Qatar Shuts Down Two Recruitment Offices ദോഹ: വിദേശത്തുനിന്ന് തൊഴിലാളികളെ റിക്രൂട്ട് ചെയ്യുന്നതുമായി ബന്ധപ്പെട്ട നിയമങ്ങൾ കർശനമായി നടപ്പാക്കുന്നതിന്റെ ഭാഗമായി ഖത്തറിൽ രണ്ട് റിക്രൂട്ട്‌മെന്റ് ഓഫീസുകൾ അടച്ചുപൂട്ടി. സ്ഥാപനങ്ങളുടെ ലൈസൻസുകൾ റദ്ദാക്കിയ ശേഷമാണ് തൊഴിൽ മന്ത്രാലയം നടപടി സ്വീകരിച്ചത്.
സ്പെഷ്യൽ മാൻപവർ സപ്ലൈ റിക്രൂട്ട്‌മെന്റ് ഓഫീസ്, റിവിയേര മാൻപവർ സപ്ലൈ റിക്രൂട്ട്‌മെന്റ് ഓഫീസ് എന്നിവയ്ക്കെതിരെയാണ് നടപടി. തൊഴിൽ മന്ത്രിയുടെ 2026ലെ 49-ാം നമ്പർ തീരുമാനപ്രകാരം സ്പെഷ്യൽ മാൻപവർ സപ്ലൈ ഓഫീസിന്റെയും 48-ാം നമ്പർ തീരുമാനപ്രകാരം റിവിയേര മാൻപവർ സപ്ലൈ ഓഫീസിന്റെയും ലൈസൻസുകൾ റദ്ദാക്കിയതായി മന്ത്രാലയം അറിയിച്ചു.
വിദേശത്തുനിന്നുള്ള തൊഴിലാളികളുടെ റിക്രൂട്ട്‌മെന്റ് നിയന്ത്രിക്കുന്നതിനുള്ള തൊഴിൽ നിയമത്തിലെയും അനുബന്ധ ചട്ടങ്ങളിലെയും വ്യവസ്ഥകൾ അനുസരിച്ചാണ് തീരുമാനങ്ങളെന്ന് മന്ത്രാലയം എക്സിൽ പ്രസിദ്ധീകരിച്ച പ്രസ്താവനയിൽ വ്യക്തമാക്കി.
തൊഴിൽ വിപണിയെ കൂടുതൽ കാര്യക്ഷമമായി നിയന്ത്രിക്കുക, നിയമങ്ങളും ചട്ടങ്ങളും പാലിക്കുന്നുണ്ടെന്ന് ഉറപ്പാക്കുക, റിക്രൂട്ട്‌മെന്റ് സേവനങ്ങളുടെ നിലവാരം മെച്ചപ്പെടുത്തുക എന്നിവയാണ് നടപടിയുടെ ലക്ഷ്യം. റിക്രൂട്ട്‌മെന്റ് നടപടികളിൽ ഉൾപ്പെടുന്ന എല്ലാ കക്ഷികളുടെയും അവകാശങ്ങൾ സംരക്ഷിക്കുന്നതിനുള്ള പ്രതിബദ്ധതയും മന്ത്രാലയം ആവർത്തിച്ചു.
