First Locally Made Light Ammunition at Naif Factory കുവൈത്ത് സിറ്റി: രാജ്യത്ത് ആദ്യമായി പ്രാദേശികമായി നിർമിച്ച ചെറു ആയുധങ്ങൾക്കുള്ള വെടിയുണ്ടകളുടെ ആദ്യ ബാച്ച് ഉൽപാദനം ആരംഭിച്ചു. കുവൈത്തിലെ പ്രതിരോധ വ്യവസായ മേഖലയിൽ നിർണായക ചുവടുവെപ്പായ നയ്ഫ് ലൈറ്റ് അമ്യൂണിഷൻ ഫാക്ടറിയിലാണ് ഉൽപാദനം ആരംഭിച്ചത്. ബുധനാഴ്ച നടന്ന ചടങ്ങിൽ പ്രതിരോധ മന്ത്രി ഷെയ്ഖ് അബ്ദുല്ല അലി അബ്ദുല്ല അൽ സാലിം അൽ സബാഹ് ആദ്യ ബാച്ചിന്റെ ഉൽപാദനോദ്ഘാടനത്തിൽ പങ്കെടുത്തു.
രാജ്യത്തെ സൈനിക വ്യവസായങ്ങൾ കൂടുതൽ വികസിപ്പിക്കേണ്ടതിന്റെയും അവയുടെ ഉൽപാദന ശേഷി വർധിപ്പിക്കേണ്ടതിന്റെയും പ്രാധാന്യം പ്രതിരോധ മന്ത്രി ചൂണ്ടിക്കാട്ടി. ഗുണനിലവാരത്തിലും സുരക്ഷയിലും ഉയർന്ന അന്താരാഷ്ട്ര നിലവാരങ്ങൾ ഉറപ്പാക്കിക്കൊണ്ടായിരിക്കണം ഇത്തരം പദ്ധതികൾ മുന്നോട്ടുകൊണ്ടുപോകേണ്ടതെന്നും അദ്ദേഹം പറഞ്ഞു.
തന്ത്രപ്രധാനമായ സൈനിക പദ്ധതികൾ യാഥാർഥ്യമാക്കാൻ പ്രവർത്തിച്ചവരുടെ ശ്രമങ്ങളെ മന്ത്രി അഭിനന്ദിച്ചു. പ്രതിരോധ സജ്ജീകരണങ്ങൾ ശക്തിപ്പെടുത്തുന്നതിനായി ദേശീയ തലത്തിലുള്ള വിദഗ്ധരിലും പ്രാദേശിക പ്രതിഭകളിലും നിക്ഷേപം നടത്തേണ്ടതിന്റെ ആവശ്യകതയും അദ്ദേഹം വ്യക്തമാക്കി.
കുവൈത്ത് പ്രതിരോധ മന്ത്രാലയം വെടിയുണ്ട നിർമാണ മേഖലയിലേക്ക് കടക്കുന്ന ആദ്യ സംരംഭമാണിത്. രാജ്യത്ത് ഇത്തരത്തിലുള്ള ആദ്യത്തെ ഫാക്ടറിയാണ് നയ്ഫ് ലൈറ്റ് അമ്യൂണിഷൻ ഫാക്ടറി. ഫാക്ടറിയിലെ നിർമാണ പ്രക്രിയകളും പ്രവർത്തന രീതികളും ചെറു ആയുധങ്ങൾക്കുള്ള വെടിയുണ്ട നിർമാണവുമായി ബന്ധപ്പെട്ട നാറ്റോ (NATO) മാനദണ്ഡങ്ങൾ പാലിച്ചാണ് ക്രമീകരിച്ചിരിക്കുന്നത്.
കുവൈത്തിന്റെ സൈനിക ആവശ്യങ്ങൾക്കായി ആഭ്യന്തര ഉൽപാദന ശേഷി വികസിപ്പിക്കുക, വിദേശ ആശ്രിതത്വം കുറയ്ക്കുക, പ്രതിരോധ മേഖലയിൽ സ്വയംപര്യാപ്തത കൈവരിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ. രാജ്യത്തെ സൈനിക വ്യവസായങ്ങളുടെ സുസ്ഥിര വികസനത്തിനും പ്രതിരോധ സജ്ജീകരണങ്ങൾ ശക്തിപ്പെടുത്തുന്നതിനും പുതിയ ഫാക്ടറി സഹായകമാകുമെന്നാണ് വിലയിരുത്തൽ.
