Kuwait Motorist 190 kmph : കുവൈത്ത് സിറ്റി: അമിതവേഗതയിലും അശ്രദ്ധമായും വാഹനമോടിച്ച കുവൈത്തി പൗരന് മൂന്ന് മാസം കഠിന തടവ് ശിക്ഷ വിധിച്ച് കോടതി. മണിക്കൂറിൽ 190 കിലോമീറ്റർ വേഗതയിൽ വാഹനമോടിക്കുന്നതിനിടെയാണ് ഇയാൾ പിടിയിലായത്. അഹ്മദി മിസ്ഡെമീനർ കോടതിയാണ് ശിക്ഷ വിധിച്ചത്. ജഡ്ജി മുഹമ്മദ് തലാൽ അൽ-ഹജ്‌രിയാണ് കേസ് പരിഗണിച്ചത്.
പ്രതിയുടെ പേരിൽ നേരത്തെയും നിരവധി ട്രാഫിക് നിയമലംഘനങ്ങൾ രേഖപ്പെടുത്തിയിട്ടുണ്ടെന്നത് കേസിന്റെ ഗൗരവം വർധിപ്പിച്ചു. ആകെ 561 ട്രാഫിക് നിയമലംഘനങ്ങളാണ് ഇയാളുടെ പേരിലുള്ളത്. ഇതുമായി ബന്ധപ്പെട്ട് ചുമത്തിയ പിഴത്തുക 25,000 കുവൈത്തി ദിനാറിലധികമാണ്.
ട്രാഫിക് നിയമങ്ങളോടുള്ള പ്രതിയുടെ നിരന്തരമായ അവഗണന കോടതി ഗൗരവത്തോടെയാണ് വിലയിരുത്തിയത്. റോഡ് നിയമങ്ങൾ പാലിക്കുന്നത് നിയമപരമായ ബാധ്യത മാത്രമല്ലെന്നും റോഡ് ഉപയോഗിക്കുന്ന മറ്റ് ആളുകളുടെ ജീവനും സ്വത്തിനും സംരക്ഷണം ഉറപ്പാക്കാനുള്ള ഉത്തരവാദിത്തം കൂടിയാണെന്നും കോടതി നിരീക്ഷിച്ചു.
മനുഷ്യജീവൻ നഷ്ടപ്പെട്ടാൽ അത് ഒരിക്കലും തിരിച്ചുപിടിക്കാനാകില്ലെന്നും, ഒഴിവാക്കാമായിരുന്ന ഒരു ഡ്രൈവിംഗ് പിഴവ് വലിയ ദുരന്തങ്ങൾക്ക് കാരണമാകാമെന്നും കോടതി ചൂണ്ടിക്കാട്ടി. ഇത്തരം നഷ്ടങ്ങൾ നിയമങ്ങൾക്കോ ശിക്ഷകൾക്കോ ഒരിക്കലും പരിഹരിക്കാനാകില്ലെന്നും കോടതി വ്യക്തമാക്കി.
ഉത്തരവാദിത്തബോധം കൊണ്ട് നിയമങ്ങൾ പാലിക്കാൻ തയ്യാറാകാത്തവരെ നിയമവാഴ്ച അതിന്റെ ശക്തി ഓർമിപ്പിക്കുമെന്ന കർശന മുന്നറിയിപ്പോടെയാണ് കോടതി വിധി പുറപ്പെടുവിച്ചത്.
