Kuwait Conducts Joint Inspection in Hawally കുവൈത്ത് സിറ്റി: കുവൈത്തിലെ ഹവല്ലി ഗവർണറേറ്റിൽ 70ലധികം സ്ഥാപനങ്ങളിൽ സംയുക്ത പരിശോധനയുമായി പബ്ലിക് അതോറിറ്റി ഫോർ മാൻപവറും ആഭ്യന്തര മന്ത്രാലയവും. തൊഴിൽ നിയമലംഘനങ്ങൾ കണ്ടെത്തുന്നതിനും തൊഴിലാളികളുടെ അവകാശങ്ങൾ സംരക്ഷിക്കുന്നതിനുമായി നവംബർ 7നാണ് പരിശോധനാ ക്യാംപയിൻ നടത്തിയത്.
പബ്ലിക് അതോറിറ്റി ഫോർ മാൻപവർ ആഭ്യന്തര മന്ത്രാലയത്തിലെ പബ്ലിക് സെക്യൂരിറ്റി വിഭാഗവുമായി സഹകരിച്ചാണ് പരിശോധന നടത്തിയത്. തൊഴിൽ നിയമങ്ങൾ ലംഘിക്കുന്ന സ്ഥാപനങ്ങളെയും നിയമവിരുദ്ധ പ്രവർത്തനങ്ങളിൽ ഏർപ്പെടുന്നതായി സംശയിക്കുന്ന കമ്പനികളെയും ലക്ഷ്യമിട്ടായിരുന്നു നടപടി. തൊഴിലുടമകൾക്കും തൊഴിലാളികൾക്കും നിയമങ്ങളെക്കുറിച്ച് ബോധവൽക്കരണവും നിർദേശങ്ങളും നൽകുകയും ചെയ്തു.
തൊഴിൽ പരിശോധനാ വിഭാഗം, തൊഴിൽ ബന്ധ വിഭാഗം, പബ്ലിക് റിലേഷൻസ് വിഭാഗം എന്നിവയിലെ ഉദ്യോഗസ്ഥർ ക്യാംപയിനിൽ പങ്കെടുത്തു. തൊഴിലുടമകളുടെയും തൊഴിലാളികളുടെയും ഭാഗത്തുനിന്നുണ്ടാകുന്ന നിയമലംഘനങ്ങളും മറ്റ് ക്രമക്കേടുകളും കണ്ടെത്തുകയായിരുന്നു സംഘത്തിന്റെ പ്രധാന ലക്ഷ്യം.
പരിശോധനയിൽ കണ്ടെത്തിയ വീഴ്ചകൾ പരിഹരിക്കാൻ ബന്ധപ്പെട്ട സ്ഥാപനങ്ങൾക്ക് ഉദ്യോഗസ്ഥർ നോട്ടീസ് നൽകി. നിർബന്ധിത തൊഴിൽ (Forced Labour), തൊഴിലാളികളെ നിർബന്ധിച്ച് ജോലി ചെയ്യിക്കുന്നതുമായി ബന്ധപ്പെട്ട സംശയാസ്പദമായ സാഹചര്യങ്ങൾ എന്നിവയും പരിശോധിച്ചു. ഇത്തരം സംഭവങ്ങളിൽ നിലവിലുള്ള നിയമനടപടികൾ സ്വീകരിച്ചതായും അധികൃതർ അറിയിച്ചു.
കുവൈത്തിലെ തൊഴിൽ വിപണിയിൽ നിയമങ്ങൾ കർശനമായി നടപ്പാക്കുന്നതിനും തൊഴിലുടമകളുടെയും തൊഴിലാളികളുടെയും അവകാശങ്ങൾ സംരക്ഷിക്കുന്നതിനുമായി ഇത്തരം പരിശോധനകൾ തുടരുമെന്ന് പബ്ലിക് അതോറിറ്റി ഫോർ മാൻപവർ വ്യക്തമാക്കി.
