UAE Food Regulations 2026 : ഭക്ഷ്യ ഉൽപന്നങ്ങളിലെ ചേരുവകളുടെ അളവ് കുറയ്ക്കാൻ കമ്പനികൾക്ക് നിർദേശം; പുതിയ നിയമം 2030 അവസാനത്തോടെ ഘട്ടംഘട്ടമായി നടപ്പാക്കും

ദുബായ്: ഭക്ഷ്യ ഉൽപന്നങ്ങളിലെ സോഡിയം, പഞ്ചസാര, കൊഴുപ്പ് എന്നിവയുടെ അളവ് നിയന്ത്രിക്കുന്നതിനായി യുഎഇയിൽ പുതിയ നിയമം. നിശ്ചിത പരിധി ലംഘിക്കുന്ന ഭക്ഷ്യ കമ്പനികൾക്ക് 5,000 ദിർഹം മുതൽ 5 ലക്ഷം ദിർഹം വരെ പിഴ ചുമത്തും. നിയമലംഘനത്തിന്റെ ഗൗരവവും സാഹചര്യങ്ങളും ആവർത്തനവും കണക്കിലെടുത്തായിരിക്കും നടപടി.

ഒക്ടോബർ ഒന്നുമുതൽ പ്രാബല്യത്തിൽ വന്ന പുതിയ നിയന്ത്രണം യുഎഇയിൽ ഉൽപാദിപ്പിക്കുന്നതും വിദേശത്തുനിന്ന് ഇറക്കുമതി ചെയ്യുന്നതുമായ തിരഞ്ഞെടുത്ത ഭക്ഷ്യ ഉൽപന്നങ്ങൾക്ക് ബാധകമാണ്. ഉൽപന്നങ്ങളുടെ പോഷകമൂല്യം മെച്ചപ്പെടുത്തുന്നതിനൊപ്പം ഉപഭോക്താക്കൾക്ക് പരിചിതമായ രുചിയും ഘടനയും നിലനിർത്തുകയാണ് ലക്ഷ്യം.

ഭക്ഷ്യ ഉൽപന്നങ്ങളിലെ ചേരുവകളുടെ അളവ് കുറയ്ക്കുന്നതിനായി കമ്പനികൾ ആധുനിക സാങ്കേതികവിദ്യകളും നൂതന രീതികളും ഉപയോഗിക്കണമെന്ന് ആരോഗ്യ-പ്രതിരോധ മന്ത്രാലയം അറിയിച്ചു. പുതിയ നിയന്ത്രണങ്ങൾ 2030 അവസാനത്തോടെ ഘട്ടംഘട്ടമായി നടപ്പാക്കും. പാചകക്കുറിപ്പുകളിൽ ആവശ്യമായ മാറ്റങ്ങൾ വരുത്താൻ കമ്പനികൾക്ക് മതിയായ സമയം നൽകുന്നതിനാണ് ഈ രീതി.

അമിതമായ ഉപ്പ് ഉപഭോഗം ആശങ്കയാകുന്നു

2024, 2025 വർഷങ്ങളിൽ മന്ത്രാലയം നടത്തിയ പഠനത്തിൽ പങ്കെടുത്തവരിൽ 96 ശതമാനവും ശുപാർശ ചെയ്തതിലധികം ഉപ്പ് ഉപയോഗിക്കുന്നതായി കണ്ടെത്തിയിരുന്നു. പ്രതിദിനം 2,000 മില്ലിഗ്രാം സോഡിയമാണ് ശുപാർശ ചെയ്തിട്ടുള്ളത്. എന്നാൽ പഠനത്തിൽ കണ്ടെത്തിയ ശരാശരി ഉപഭോഗം പ്രതിദിനം 5,000 മില്ലിഗ്രാമായിരുന്നു.

അമിതമായ സോഡിയം, പഞ്ചസാര, കൊഴുപ്പ് എന്നിവയുടെ ഉപയോഗം അമിതവണ്ണം, ഹൃദ്രോഗം, പ്രമേഹം, ഉയർന്ന രക്തസമ്മർദം തുടങ്ങിയ ആരോഗ്യപ്രശ്നങ്ങൾക്ക് കാരണമാകാമെന്ന് മന്ത്രാലയത്തിലെ ആരോഗ്യ പ്രോത്സാഹന വകുപ്പ് ഡയറക്ടർ നൗഫ് ഖാമിസ് അൽ അലി പറഞ്ഞു.

ഉൽപന്നങ്ങളിലെ ചേരുവകൾ കുറയ്ക്കുന്നതിലൂടെ ഉപഭോക്താക്കൾക്ക് കൂടുതൽ ആരോഗ്യകരമായ ഭക്ഷണങ്ങൾ എളുപ്പത്തിൽ തിരഞ്ഞെടുക്കാൻ കഴിയുമെന്നും മന്ത്രാലയം വിലയിരുത്തുന്നു. തിരക്കിനിടയിൽ ഷോപ്പിങ് നടത്തുന്നവർക്ക് ഓരോ ഉൽപന്നത്തിന്റെയും പോഷകാഹാര ലേബലുകൾ പരിശോധിച്ച് താരതമ്യം ചെയ്യാൻ എല്ലായ്പ്പോഴും സാധിക്കണമെന്നില്ല. അതിനാൽ ഉൽപന്നങ്ങളുടെ ഘടനയിൽ തന്നെ മാറ്റം വരുത്തുകയാണ് ലക്ഷ്യം.

രുചിയിൽ പെട്ടെന്നുള്ള മാറ്റമുണ്ടാകില്ല

ഭക്ഷ്യ ഉൽപന്നങ്ങളിലെ ഉപ്പ്, പഞ്ചസാര തുടങ്ങിയ ചേരുവകൾ കുറയ്ക്കുമ്പോൾ രുചിയിലും ഘടനയിലും വലിയ മാറ്റമുണ്ടാകാതിരിക്കാൻ കമ്പനികൾക്ക് സാങ്കേതിക മാർഗങ്ങൾ മന്ത്രാലയം പരിചയപ്പെടുത്തിയിട്ടുണ്ട്.

ഘട്ടംഘട്ടമായുള്ള മാറ്റങ്ങൾ ഉപഭോക്താക്കൾക്ക് പുതിയ രുചികളുമായി പൊരുത്തപ്പെടാനും കമ്പനികൾക്ക് നിലവിലുള്ള പാചകക്കുറിപ്പുകൾ പരിഷ്കരിക്കാനും സഹായിക്കും. ആരോഗ്യകരമായ ഭക്ഷണവും ഉപഭോക്താക്കളുടെ ഭക്ഷണാനുഭവവും ഒരുപോലെ സംരക്ഷിക്കുകയാണ് ലക്ഷ്യമെന്ന് മന്ത്രാലയം വ്യക്തമാക്കി.

അതേസമയം, ഉപ്പിന്റെയും പഞ്ചസാരയുടെയും കൊഴുപ്പിന്റെയും അളവ് കുറച്ചുവെന്ന കാരണത്താൽ ഉൽപന്നങ്ങൾ പരിധിയില്ലാതെ കഴിക്കാമെന്ന് കരുതരുതെന്നും അധികൃതർ മുന്നറിയിപ്പ് നൽകി. ഇത്തരം മാറ്റങ്ങൾ ഭക്ഷണത്തിലെ കലോറി പൂർണമായും ഇല്ലാതാക്കുന്നില്ല.

പരിശോധനകളും ലബോറട്ടറി പരിശോധനകളും

പുതിയ നിയമം പാലിക്കുന്നുണ്ടെന്ന് ഉറപ്പാക്കാൻ രാജ്യത്തെ ആരോഗ്യ, നിയന്ത്രണ അധികൃതരുമായി സഹകരിച്ച് മന്ത്രാലയം നിരീക്ഷണ സംവിധാനം ഒരുക്കിയിട്ടുണ്ട്.

ഭക്ഷ്യ ഉൽപന്നങ്ങളുടെയും സ്ഥാപനങ്ങളുടെയും പരിശോധന, കടകളിൽ വിൽക്കുന്ന ഭക്ഷണങ്ങളുടെ സാമ്പിൾ ശേഖരണം, ലബോറട്ടറി പരിശോധന എന്നിവ ഇതിന്റെ ഭാഗമായിരിക്കും.

നിയമം പാലിക്കാത്ത കമ്പനികൾക്കെതിരെ മുന്നറിയിപ്പ്, സാമ്പത്തിക പിഴ, നിയമവിരുദ്ധ ഉൽപന്നങ്ങൾ വിപണിയിൽനിന്ന് പിൻവലിക്കൽ തുടങ്ങിയ നടപടികൾ സ്വീകരിക്കും.

5 ലക്ഷം ദിർഹം വരെ പിഴ; സ്ഥാപനങ്ങൾ അടച്ചുപൂട്ടാനും നടപടി

നിശ്ചിത ചേരുവകളുടെ പരിധി ലംഘിക്കുകയോ നിയമം പാലിക്കാത്ത ഉൽപന്നങ്ങൾ കൈകാര്യം ചെയ്യുകയോ ചെയ്യുന്ന സ്ഥാപനങ്ങൾക്കെതിരെ കർശന നടപടികളുണ്ടാകും.

ലംഘനത്തിന്റെ സ്വഭാവവും ഗൗരവവും ആവർത്തനവും അനുസരിച്ച്:

• മുന്നറിയിപ്പ് നൽകും.
• 5,000 മുതൽ 500,000 ദിർഹം വരെ പിഴ ചുമത്തും.
• ആറുമാസം വരെ ഭരണപരമായി സ്ഥാപനം അടച്ചുപൂട്ടാം. ആവശ്യമായ നടപടിക്രമങ്ങൾക്കനുസരിച്ച് അടച്ചുപൂട്ടൽ കാലാവധി പുതുക്കാനും വ്യവസ്ഥയുണ്ട്.
• ബന്ധപ്പെട്ട ലൈസൻസിങ് അതോറിറ്റിയുമായി ഏകോപിപ്പിച്ച് സ്ഥാപനത്തിന്റെ ലൈസൻസോ അംഗീകാരമോ റദ്ദാക്കാനും കഴിയും.

ലംഘനങ്ങൾക്കും അവയ്ക്കുള്ള ഭരണപരമായ ശിക്ഷകൾക്കുമുള്ള വിശദമായ പട്ടിക മന്ത്രിസഭ പുറപ്പെടുവിക്കും. ആരോഗ്യ-പ്രതിരോധ മന്ത്രിയുടെ നിർദേശപ്രകാരം ബന്ധപ്പെട്ട അധികാരികളുമായി ഏകോപിപ്പിച്ചായിരിക്കും തുടർനടപടികൾ.

പൊതുജനാരോഗ്യം മെച്ചപ്പെടുത്തുക, അമിതവണ്ണവും ഭക്ഷണശീലങ്ങളുമായി ബന്ധപ്പെട്ട മറ്റ് സാംക്രമികേതര രോഗങ്ങളും കുറയ്ക്കുക എന്നിവയാണ് പുതിയ നിയന്ത്രണത്തിന്റെ പ്രധാന ലക്ഷ്യം.

കൂടുതൽ യു എ ഇ വാർത്തകൾ അറിയാൻ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ*