Kuwait to Reopen Some King Fahd Road Lanes വെള്ളിയാഴ്ച രാത്രി മുതൽ ഗതാഗത മാറ്റങ്ങൾ; രണ്ടാം, മൂന്നാം റിങ് റോഡുകൾക്കിടയിലെ ഭാഗങ്ങളിൽ അറ്റകുറ്റപ്പണി
കുവൈത്ത് സിറ്റി: കിങ് ഫഹദ് റോഡിൽ (റോഡ് 40) വെള്ളിയാഴ്ച രാത്രി മുതൽ പുതിയ ഗതാഗത നിയന്ത്രണങ്ങൾ ഏർപ്പെടുത്തുമെന്ന് പൊതുമരാമത്ത് മന്ത്രാലയം അറിയിച്ചു. റോഡിലെ ചില പാതകളും പ്രവേശന-പുറത്തിറക്ക വഴികളും വീണ്ടും തുറക്കുന്നതിനൊപ്പം മറ്റുചില ഭാഗങ്ങൾ 15 ദിവസത്തേക്ക് അടച്ചിടും. നവംബർ 6 വെള്ളിയാഴ്ച രാത്രി മുതലാണ് മാറ്റങ്ങൾ പ്രാബല്യത്തിൽ വരുന്നത്.
നിലവിൽ അടച്ചിട്ടിരുന്ന കിങ് ഫഹദ് റോഡിലെ സ്ലോ ലെയിൻ, മിഡിൽ സ്ലോ ലെയിൻ, വലതുവശത്തെ ഷോൾഡർ എന്നിവ വീണ്ടും തുറക്കും. രണ്ടാം റിങ് റോഡിൽ നിന്ന് കിങ് ഫഹദ് റോഡിലേക്കുള്ള എക്സിറ്റും കിങ് ഫഹദ് റോഡിൽ നിന്ന് തെക്കുഭാഗത്തേക്കുള്ള മൂന്നാം റിങ് റോഡിന്റെ പ്രവേശനകവാടവും തുറക്കും. നുസ്ഹ മേഖലയിലേക്കുള്ള പ്രവേശനവും പുറത്തേക്കുള്ള വഴിയും പുനഃസ്ഥാപിക്കും.
അതേസമയം, കിങ് ഫഹദ് റോഡിന്റെ മറ്റൊരു ഭാഗത്ത് സ്ലോ ലെയിൻ, മിഡിൽ സ്ലോ ലെയിൻ, മിഡിൽ ലെയ്നിന്റെ പകുതി, ഷോൾഡർ എന്നിവ അടച്ചിടും. മൂന്നാം റിങ് റോഡിൽ നിന്ന് കിങ് ഫഹദ് റോഡിലേക്കുള്ള എക്സിറ്റും അടയ്ക്കും. റോഡിലെ ടാറിങ് ജോലികളും സമഗ്രമായ അറ്റകുറ്റപ്പണികളും നടത്തുന്നതിന്റെ ഭാഗമായാണ് 15 ദിവസത്തെ നിയന്ത്രണം.
ഗതാഗത നിയന്ത്രണങ്ങൾ നിലനിൽക്കുന്ന കാലയളവിൽ യാത്രക്കാർ മുൻകൂട്ടി യാത്രകൾ ആസൂത്രണം ചെയ്യണമെന്നും റോഡിലെ ദിശാസൂചനകളും ട്രാഫിക് ഉദ്യോഗസ്ഥരുടെ നിർദേശങ്ങളും പാലിക്കണമെന്നും അധികൃതർ നിർദേശിച്ചു.
