UAE Rescues 22 Crew Members;ദുബായ്: ഒമാൻ കടലിൽ ചരക്കുകപ്പലിന് തീപിടിച്ചതിനെ തുടർന്ന് അപകടത്തിൽപ്പെട്ട 22 ജീവനക്കാരെയും സുരക്ഷിതമായി രക്ഷപ്പെടുത്തി യുഎഇ അധികൃതർ. കപ്പലിൽ തീപിടിച്ചതായി ജീവനക്കാരിൽനിന്ന് അടിയന്തര സന്ദേശം ലഭിച്ചതിനെ തുടർന്ന് യുഎഇ നാഷണൽ ഗാർഡിന്റെ കോസ്റ്റ് ഗാർഡ് വിഭാഗം ഉടൻ രക്ഷാപ്രവർത്തനം ആരംഭിക്കുകയായിരുന്നു.
അപകടത്തിൽപ്പെട്ട കപ്പൽ കണ്ടെത്തിയ പ്രത്യേക പരിശീലനം ലഭിച്ച രക്ഷാസംഘം സ്ഥലത്തെത്തി കപ്പലിലുണ്ടായിരുന്ന 22 പേരെയും സുരക്ഷിതമായി പുറത്തെത്തിച്ചു. രക്ഷപ്പെടുത്തിയവർക്ക് ആവശ്യമായ പ്രഥമശുശ്രൂഷ നൽകിയശേഷം ബന്ധപ്പെട്ട അധികൃതർക്ക് കൈമാറി.
എല്ലാവരുടെയും ആരോഗ്യനില തൃപ്തികരം
രക്ഷപ്പെടുത്തിയ 22 ജീവനക്കാരും അറബ് രാജ്യക്കാരാണെന്നാണ് റിപ്പോർട്ട്. എല്ലാവരുടെയും ആരോഗ്യനില തൃപ്തികരമാണെന്നും അടിയന്തര ചികിത്സാ സഹായം നൽകിയതായും യുഎഇ നാഷണൽ ഗാർഡ് അറിയിച്ചു.
അടിയന്തര സന്ദേശം ലഭിച്ച ഉടൻ തന്നെ രക്ഷാപ്രവർത്തനത്തിന് ആവശ്യമായ നടപടികൾ സ്വീകരിച്ചതായും പ്രത്യേക സംഘത്തിന്റെ സമയോചിതമായ ഇടപെടലാണ് മുഴുവൻ ജീവനക്കാരെയും സുരക്ഷിതമായി രക്ഷിക്കാൻ സഹായിച്ചതെന്നും അധികൃതർ വ്യക്തമാക്കി.
കടലിലെ അടിയന്തര സാഹചര്യങ്ങളിൽ വേഗത്തിലുള്ള ഇടപെടൽ
സമുദ്ര മേഖലയിലെ സുരക്ഷയും അടിയന്തര രക്ഷാപ്രവർത്തനങ്ങളും ശക്തിപ്പെടുത്തുന്നതിനുള്ള യുഎഇയുടെ പ്രതിബദ്ധതയാണ് ഈ ദൗത്യം വീണ്ടും വ്യക്തമാക്കുന്നത്. കടലിൽ അപകടത്തിൽപ്പെടുന്നവരുടെ ജീവൻ സംരക്ഷിക്കുന്നതിനായി കോസ്റ്റ് ഗാർഡ് വിഭാഗം സജ്ജമാണെന്നും നാഷണൽ ഗാർഡ് അറിയിച്ചു.
കപ്പലിന് തീപിടിക്കാനുണ്ടായ കാരണം സംബന്ധിച്ച കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല.
