Kuwait Fish Expiry Date Fraud : കുവൈത്ത് സിറ്റി: ഇറക്കുമതി ചെയ്ത മത്സ്യങ്ങളുടെ ഉൽപാദന തീയതിയിലും കാലാവധി തീയതിയിലും കൃത്രിമം നടത്തി വിൽപ്പനയ്ക്ക് എത്തിക്കാൻ ശ്രമിച്ച 27 പേരെ കുവൈത്ത് ആഭ്യന്തര മന്ത്രാലയം അറസ്റ്റ് ചെയ്തു. റസ്റ്റോറന്റുകൾക്കും കമ്പനികൾക്കും കടകൾക്കും മത്സ്യം വിൽക്കുന്നതിനായി കാലാവധി നീട്ടിക്കാണിക്കുകയായിരുന്നു ലക്ഷ്യമെന്ന് മന്ത്രാലയം അറിയിച്ചു.
വാണിജ്യ തട്ടിപ്പ് സംബന്ധിച്ച് ലഭിച്ച വിവരങ്ങളുടെ അടിസ്ഥാനത്തിൽ ജനറൽ ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷനിലെ വ്യാജരേഖാ കുറ്റകൃത്യ വിഭാഗമാണ് അന്വേഷണം നടത്തിയത്. ഇറക്കുമതി ചെയ്ത മത്സ്യങ്ങളുടെ പെട്ടികളിൽ തെറ്റായ ഉൽപാദന തീയതിയും കാലാവധി തീയതിയും രേഖപ്പെടുത്തിയ ലേബലുകൾ അച്ചടിച്ച് പതിപ്പിച്ചതായി അന്വേഷണത്തിൽ കണ്ടെത്തി.
പബ്ലിക് പ്രോസിക്യൂഷനിൽ നിന്ന് വാറണ്ട് നേടിയശേഷം പ്രത്യേക അന്വേഷണസംഘം സെൻട്രൽ ഫിഷ് മാർക്കറ്റിൽ പരിശോധന നടത്തി പ്രതികളെ അറസ്റ്റ് ചെയ്തു.
പരിശോധനയിൽ വ്യാജമായി തീയതികൾ മാറ്റിയതായി സംശയിക്കുന്ന ഇറക്കുമതി ചെയ്ത മത്സ്യങ്ങളുടെ 894 പെട്ടികൾ പിടിച്ചെടുത്തു. മത്സ്യം കൊണ്ടുപോകാൻ ഉപയോഗിച്ച 16 റഫ്രിജറേറ്റഡ് വാഹനങ്ങളും വ്യാജ ലേബലുകൾ തയ്യാറാക്കി അച്ചടിക്കാൻ ഉപയോഗിച്ച ഒരു കമ്പ്യൂട്ടറും അധികൃതർ കസ്റ്റഡിയിലെടുത്തു.
ചോദ്യം ചെയ്യലിൽ പ്രതികൾ മത്സ്യങ്ങളുടെ കാലാവധി തീയതികളിൽ മാറ്റം വരുത്തിയതായി സമ്മതിച്ചതായും ഇതിനായി ഒരു പ്രിന്റിംഗ് കമ്പനിയുടെ സേവനം തേടിയതായും ആഭ്യന്തര മന്ത്രാലയം വ്യക്തമാക്കി.
കൂടുതൽ അന്വേഷണത്തിൽ കേസുമായി ബന്ധപ്പെട്ട മറ്റ് രണ്ട് കമ്പനികൾ രജിസ്റ്റർ ചെയ്ത വിലാസങ്ങൾ മാത്രമായി പ്രവർത്തിക്കുന്നവയാണെന്നും യഥാർത്ഥ വ്യാപാര പ്രവർത്തനങ്ങൾ നടത്തിയിരുന്നില്ലെന്നും കണ്ടെത്തി.
അറസ്റ്റിലായവരെയും പിടിച്ചെടുത്ത വസ്തുക്കളെയും തുടർ നിയമനടപടികൾക്കായി ബന്ധപ്പെട്ട അധികാരികൾക്ക് കൈമാറി.
