Kuwait-Riyadh Rail Link Enters Tendering Phase കുവൈത്ത് സിറ്റി: കുവൈത്തിനെയും സൗദി അറേബ്യൻ തലസ്ഥാനമായ റിയാദിനെയും ബന്ധിപ്പിക്കുന്ന റെയിൽപാത പദ്ധതിയുടെ നടപടികൾ ടെൻഡർ ഘട്ടത്തിലേക്ക് കടന്നു. ഗൾഫ് രാജ്യങ്ങളെ ബന്ധിപ്പിക്കുന്ന സമഗ്ര റെയിൽവേ പദ്ധതിയുടെ രൂപകൽപ്പനയുടെ വലിയൊരു ഭാഗവും പൂർത്തിയായതായി കുവൈത്ത് പൊതുമരാമത്ത് മന്ത്രാലയം അറിയിച്ചു.
കുവൈത്ത് പൊതുമരാമത്ത് മന്ത്രാലയത്തിലെ കൺസ്ട്രക്ഷൻ ആൻഡ് മേജർ പ്രോജക്ട്സ് ജനറൽ ഡിപ്പാർട്ട്മെന്റ് ഡയറക്ടർ ജനറൽ എൻജിനീയർ ദുഹ അൽദാഹിയാണ് ഇക്കാര്യം വ്യക്തമാക്കിയത്. കുവൈത്ത് പ്രോജക്ട് മാനേജ്മെന്റ് കോൺഫറൻസ് 2026-ന്റെ ഉദ്ഘാടനച്ചടങ്ങിൽ പൊതുമരാമത്ത് മന്ത്രി ഡോ. നൂറ അൽമഷാന്റെ പ്രതിനിധിയായാണ് അവർ സംസാരിച്ചത്.
കുവൈത്ത്–റിയാദ് റെയിൽ ബന്ധിപ്പിക്കൽ പദ്ധതിയുടെ കരാർ നടപടികൾ ഗൾഫ് രാജ്യങ്ങളുടെ ഏകോപനത്തോടെ ടെൻഡർ ഘട്ടത്തിലാണെന്ന് അവർ പറഞ്ഞു. ഗൾഫ് റെയിൽവേ പദ്ധതിയുടെ രൂപകൽപ്പന പുരോഗമിക്കുകയാണെന്നും ഇതിന്റെ പ്രധാന ഘട്ടങ്ങൾ പൂർത്തിയായതായും അറിയിച്ചു.
ആറ് ഗൾഫ് സഹകരണ കൗൺസിൽ (GCC) രാജ്യങ്ങളെയും ബന്ധിപ്പിക്കുന്നതാണ് ഗൾഫ് റെയിൽവേ പദ്ധതി. കുവൈത്ത്, സൗദി അറേബ്യ, ബഹ്റൈൻ, ഖത്തർ, യുഎഇ, ഒമാൻ എന്നീ രാജ്യങ്ങളെ ബന്ധിപ്പിക്കുന്ന വിപുലമായ റെയിൽ ശൃംഖലയാണിത്. ഏകദേശം 2,186 കിലോമീറ്ററാണ് പദ്ധതിയുടെ ആകെ ദൈർഘ്യം. യാത്രക്കാരുടെയും ചരക്കുകളുടെയും ഗതാഗതം ലക്ഷ്യമിട്ടാണ് പദ്ധതി വിഭാവനം ചെയ്തിരിക്കുന്നത്.
അതേസമയം, കുവൈത്തിലെ വിമാനത്താവള വികസന പദ്ധതിയും പുരോഗമിക്കുകയാണെന്ന് ദുഹ അൽദാഹി വ്യക്തമാക്കി. പദ്ധതികളുടെ പ്രവർത്തനങ്ങൾ വിജയകരമായി പൂർത്തിയാക്കുന്നതിനായി മന്ത്രാലയം ദിവസേന നിരീക്ഷണം നടത്തുന്നുണ്ട്.
ചൈനയുമായുള്ള കരാറിന്റെ ഭാഗമായി നടപ്പാക്കുന്ന മുബാറക് അൽ കബീർ തുറമുഖ പദ്ധതിയും രാജ്യത്തെ പ്രധാന വികസന പദ്ധതികളിലൊന്നാണെന്ന് അവർ പറഞ്ഞു. കഴിഞ്ഞ ഓഗസ്റ്റിൽ ഒപ്പുവച്ച കരാർ പ്രകാരം പദ്ധതി നിശ്ചിത സമയക്രമമനുസരിച്ച് മുന്നോട്ടുപോകുകയാണ്.
കുവൈത്ത് വിഷൻ 2035 ലക്ഷ്യങ്ങൾ കൈവരിക്കുന്നതിനായി വൻകിട അടിസ്ഥാനസൗകര്യ വികസന പദ്ധതികൾ വേഗത്തിലാക്കുകയാണെന്നും പദ്ധതികളുടെ നടത്തിപ്പിൽ ആർട്ടിഫിഷ്യൽ ഇന്റലിജൻസ്, ഡാറ്റാ അനലിറ്റിക്സ്, ഡിജിറ്റൽ സാങ്കേതികവിദ്യകൾ എന്നിവയ്ക്ക് പ്രാധാന്യം നൽകുമെന്നും അവർ കൂട്ടിച്ചേർത്തു.
