Fire Force Issues Safety Advisory കുവൈത്ത് സിറ്റി: വാരാന്ത്യത്തിൽ കുവൈത്തിന്റെ വിവിധ ഭാഗങ്ങളിൽ ഒറ്റപ്പെട്ട മഴയ്ക്കും ചിലയിടങ്ങളിൽ ഇടിമിന്നലോടു കൂടിയ മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ശക്തമായ കാറ്റ്, പൊടിക്കാറ്റ്, മൂടൽമഞ്ഞ് എന്നിവ കാരണം ചില പ്രദേശങ്ങളിൽ കാഴ്ചപരിധി കുറയാനും സാധ്യതയുണ്ട്. മഴക്കാലത്ത് വെള്ളക്കെട്ടും മറ്റ് അപകടങ്ങളും ഒഴിവാക്കാൻ ആവശ്യമായ മുൻകരുതലുകൾ സ്വീകരിക്കണമെന്ന് കുവൈത്ത് ഫയർ ഫോഴ്‌സ് പൗരന്മാരോടും താമസക്കാരോടും നിർദേശിച്ചു.
മഴയ്ക്കു മുന്നോടിയായി വീടുകളിലെ ബേസ്‌മെന്റുകളിൽ സ്ഥാപിച്ചിട്ടുള്ള വെള്ളം പമ്പ് ചെയ്യുന്ന ഉപകരണങ്ങൾ പ്രവർത്തനക്ഷമമാണെന്ന് ഉറപ്പാക്കണം. മഴവെള്ളം ഒഴുകിപ്പോകാനുള്ള ഡ്രെയിനേജ് സംവിധാനങ്ങളിൽ തടസ്സങ്ങളില്ലെന്നും പരിശോധിക്കണം. വെള്ളക്കെട്ടിന് സാധ്യതയുള്ള പ്രദേശങ്ങളിലേക്കുള്ള യാത്രകൾ ഒഴിവാക്കണമെന്നും അധികൃതർ നിർദേശിച്ചു.
മോശം കാലാവസ്ഥയുള്ള സമയങ്ങളിൽ വൈദ്യുത സ്രോതസ്സുകൾ, പുറത്തുകാണുന്ന വൈദ്യുത വയറുകൾ, കേടായ തെരുവുവിളക്കുകൾ, കടൽത്തീരം എന്നിവിടങ്ങളിൽ നിന്ന് അകന്നുനിൽക്കണം. ബന്ധപ്പെട്ട അധികൃതർ പുറപ്പെടുവിക്കുന്ന കാലാവസ്ഥാ മുന്നറിയിപ്പുകൾ ശ്രദ്ധിക്കണമെന്നും ഫയർ ഫോഴ്‌സ് ആവശ്യപ്പെട്ടു.
അതേസമയം, സുഡാൻ ന്യൂനമർദത്തിന്റെ സ്വാധീനമാണ് കുവൈത്തിലെ കാലാവസ്ഥാ മാറ്റങ്ങൾക്ക് കാരണമെന്ന് കാലാവസ്ഥാ വകുപ്പ് ഡെപ്യൂട്ടി ഡയറക്ടർ ദിറാർ അൽ അലി കുവൈത്ത് വാർത്താ ഏജൻസിയായ കുനയോട് പറഞ്ഞു. ന്യൂനമർദത്തിന്റെ ഭാഗമായി താഴ്ന്നതും ഇടത്തരം ഉയരത്തിലുള്ളതുമായ മേഘങ്ങളുടെ സാന്നിധ്യം വർധിക്കും. ഒറ്റപ്പെട്ട മഴയ്ക്കും ചില സമയങ്ങളിൽ ഇടിമിന്നലിനും സാധ്യതയുണ്ട്. കാറ്റിനൊപ്പം പൊടി ഉയരുന്നത് ചില പ്രദേശങ്ങളിൽ കാഴ്ചപരിധി കുറയ്ക്കാനും ഇടയാക്കും.
വെള്ളിയാഴ്ച പകൽ ചൂടും ഭാഗികമായി മേഘാവൃതവുമായ കാലാവസ്ഥയായിരിക്കും. തെക്കുപടിഞ്ഞാറൻ ദിശയിൽ നിന്ന് തെക്കുകിഴക്കൻ ദിശയിലേക്ക് മാറുന്ന കാറ്റിന്റെ വേഗം മണിക്കൂറിൽ 15 മുതൽ 50 കിലോമീറ്റർ വരെയാകാം. തുറസ്സായ പ്രദേശങ്ങളിൽ പൊടിക്കാറ്റിനും സാധ്യതയുണ്ട്. പകൽ താപനില 36 മുതൽ 38 ഡിഗ്രി സെൽഷ്യസ് വരെയായിരിക്കുമെന്നാണ് പ്രവചനം.
വെള്ളിയാഴ്ച രാത്രിയിൽ തീരപ്രദേശങ്ങളിൽ ഈർപ്പം കൂടുതലായിരിക്കും. ചിലയിടങ്ങളിൽ ഒറ്റപ്പെട്ട മഴയ്ക്കും നേരിയ മൂടൽമഞ്ഞിനും സാധ്യതയുണ്ട്. കുറഞ്ഞ താപനില 21 മുതൽ 23 ഡിഗ്രി സെൽഷ്യസ് വരെയായിരിക്കും.
ശനിയാഴ്ച പകൽ 35 മുതൽ 37 ഡിഗ്രി സെൽഷ്യസ് വരെയായിരിക്കും ഉയർന്ന താപനില. ഭാഗികമായി മേഘാവൃതം മുതൽ പൂർണമായും മേഘാവൃതം വരെയുള്ള കാലാവസ്ഥ പ്രതീക്ഷിക്കുന്നു. മണിക്കൂറിൽ 12 മുതൽ 55 കിലോമീറ്റർ വരെ വേഗത്തിൽ കാറ്റ് വീശാം. പൊടിക്കാറ്റിനും ഒറ്റപ്പെട്ട നേരിയ മഴയ്ക്കും സാധ്യതയുണ്ട്.
ശനിയാഴ്ച രാത്രിയിലും ചില പ്രദേശങ്ങളിൽ ഇടിമിന്നലോടു കൂടിയ ഒറ്റപ്പെട്ട മഴ ലഭിച്ചേക്കാം. കുറഞ്ഞ താപനില 21 മുതൽ 23 ഡിഗ്രി സെൽഷ്യസ് വരെയായിരിക്കും. കടലിൽ തിരമാലകൾ മൂന്ന് മുതൽ ആറടി വരെ ഉയരാനും സാധ്യതയുണ്ട്. മഴക്കാലത്ത് അപകടങ്ങൾ ഒഴിവാക്കാൻ അധികൃതരുടെ നിർദേശങ്ങൾ പാലിക്കണമെന്നും കാലാവസ്ഥാ മുന്നറിയിപ്പുകൾ അവഗണിക്കരുതെന്നും ഫയർ ഫോഴ്‌സ് ഓർമിപ്പിച്ചു.
