകവലിച്ചാൽ 100 ദിനാർ വരെ പിഴ

അടച്ചിട്ടതോ ഭാഗികമായി അടച്ചിട്ടതോ ആയ നിരോധിത സ്ഥലങ്ങളിൽ പുകവലിക്കുന്നവർക്ക് 50 മുതൽ 100 കുവൈത്ത് ദിനാർ വരെ പിഴ ചുമത്താം.

സ്ഥാപനത്തിനുള്ളിൽ ഉപഭോക്താക്കളെ പുകവലിക്കാൻ അനുവദിക്കുന്ന സ്ഥാപനങ്ങൾക്ക് 1,000 മുതൽ 5,000 കുവൈത്ത് ദിനാർ വരെ പിഴ ലഭിക്കുമെന്നും അധികൃതർ വ്യക്തമാക്കി.

പൊതുസ്ഥലങ്ങളിൽ മാലിന്യം വലിച്ചെറിയുന്നവർക്കും നടപടി നേരിടേണ്ടിവരും. ഇത്തരം നിയമലംഘനങ്ങൾക്ക് 50 മുതൽ 500 കുവൈത്ത് ദിനാർ വരെ പിഴ ചുമത്താം.

പരിസ്ഥിതി സംരക്ഷണ നിയമങ്ങൾ എല്ലാവരും കർശനമായി പാലിക്കണമെന്ന് ആഭ്യന്തര മന്ത്രാലയം ആവശ്യപ്പെട്ടു. നിരോധിത സ്ഥലങ്ങളിൽ പുകവലിക്കുന്നതും പൊതുസ്ഥലങ്ങളിൽ മാലിന്യം വലിച്ചെറിയുന്നതും ഒഴിവാക്കി നിയമനടപടികളും പിഴയും ഒഴിവാക്കണമെന്നും അധികൃതർ പൊതുജനങ്ങളോട് അഭ്യർഥിച്ചു.

ഇൻസ്റ്റലേഷൻ ഫീസ്, ദിവസവും 2 KD; കുവൈത്തിലെ പുതിയ ഹോം ഇംപൗണ്ട്മെന്റ് സംവിധാനം

Kuwait Greeshma Staff Editor — September 1, 2026 · 0 Comment

Kuwait traffic fines 2026 കുവൈത്ത് സിറ്റി, സെപ്റ്റംബർ 1: ഗതാഗത നിയമലംഘനങ്ങൾക്ക് ഇംപൗണ്ട്മെന്റ് ശിക്ഷ ലഭിക്കുന്ന വാഹനങ്ങൾക്കായി കുവൈത്തിൽ പുതിയ സ്മാർട്ട് ഹോം ഇംപൗണ്ട്മെന്റ് സംവിധാനം സെപ്റ്റംബർ 6 മുതൽ നിലവിൽ വരും. ആഭ്യന്തര മന്ത്രാലയത്തിന്റെ നിർദേശപ്രകാരം ജനറൽ ട്രാഫിക് ഡിപ്പാർട്ട്‌മെന്റാണ് സംവിധാനം നടപ്പാക്കുന്നത്.

പുതിയ സംവിധാനത്തിലൂടെ നിയമലംഘനം നടന്ന സ്ഥലത്തുവെച്ചുതന്നെ വാഹനത്തിൽ പ്രത്യേക സ്മാർട്ട് ഇംപൗണ്ട്മെന്റ് ഉപകരണം സ്ഥാപിക്കും. ഇംപൗണ്ട്മെന്റ് കാലാവധി അതേ ദിവസം രാത്രി 12 മണിക്ക് ആരംഭിക്കും.

തുടർന്ന് വാഹന ഉടമയ്ക്ക് വാഹനം വീട്ടിൽ ഇംപൗണ്ട് ചെയ്യുന്നതിനായി നിശ്ചയിച്ച സ്ഥലത്തേക്ക് മാറ്റാൻ സമയം ലഭിക്കും. വാഹനത്തിന്റെ ചലനം നിരീക്ഷിക്കാൻ സ്ഥാപിക്കുന്ന സ്മാർട്ട് ഉപകരണം ഉപയോഗിക്കും.

എത്രയാണ് ഫീസ്?

സ്മാർട്ട് ഇംപൗണ്ട്മെന്റ് ഉപകരണം സ്ഥാപിക്കുന്നതിന് 10 കുവൈത്ത് ദിനാർ ഫീസ് നൽകണം. ഇതിന് പുറമെ വാഹനത്തിന്റെ ഹോം ഇംപൗണ്ട്മെന്റിന് പ്രതിദിനം 2 കുവൈത്ത് ദിനാർ ചാർജ് ഈടാക്കും.

ഗാരേജിൽ കിടക്കുന്ന വാഹനങ്ങൾക്കും സൗകര്യം

നിലവിൽ ട്രാഫിക് ഇംപൗണ്ട്മെന്റ് ഗാരേജുകളിൽ തടഞ്ഞുവച്ചിരിക്കുന്ന വാഹനങ്ങളെയും പുതിയ സംവിധാനത്തിലേക്ക് മാറ്റാൻ കഴിയും. ഇത്തരത്തിലുള്ള വാഹനങ്ങൾക്ക് ആവശ്യമായ ഇംപൗണ്ട്മെന്റ് കാലാവധിയുടെ ബാക്കി സമയം വീട്ടിൽ തന്നെ പൂർത്തിയാക്കാം.

ഇംപൗണ്ട്മെന്റ് കാലാവധി അവസാനിച്ചാൽ വാഹന ഉടമയ്ക്ക് സഹേൽ ആപ്ലിക്കേഷൻ വഴി അറിയിപ്പ് ലഭിക്കും. തുടർന്ന് ജനറൽ ട്രാഫിക് ഡിപ്പാർട്ട്‌മെന്റ് നിർദേശിക്കുന്ന കേന്ദ്രങ്ങളിൽ ഒന്നിൽ എത്തി വാഹനം വിട്ടുകിട്ടുന്നതിനുള്ള നടപടികൾ പൂർത്തിയാക്കണം.

ഗതാഗത സേവനങ്ങൾ കൂടുതൽ ആധുനികമാക്കുകയും നടപടിക്രമങ്ങൾ ലളിതമാക്കുകയും വാഹന ഉടമകൾക്ക് മികച്ച സേവനം നൽകുകയും ചെയ്യുന്നതാണ് പുതിയ സംവിധാനത്തിന്റെ ലക്ഷ്യമെന്ന് ജനറൽ ട്രാഫിക് ഡിപ്പാർട്ട്‌മെന്റ് അറിയിച്ചു.

റോഡ് സുരക്ഷ ഉറപ്പാക്കുന്നതിനായി ഗതാഗത നിയമങ്ങൾ കൃത്യമായി പാലിക്കണമെന്നും നിയമലംഘനങ്ങൾ ഒഴിവാക്കണമെന്നും ഡ്രൈവർമാരോട് അധികൃതർ ആവശ്യപ്പെട്ടു. സ്വന്തം സുരക്ഷയ്ക്കൊപ്പം മറ്റ് റോഡ് ഉപയോക്താക്കളുടെ സുരക്ഷയും ഉറപ്പാക്കാൻ എല്ലാവരും ജാഗ്രത പാലിക്കണമെന്നും വകുപ്പ് വ്യക്തമാക്കി.

അറിഞ്ഞോ?കുവൈത്തിൽ ഓൺലൈൻ ഡെലിവറി ആപ്പുകൾക്ക് പുതിയ നിയമം

Kuwait Drisya Staff Editor — September 1, 2026 · 0 Comment

Kuwait Introduces New Rules for Online Delivery Apps കുവൈത്ത് സിറ്റി: കുവൈത്തിൽ ഓൺലൈൻ ഡെലിവറി പ്ലാറ്റ്‌ഫോമുകളുടെ പ്രവർത്തനത്തിന് പുതിയ നിയന്ത്രണങ്ങൾ നിലവിൽ വന്നു. സെപ്റ്റംബർ 1 മുതൽ പ്രാബല്യത്തിൽ വന്ന നിയമം ഡെലിവറി മേഖലയിലെ അധിക ഫീസുകളും കമ്മിഷൻ നിരക്കുകളും നിയന്ത്രിക്കുന്നതിനാണ് ലക്ഷ്യമിടുന്നത്.

കുവൈറ്റിലെ പുതിയ തൊഴിൽ അവസരങ്ങൾ അറിയാൻ ഇവിടെ ക്ലിക്ക് ചെയ്യൂ

ഉപഭോക്താക്കളെയും വിവിധ വ്യാപാര സ്ഥാപനങ്ങളെയും തമ്മിൽ ബന്ധിപ്പിക്കുന്ന തേഡ് പാർട്ടി ഓൺലൈൻ ഡെലിവറി പ്ലാറ്റ്‌ഫോമുകൾക്കാണ് പുതിയ നിയന്ത്രണങ്ങൾ പ്രധാനമായും ബാധകമാകുന്നത്.പുതിയ വ്യവസ്ഥ പ്രകാരം ഇത്തരം പ്ലാറ്റ്‌ഫോമുകൾ വഴി നടത്തുന്ന ഓർഡറുകളുടെ ഡെലിവറി ഫീസ് പരമാവധി ഒരു കുവൈത്തി ദിനാർ മാത്രമായിരിക്കും. വ്യാപാര സ്ഥാപനങ്ങളിൽ നിന്ന് ഈടാക്കാവുന്ന കമ്മിഷൻ 10 ശതമാനം മുതൽ 17 ശതമാനം വരെ ആയി നിശ്ചയിച്ചിട്ടുണ്ട്.

ഇതിന് പുറമെ, പ്രവർത്തന ഫീസ്, പ്രോസസിങ് ഫീസ്, അഡ്മിനിസ്‌ട്രേറ്റീവ് സർചാർജ് തുടങ്ങിയ വിവിധ പേരുകളിൽ അധിക തുകകൾ ഈടാക്കുന്നതിനും നിയന്ത്രണം ഏർപ്പെടുത്തിയിട്ടുണ്ട്.അതേസമയം, സ്വന്തം വെബ്സൈറ്റുകളിലൂടെയോ സ്വന്തം മൊബൈൽ ആപ്പിലൂടെയോ ഉപഭോക്താക്കളിൽ നിന്ന് ഓർഡറുകൾ സ്വീകരിച്ച് സ്വന്തം ഉൽപന്നങ്ങൾ നേരിട്ട് വിതരണം ചെയ്യുന്ന റസ്റ്ററന്റുകൾ ഉൾപ്പെടെയുള്ള സ്ഥാപനങ്ങൾക്ക് ഈ നിയന്ത്രണങ്ങൾ ബാധകമല്ല.

ഡെലിവറി സേവന മേഖലയിലെ ഫീസ് ഘടന കൂടുതൽ സുതാര്യമാക്കുന്നതിനും ഉപഭോക്താക്കൾക്കും വ്യാപാര സ്ഥാപനങ്ങൾക്കും ഉണ്ടാകുന്ന അധിക സാമ്പത്തിക ബാധ്യത കുറയ്ക്കുന്നതിനുമാണ് പുതിയ നിയന്ത്രണങ്ങൾ ലക്ഷ്യമിടുന്നത്.

Kuwait crime news ജോലി സംബന്ധമായ തർക്കം; സഹപ്രവർത്തകനെ കുത്തിക്കൊന്ന കേസിൽ ഇന്ത്യൻ പ്രവാസി പിടിയിൽ

Kuwait Greeshma Staff Editor — September 1, 2026 · 0 Comment

Kuwait crime news കുവൈത്ത് സിറ്റി, ഓഗസ്റ്റ് 31: ജോലി സംബന്ധമായ തർക്കത്തെ തുടർന്ന് സഹപ്രവർത്തകനായ ഇന്ത്യൻ പ്രവാസിയെ കുത്തിക്കൊലപ്പെടുത്തിയ കേസിൽ മറ്റൊരു ഇന്ത്യൻ പ്രവാസിയെ ജഹ്റ ഡിറ്റക്ടീവുകൾ പിടികൂടി പബ്ലിക് പ്രോസിക്യൂഷന് കൈമാറി.അൽ-അൻബാ റിപ്പോർട്ട് ചെയ്തതനുസരിച്ച്, അൽ-അബ്ദാലി മേഖലയിലെ ഒരു ഫാമിൽ അക്രമസംഭവം നടന്നതായി ആഭ്യന്തര മന്ത്രാലയത്തിന്റെ ഓപ്പറേഷൻസ് റൂമിൽ വിവരം ലഭിച്ചു.വിവരമറിഞ്ഞ് സുരക്ഷാ ഉദ്യോഗസ്ഥർ സ്ഥലത്തെത്തിയപ്പോൾ 1992ൽ ജനിച്ച ഇന്ത്യൻ പ്രവാസിയെ ഒന്നിലധികം കുത്തേറ്റ നിലയിൽ മരിച്ച നിലയിൽ കണ്ടെത്തി.

പ്രാഥമിക അന്വേഷണത്തിൽ 1996ൽ ജനിച്ച മറ്റൊരു ഇന്ത്യൻ പൗരൻ സംഭവത്തിന് ശേഷം സ്ഥലത്തുനിന്ന് രക്ഷപ്പെട്ടതായി കണ്ടെത്തി. തുടർന്ന് ജഹ്റ ഡിറ്റക്ടീവുകൾ നടത്തിയ അന്വേഷണത്തിൽ പ്രതി സമീപത്തെ മറ്റൊരു ഫാമിൽ ഒളിച്ചിരിക്കുന്നതായി കണ്ടെത്തുകയും പിടികൂടുകയും ചെയ്തു.ചോദ്യം ചെയ്യലിൽ കൊലപാതകം നടത്തിയതായി പ്രതി സമ്മതിച്ചതായാണ് റിപ്പോർട്ട്. നേരത്തെ ഇരയും പ്രതിയും തമ്മിൽ ഉണ്ടായിരുന്ന അഭിപ്രായവ്യത്യാസം പിന്നീട് തർക്കമായി മാറുകയായിരുന്നുവെന്നും അന്വേഷണത്തിൽ വ്യക്തമായി.

കൊലപാതകത്തിന് ഉപയോഗിച്ചതായി കരുതുന്ന കത്തിയും പ്രതിയുടെ മൊഴിയും ഉൾപ്പെടെയുള്ള തെളിവുകൾ ശേഖരിച്ച ശേഷം കേസ് പബ്ലിക് പ്രോസിക്യൂഷന് കൈമാറി. സംഭവത്തിൽ കൂടുതൽ നിയമനടപടികൾ തുടരും.

കുവൈറ്റിൽ മയക്കുമരുന്ന്, സൗന്ദര്യവർദ്ധക ശസ്ത്രക്രിയ എന്നിവയ്ക്കുള്ള നിയന്ത്രണങ്ങൾ കർശനമാക്കി

Kuwait Greeshma Staff Editor — September 1, 2026 · 0 Comment

Kuwait drug control regulations കുവൈത്ത് സിറ്റി, ഓഗസ്റ്റ് 31: മയക്കുമരുന്നുകളും സൈക്കോട്രോപിക് വസ്തുക്കളും നിയന്ത്രിക്കുന്നതിനും ആരോഗ്യ മേഖലയിലെ വിവിധ നടപടികൾ കാര്യക്ഷമമാക്കുന്നതിനുമായി കുവൈത്ത് ആരോഗ്യ മന്ത്രാലയം പുതിയ ഉത്തരവുകൾ പുറത്തിറക്കി. ആരോഗ്യ മന്ത്രി ഡോ. അഹമ്മദ് അൽ-അവാദിയാണ് ഉത്തരവുകൾ പുറപ്പെടുവിച്ചത്.

ആരോഗ്യ മന്ത്രാലയത്തിന്റെ പ്രത്യേക ലൈസൻസോടെ മാത്രമേ മയക്കുമരുന്ന് സസ്യങ്ങൾ കൃഷി ചെയ്യാൻ അനുമതിയുണ്ടാകൂ. മെഡിക്കൽ ആവശ്യങ്ങൾക്കും ശാസ്ത്രീയ ഗവേഷണത്തിനുമായി നിർദ്ദിഷ്ട സ്ഥാപനങ്ങൾക്ക് മാത്രമായിരിക്കും ഈ അനുമതി നൽകുക.

കൃഷിക്ക് ലൈസൻസ് നേടൽ, രേഖകൾ സൂക്ഷിക്കൽ, വിത്തുകളുടെ നിയന്ത്രണം, സസ്യസംരക്ഷണം, സസ്യങ്ങളുടെ നീക്കം നിരീക്ഷിക്കൽ, സ്ഥലത്തിന്റെ സുരക്ഷ, തുടർച്ചയായ പരിശോധന എന്നിവയ്ക്കുള്ള നടപടികളും ഉത്തരവിൽ വ്യക്തമാക്കിയിട്ടുണ്ട്. വിള നശിക്കുകയോ കേടുപാടുകൾ സംഭവിക്കുകയോ ചെയ്താൽ അതുമായി ബന്ധപ്പെട്ട റിപ്പോർട്ടുകളും സമർപ്പിക്കണം.

അന്താരാഷ്ട്ര വിമാനങ്ങളിലും കപ്പലുകളിലും സൈക്കോട്രോപിക് മരുന്നുകൾ കൈവശം വയ്ക്കുന്നതും വിതരണം ചെയ്യുന്നതും സംബന്ധിച്ചും പുതിയ നിയന്ത്രണങ്ങൾ ഏർപ്പെടുത്തി. പ്രഥമശുശ്രൂഷയ്ക്കും അടിയന്തര സാഹചര്യങ്ങൾക്കും ആവശ്യമായ അളവ് മാത്രമേ അനുവദിക്കൂ. ഇവയുടെ ഉപയോഗം ലൈസൻസുള്ള ആരോഗ്യപ്രവർത്തകരോ പരിശീലനം ലഭിച്ച പ്രഥമശുശ്രൂഷാ ജീവനക്കാരോ മാത്രമായി പരിമിതപ്പെടുത്തും.

മരുന്നുകളുടെ സംഭരണം, വിതരണം, രേഖപ്പെടുത്തൽ, നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്താൽ സ്വീകരിക്കേണ്ട നടപടികൾ എന്നിവയും പുതിയ നിയമത്തിൽ വ്യക്തമാക്കിയിട്ടുണ്ട്.

മയക്കുമരുന്ന് അല്ലെങ്കിൽ സൈക്കോട്രോപിക് വസ്തുക്കൾ അടങ്ങിയ മരുന്നുകളുടെ ഉത്പാദനവും നിർമ്മാണവും ലൈസൻസുള്ള ഫാർമസ്യൂട്ടിക്കൽ ഫാക്ടറികൾക്ക് മാത്രമായി പരിമിതപ്പെടുത്തി. ഇത്തരം മരുന്നുകളുടെ രജിസ്ട്രേഷൻ, സംഭരണം, വിതരണം, സ്റ്റോക്ക് പരിശോധന, ട്രാക്കിംഗ്, റിപ്പോർട്ടിംഗ് എന്നിവയും കർശനമായി നിരീക്ഷിക്കും.

ഇതിനുപുറമെ, ആരോഗ്യ മന്ത്രാലയത്തിന് കീഴിൽ ‘കസ്റ്റംസ് ഫോളോ-അപ്പ് ആൻഡ് കോർഡിനേഷൻ വകുപ്പ്’ സ്ഥാപിച്ചു. മെഡിക്കൽ കയറ്റുമതികളുടെയും വിതരണങ്ങളുടെയും കസ്റ്റംസ് നടപടികൾ വേഗത്തിലാക്കുകയാണ് പ്രധാന ലക്ഷ്യം.

കസ്റ്റംസ് ജനറൽ അഡ്മിനിസ്ട്രേഷനുമായും മറ്റ് ബന്ധപ്പെട്ട വകുപ്പുകളുമായും കൂടുതൽ ഏകോപനം ഉറപ്പാക്കുകയും മെഡിക്കൽ കയറ്റുമതിയുമായി ബന്ധപ്പെട്ട വിവരങ്ങളും സ്ഥിതിവിവരക്കണക്കുകളും സൂക്ഷിക്കുകയും ചെയ്യുന്നതും പുതിയ വകുപ്പിന്റെ ചുമതലയായിരിക്കും.

മത്സ്യ ഉത്പാദനത്തിൽ വളർച്ച ലക്ഷ്യമിട്ട് കുവൈറ്റ്; അത്യാധുനിക ഹാച്ചറി തുറന്നു

Kuwait Drisya Staff Editor — September 1, 2026 · 0 Comment

Kuwait Aims to Boost Fish Production കുവൈത്ത്: രാജ്യത്തെ ആദ്യത്തെ അത്യാധുനിക സമുദ്ര മത്സ്യ ഹാച്ചറി കുവൈത്ത് ഇൻസ്റ്റിറ്റ്യൂട്ട് ഫോർ സയന്റിഫിക് റിസർച്ച് (KISR) തിങ്കളാഴ്ച തുറന്നു. സാൽമിയയിലെ മറൈൻ റിസർച്ച് സ്റ്റേഷനിലാണ് പുതിയ ഹാച്ചറി പ്രവർത്തനം ആരംഭിച്ചത്.

ഗവേഷണ-സാങ്കേതിക പ്രവർത്തനങ്ങൾ ശക്തിപ്പെടുത്തുന്നതിനും രാജ്യത്തിന്റെ വികസനത്തിനും ഭക്ഷ്യസുരക്ഷയ്ക്കും പിന്തുണ നൽകുന്നതിനുമുള്ള സുപ്രധാന ചുവടുവയ്പ്പാണിതെന്ന് KISR ഡയറക്ടർ ജനറൽ ഡോ. ഫൈസൽ അൽ ഹുമൈദാൻ പറഞ്ഞു.

ഹാച്ചറിയുടെ പ്രാധാന്യം അത്യാധുനിക സാങ്കേതികവിദ്യയിൽ മാത്രമല്ലെന്നും, മത്സ്യകൃഷി മേഖലയിൽ ഇൻസ്റ്റിറ്റ്യൂട്ട് വർഷങ്ങളായി നേടിയ ഗവേഷണ-സാങ്കേതിക പരിജ്ഞാനം ഉൽപാദനത്തെ പിന്തുണയ്ക്കുന്ന സമഗ്ര സംവിധാനമാക്കി മാറ്റുന്നതിലും ഇതിന് നിർണായക പങ്കുണ്ടെന്നും അദ്ദേഹം വ്യക്തമാക്കി. സാങ്കേതികവിദ്യ കൈമാറുന്നതിനും നിക്ഷേപകരുമായി പങ്കാളിത്തം വികസിപ്പിക്കുന്നതിനും പുതിയ ഹാച്ചറി അവസരമൊരുക്കുമെന്നും അദ്ദേഹം കൂട്ടിച്ചേർത്തു.

മത്സ്യകൃഷി മേഖലയിൽ കുവൈത്ത് ഇൻസ്റ്റിറ്റ്യൂട്ടിന് പതിറ്റാണ്ടുകളുടെ ഗവേഷണ-സാങ്കേതിക പരിചയമുണ്ട്. സാമ്പത്തികമായി പ്രധാനപ്പെട്ട നിരവധി സമുദ്ര മത്സ്യ ഇനങ്ങളുടെ പ്രജനന-പരിപാലന സാങ്കേതികവിദ്യകൾ വികസിപ്പിക്കാനും കുഞ്ഞുമത്സ്യങ്ങളുടെ (fingerlings) ഉൽപാദനം മെച്ചപ്പെടുത്താനും അവയെ പ്രാദേശിക കാലാവസ്ഥയുമായി പൊരുത്തപ്പെടുത്താനും ഇൻസ്റ്റിറ്റ്യൂട്ടിന് കഴിഞ്ഞിട്ടുണ്ട്.

കുവൈറ്റിലെ പുതിയ തൊഴിൽ അവസരങ്ങൾ അറിയാൻ ഇവിടെ ക്ലിക്ക് ചെയ്യൂ

പുതിയ ഹാച്ചറിയിൽ ഏറ്റവും പുതിയ സാങ്കേതികവിദ്യകളാണ് ഉപയോഗിച്ചിരിക്കുന്നത്. മാതൃമത്സ്യങ്ങളുടെ പരിപാലനം, മുട്ട ഉൽപാദനം, ജീവനുള്ള തീറ്റയുടെ ഉൽപാദനം, മുട്ട വിരിയിക്കൽ, കുഞ്ഞുമത്സ്യങ്ങളുടെ ഉൽപാദനം എന്നിവയ്ക്കൊപ്പം ക്വാറന്റൈൻ സൗകര്യങ്ങളും കടൽജല ശുദ്ധീകരണ-പുനരുപയോഗ സംവിധാനങ്ങളും ഇവിടെ ഒരുക്കിയിട്ടുണ്ട്.

ഭക്ഷ്യസുരക്ഷയ്ക്ക് കരുത്തേകും

രാജ്യത്തിന്റെ ഭക്ഷ്യസുരക്ഷ ശക്തിപ്പെടുത്തുന്നതിനും ഇറക്കുമതി ചെയ്യുന്ന മത്സ്യക്കുഞ്ഞുങ്ങളെ ആശ്രയിക്കുന്നത് കുറയ്ക്കുന്നതിനും പുതിയ ഹാച്ചറി സഹായിക്കുമെന്ന് അൽ ഹുമൈദാൻ പറഞ്ഞു.

നിലവിൽ കുവൈത്തിലെ പ്രാദേശിക മത്സ്യസ്രോതസ്സുകൾ രാജ്യത്തിന്റെ മൊത്തം മത്സ്യാവശ്യത്തിന്റെ ഏകദേശം 30 ശതമാനം മാത്രമാണ് നിറവേറ്റുന്നത്. ബാക്കിയുള്ള ആവശ്യകത ഇറക്കുമതിയിലൂടെയാണ് നിറവേറ്റുന്നത്.

പുതിയ ഹാച്ചറിയിലൂടെ മത്സ്യകൃഷി മേഖലയിലെ സ്വകാര്യമേഖലയുടെ പങ്കാളിത്തം കൂടുതൽ വിപുലപ്പെടുത്താനും സാങ്കേതിക അറിവ് കൈമാറാനും പുതിയ നിക്ഷേപ അവസരങ്ങൾ സൃഷ്ടിക്കാനും സാധിക്കുമെന്ന് അദ്ദേഹം പറഞ്ഞു. ശാസ്ത്രീയ അറിവിനെ സാമ്പത്തികമായി മൂല്യമുള്ള ഉൽപാദനത്തിലേക്ക് മാറ്റാനും ഇതുവഴി സാധിക്കും.

പദ്ധതി പ്രവർത്തനക്ഷമമാക്കുന്നതിൽ പങ്കുവഹിച്ച ഇൻസ്റ്റിറ്റ്യൂട്ടിലെ ഗവേഷകർ, സാങ്കേതിക വിദഗ്ധർ, എൻജിനീയർമാർ എന്നിവരോട് അൽ ഹുമൈദാൻ നന്ദിയും അഭിനന്ദനവും അറിയിച്ചു. പദ്ധതി നടപ്പാക്കിയ കമ്പനിയുടെ സി.ഇ.ഒ മുബാറക് അൽ വഖ്യാന്റെ നേതൃത്വത്തിലുള്ള സഹകരണത്തെയും അദ്ദേഹം പ്രശംസിച്ചു