Kuwait Arrests 112 Absconders കുവൈത്ത് സിറ്റി: കുവൈത്തിൽ നടത്തിയ വൻ സുരക്ഷാ പരിശോധനയിൽ 112 പിടികിട്ടാപ്പുള്ളികളെയും താമസനിയമം ലംഘിച്ച 48 പേരെയും അറസ്റ്റ് ചെയ്തു. തലസ്ഥാന ഗവർണറേറ്റിൽ ആഭ്യന്തര മന്ത്രാലയത്തിന്റെ നേതൃത്വത്തിലായിരുന്നു വ്യാപക പരിശോധന. മയക്കുമരുന്ന് കൈവശംവെക്കൽ, ചൂതാട്ടം, വാണിജ്യ തട്ടിപ്പ്, അശ്രദ്ധമായ ഡ്രൈവിങ് തുടങ്ങിയ കുറ്റകൃത്യങ്ങളുമായി ബന്ധപ്പെട്ടും നിരവധി പേരെ പിടികൂടി.

തലസ്ഥാന ഗവർണറേറ്റിലെ സുരക്ഷാ ഡയറക്ടറേറ്റും പരിസ്ഥിതി പൊലീസും കുവൈത്ത് മുനിസിപ്പാലിറ്റിയും സംയുക്തമായാണ് പരിശോധന നടത്തിയത്. സുരക്ഷാ ഡയറക്ടറേറ്റുകളുടെ ചുമതലയുള്ള ബ്രിഗേഡിയർ അബ്ദുൽ അസീസ് ബന്ദർ അൽ ഒമറിന്റെയും തലസ്ഥാന ഗവർണറേറ്റ് സുരക്ഷാ ഡയറക്ടറേറ്റ് മേധാവി ബ്രിഗേഡിയർ മുഹമ്മദ് അഹമ്മദ് രാജബിന്റെയും മേൽനോട്ടത്തിലായിരുന്നു നടപടി.

പരിശോധനയിൽ 14 അനധികൃത തൊഴിലാളികളെയും ക്രിമിനൽ കേസുകളിൽ തിരയുന്ന 11 പേരെയും സിവിൽ കേസുകളിൽ പ്രതികളായ ആറുപേരെയും അറസ്റ്റ് ചെയ്തു. ഇവരുമായി ബന്ധപ്പെട്ട കേസുകളിൽ ആകെ 1,44,065 കുവൈത്ത് ദിനാറിന്റെ സാമ്പത്തിക ബാധ്യതയുണ്ടെന്ന് അധികൃതർ അറിയിച്ചു. മയക്കുമരുന്ന് കൈവശംവെച്ച അഞ്ച് പേരെയും മോഷണം, വിശ്വാസവഞ്ചന, വ്യക്തിഗത ഉപയോഗത്തിനായി മയക്കുമരുന്ന് കൈവശംവെക്കൽ തുടങ്ങിയ കേസുകളിൽ തിരയപ്പെട്ട മൂന്ന് പേരെയും പിടികൂടി. ചൂതാട്ടവുമായി ബന്ധപ്പെട്ട് രണ്ടുപേരെയും തിരിച്ചറിയൽ രേഖകളില്ലാത്ത രണ്ടുപേരെയും അറസ്റ്റ് ചെയ്തു.

കൂടാതെ, കോടതി ഉത്തരവിനെത്തുടർന്ന് പിടിച്ചെടുക്കേണ്ട ഒമ്പത് വാഹനങ്ങളും കസ്റ്റഡിയിലെടുത്തു. പരിസ്ഥിതി നിയമലംഘനങ്ങളുമായി ബന്ധപ്പെട്ട് 19 കേസുകൾ രജിസ്റ്റർ ചെയ്തു. മുനിസിപ്പാലിറ്റി അധികൃതർ 198 വാഹനങ്ങൾ നീക്കം ചെയ്യുകയും ചെയ്തു. ഗതാഗത നിയമലംഘനങ്ങൾക്ക് നിരവധി പേർക്ക് പിഴ ചുമത്തുകയും ചില വാഹനങ്ങളും മോട്ടോർ സൈക്കിളുകളും കസ്റ്റഡിയിലെടുക്കുകയും ചെയ്തു.

മയക്കുമരുന്ന് കേസിൽ ആറുപേർ അറസ്റ്റിൽ

നാർക്കോട്ടിക് കൺട്രോൾ ജനറൽ ഡിപ്പാർട്ട്‌മെന്റ് നാല് വ്യത്യസ്ത കേസുകളിലായി ആറുപേരെ അറസ്റ്റ് ചെയ്തു. മയക്കുമരുന്നും സൈക്കോട്രോപിക് വസ്തുക്കളും കൈവശംവെക്കുകയും വിൽപനയ്ക്കായി സൂക്ഷിക്കുകയും ചെയ്തതുമായി ബന്ധപ്പെട്ടായിരുന്നു നടപടി.

പരിശോധനയിൽ 410 ഗ്രാം ഷാബു, സിന്തറ്റിക് കെമിക്കൽ ലായനിയിൽ മുക്കിയ 175 ഷീറ്റുകൾ, 60 ഗ്രാം ഹാഷിഷ് എന്നിവ പിടിച്ചെടുത്തു. മയക്കുമരുന്ന് വിൽപനയിലൂടെ ലഭിച്ചതെന്ന് സംശയിക്കുന്ന 540 കുവൈത്ത് ദിനാറും കൃത്യമായ അളവ് തൂക്കുന്നതിനുള്ള രണ്ട് ത്രാസുകളും കണ്ടെത്തി.

ചൂതാട്ട കേന്ദ്രം നടത്തിയിരുന്ന 13 ഏഷ്യക്കാർ പിടിയിൽ

ഫർവാനിയയിൽ ലോട്ടറി മാതൃകയിൽ ചൂതാട്ടം നടത്തിയിരുന്ന സംഘത്തിലെ 13 ഏഷ്യൻ പൗരന്മാരെ ക്രിമിനൽ ഇൻവെസ്റ്റിഗേഷൻ ജനറൽ ഡിപ്പാർട്ട്‌മെന്റ് അറസ്റ്റ് ചെയ്തു. സംഘത്തിന്റെ മുഖ്യ സംഘാടകനെന്ന് സംശയിക്കുന്നയാളും പിടിയിലായവരിൽ ഉൾപ്പെടുന്നു.

ഒരു ഷോപ്പിങ് കോംപ്ലക്സിലെ രണ്ട് പലചരക്ക് കടകൾ കേന്ദ്രീകരിച്ചായിരുന്നു ചൂതാട്ട പ്രവർത്തനങ്ങൾ നടത്തിയിരുന്നതെന്ന് അന്വേഷണത്തിൽ കണ്ടെത്തിയതായി ആഭ്യന്തര മന്ത്രാലയം അറിയിച്ചു. ചൂതാട്ടത്തിനുപയോഗിച്ച ഉപകരണങ്ങൾ, രേഖകൾ, പണം എന്നിവയും പിടിച്ചെടുത്തു. വിൽപനയ്ക്കായി ഒളിപ്പിച്ചുവെച്ച നിരോധിത തമ്പാക് പുകയിലയും കണ്ടെത്തി.

സാൽമിയയിൽ വ്യാജ ഉൽപന്നങ്ങളുടെ ഗോഡൗണുകളിൽ പരിശോധന

ഹവല്ലി ഗവർണറേറ്റിലെ അന്വേഷണ വിഭാഗവും വാണിജ്യ വ്യവസായ മന്ത്രാലയം, കുവൈത്ത് മുനിസിപ്പാലിറ്റി, വൈദ്യുതി-ജല മന്ത്രാലയം, കുവൈത്ത് ഫയർഫോഴ്സ് എന്നിവയുടെ സംയുക്ത സമിതിയും ചേർന്ന് സാൽമിയയിലെ കെട്ടിടത്തിന്റെ ബേസ്മെന്റിലുള്ള ഗോഡൗണുകളിൽ പരിശോധന നടത്തി.

നിരവധി ഇന്ത്യൻ പൗരന്മാരെ ഇവിടെനിന്ന് അറസ്റ്റ് ചെയ്തു. വാടക കരാറുകളില്ലാതെ വിവിധ സ്റ്റോറേജ് യൂണിറ്റുകളായി വിഭജിച്ചായിരുന്നു ബേസ്മെന്റ് പ്രവർത്തിച്ചിരുന്നത്.

ഒരു യൂണിറ്റിൽ വ്യാജ ഉൽപന്നങ്ങൾ കണ്ടെത്തി. മറ്റ് രണ്ട് യൂണിറ്റുകളിൽ വെള്ളം പമ്പ് ചെയ്യുന്നതിനുള്ള ഉപകരണങ്ങളുടെയും വൈദ്യുത ഉപകരണങ്ങളുടെയും ഉൽപാദന രാജ്യം സംബന്ധിച്ച ലേബലുകൾ മാറ്റിയതായി കണ്ടെത്തി. വാണിജ്യ മന്ത്രാലയം നിയമലംഘനങ്ങൾ രജിസ്റ്റർ ചെയ്തു. ഫയർഫോഴ്സ് ബന്ധപ്പെട്ട യൂണിറ്റ് അടച്ചുപൂട്ടി സീൽ ചെയ്തു. പ്രതികളെ നിയമനടപടികൾക്കായി കൈമാറുകയും നാടുകടത്തൽ നടപടികൾക്ക് വിധേയരാക്കുകയും ചെയ്തു.

നിയമവിരുദ്ധ റേസിങ്; അഞ്ച് പേരുടെ വാഹനങ്ങൾ തകർത്തു

പൊതുനിരത്തുകളിൽ അപകടകരമായ രീതിയിൽ വാഹനമോടിക്കുകയും അനധികൃത റേസിങ് നടത്തുകയും ചെയ്ത അഞ്ച് ഡ്രൈവർമാരെയും ജനറൽ ട്രാഫിക് ഡിപ്പാർട്ട്‌മെന്റിന്റെ സെക്യൂരിറ്റി കൺട്രോൾ വിഭാഗം അറസ്റ്റ് ചെയ്തു.

ഇവരുടെ നിയമലംഘനങ്ങളുടെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതിനെത്തുടർന്നായിരുന്നു നടപടി. പിടിയിലായവർക്ക് പിഴ ചുമത്തുകയും സെൻട്രൽ ജയിലിലേക്ക് മാറ്റുകയും ചെയ്തു. ട്രാഫിക് നിയമത്തിലെ ആർട്ടിക്കിൾ 33 ബിസ് പ്രകാരം ഇവരുടെ വാഹനങ്ങൾ പിടിച്ചെടുത്ത് നശിപ്പിക്കുകയും ചെയ്തു.

അറസ്റ്റിലായ എല്ലാവരെയും പിടിച്ചെടുത്ത വസ്തുക്കളെയും തുടർ നിയമനടപടികൾക്കായി ബന്ധപ്പെട്ട അധികൃതർക്ക് കൈമാറിയതായി ആഭ്യന്തര മന്ത്രാലയം അറിയിച്ചു.

കൂടുതൽ കുവൈറ്റ് വാർത്തകൾക്ക് ചാനൽ ഇപ്പോൾ തന്നെ ഫോളോ ചെയ്യൂ