Qatar Airways to Join WATAN 2026 ദോഹ: ഖത്തറിന്റെ ദേശീയതലത്തിലുള്ള വാർഷിക സുരക്ഷാ അഭ്യാസമായ വാടൻ 2026ന്റെ ഭാഗമായി ഹമദ് രാജ്യാന്തര വിമാനത്താവളത്തിൽ (HIA) പ്രവർത്തന സജ്ജതാ അഭ്യാസത്തിൽ പങ്കെടുക്കുമെന്ന് ഖത്തർ എയർവേയ്‌സ് അറിയിച്ചു. നവംബർ 2 തിങ്കളാഴ്ചയാണ് അഭ്യാസം നടക്കുന്നത്.
അടിയന്തര സാഹചര്യങ്ങൾ നേരിടുന്നതിനുള്ള മുന്നൊരുക്കങ്ങളും വിമാനത്താവളത്തിന്റെ പ്രവർത്തന സജ്ജതയും വിലയിരുത്തുന്നതിനുള്ള വിവിധ നടപടികൾ അഭ്യാസത്തിന്റെ ഭാഗമായി നടപ്പാക്കും. ഇതിന്റെ ഭാഗമായി ഹമദ് രാജ്യാന്തര വിമാനത്താവളത്തിലും പരിസരത്തെ വ്യോമമേഖലയിലും പതിവിലും കൂടുതൽ പ്രവർത്തനങ്ങൾ ദൃശ്യമാകാൻ സാധ്യതയുണ്ടെന്നും വിമാനക്കമ്പനി വ്യക്തമാക്കി.
അഭ്യാസത്തിന്റെ ഭാഗമായി വിമാനത്താവള പരിസരത്തും വ്യോമമേഖലയിലും നടക്കുന്ന അധിക പ്രവർത്തനങ്ങൾ യാത്രക്കാരിൽ ആശങ്കയുണ്ടാക്കേണ്ടതില്ലെന്നും ഖത്തർ എയർവേയ്‌സ് അറിയിച്ചു. അഭ്യാസം വിമാന സർവീസുകളെയോ യാത്രക്കാർക്കുള്ള സേവനങ്ങളെയോ ബാധിക്കില്ല. എല്ലാ വിമാന സർവീസുകളും പതിവുപോലെ തന്നെ പ്രവർത്തിക്കുമെന്നും കമ്പനി വ്യക്തമാക്കി.
