Kuwait Electricity Meter Bribery Case : കുവൈത്ത് വൈദ്യുതി മന്ത്രാലയത്തിലെ ജീവനക്കാർക്ക് ശമ്പളം, കാറുകൾ, മൊബൈൽ ഫോണുകൾ തുടങ്ങിയ ആനുകൂല്യങ്ങൾ നൽകിയെന്ന കൈക്കൂലി ആരോപണവുമായി ബന്ധപ്പെട്ട കേസിൽ എല്ലാ പ്രതികളെയും ക്രിമിനൽ കോടതി കുറ്റവിമുക്തരാക്കി. രണ്ട് വൈദ്യുതി മീറ്റർ കരാറുകളുമായി ബന്ധപ്പെട്ടായിരുന്നു കേസ്.
കൗൺസിലർ അൽ ദുവൈഹി മുബാറക് അൽ ദുവൈഹിയുടെ അധ്യക്ഷതയിലുള്ള ബെഞ്ചാണ് വിധി പ്രസ്താവിച്ചത്. ജഡ്ജിമാരായ ബദർ അൽ ഷിഹാബ്, ഇബ്രാഹിം ഖുറൈബിത് എന്നിവരും ബെഞ്ചിലുണ്ടായിരുന്നു. പ്രതികൾക്കെതിരായ ആരോപണങ്ങൾ തെളിയിക്കാൻ ആവശ്യമായ തെളിവുകൾ ലഭിച്ചിട്ടില്ലെന്ന് കോടതി നിരീക്ഷിച്ചു.
കുറ്റവിമുക്തരാക്കിയുള്ള വിധിയിൽ, കേസുമായി ബന്ധപ്പെട്ട ചില വാട്സ്ആപ്പ് സന്ദേശങ്ങൾ ശമ്പളം, സമ്മാനം, റിപ്പോർട്ടിൽ മാറ്റം വരുത്തൽ തുടങ്ങിയ കാര്യങ്ങളെക്കുറിച്ച് സൂചന നൽകിയിരുന്നതായി കോടതി ചൂണ്ടിക്കാട്ടി. ഇവ സംശയങ്ങൾക്ക് ഇടയാക്കിയെങ്കിലും, കമ്പനിയുടെ ഭാഗത്തുനിന്നുണ്ടായ നിയമലംഘനങ്ങൾ രേഖപ്പെടുത്താതെ പോകുന്നതിന് പ്രതികൾക്ക് ആനുകൂല്യങ്ങൾ നൽകിയെന്ന ആരോപണം തെളിയിക്കാൻ ഇവ മതിയായിരുന്നില്ലെന്ന് കോടതി വ്യക്തമാക്കി.
സംശയം മാത്രം അടിസ്ഥാനമാക്കി പ്രതികൾക്കെതിരെ കുറ്റം ചുമത്താനാകില്ലെന്നും ക്രിമിനൽ കുറ്റങ്ങൾ തെളിയിക്കാനുള്ള ഉത്തരവാദിത്തം പ്രോസിക്യൂഷനാണെന്നും കോടതി ഓർമിപ്പിച്ചു. ആരോപണങ്ങൾ സ്ഥാപിക്കാൻ മതിയായ തെളിവുകൾ ഹാജരാക്കേണ്ടതുണ്ടെന്നും വിധിയിൽ വ്യക്തമാക്കി.
വൈദ്യുതി മീറ്ററുകളുമായി ബന്ധപ്പെട്ട രണ്ട് കരാറുകളുടെ നടപടികളിൽ പങ്കാളികളായ മന്ത്രാലയ ജീവനക്കാർക്ക് ശമ്പളം, വാഹനങ്ങൾ, മൊബൈൽ ഫോണുകൾ തുടങ്ങിയ ആനുകൂല്യങ്ങൾ നൽകിയെന്ന ആരോപണമാണ് കേസിന് ആധാരം. എന്നാൽ ലഭ്യമായ തെളിവുകൾ കുറ്റം സ്ഥാപിക്കാൻ പര്യാപ്തമല്ലെന്ന് കണ്ടെത്തിയതിനെ തുടർന്നാണ് പ്രതികളെല്ലാവരെയും കോടതി കുറ്റവിമുക്തരാക്കിയത്.
