UAE Weather Alert: ദുബൈ: യുഎഇയുടെ വിവിധ ഭാഗങ്ങളിൽ ബുധൻ, വ്യാഴം ദിവസങ്ങളിൽ ശക്തമായ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. മഴയ്ക്കൊപ്പം മണിക്കൂറിൽ 45 കിലോമീറ്റർ വരെ വേഗത്തിൽ ശക്തമായ കാറ്റ് വീശാനും പൊടിക്കാറ്റ് ഉണ്ടാകാനും സാധ്യതയുണ്ട്. കടലിൽ തിരമാലകൾ ശക്തമാകുമെന്നും മുന്നറിയിപ്പുണ്ട്.

തിങ്കൾ മുതൽ വ്യാഴം വരെ രാജ്യത്ത് അസ്ഥിരമായ കാലാവസ്ഥയായിരിക്കുമെന്നാണ് കാലാവസ്ഥാ കേന്ദ്രത്തിന്റെ അഞ്ചുദിവസത്തെ പ്രവചനം. മേഘാവൃതമായ അന്തരീക്ഷം ശക്തമാകുന്നതോടെ വിവിധ പ്രദേശങ്ങളിൽ മഴ ലഭിക്കും. ഇതിനൊപ്പം താപനിലയിലും കുറവുണ്ടാകുമെന്ന് അധികൃതർ അറിയിച്ചു.

പടിഞ്ഞാറ് ഭാഗത്തുനിന്നുള്ള ന്യൂനമർദത്തിന്റെ സ്വാധീനവും അന്തരീക്ഷത്തിലെ ഉയർന്ന മേഖലകളിലുള്ള ന്യൂനമർദവുമാണ് കാലാവസ്ഥാ മാറ്റത്തിന് കാരണം.

തിങ്കളാഴ്ച നേരിയ മഴയ്ക്ക് സാധ്യത

തിങ്കളാഴ്ച രാജ്യത്തിന്റെ തീരപ്രദേശങ്ങളിലും ദ്വീപുകളിലും ആകാശം ഭാഗികമായും ചില സമയങ്ങളിൽ പൂർണമായും മേഘാവൃതമായിരിക്കും. ചിലയിടങ്ങളിൽ നേരിയ മഴയ്ക്കും സാധ്യതയുണ്ട്.

കാറ്റിന്റെ വേഗം തീരപ്രദേശങ്ങളിൽ മണിക്കൂറിൽ 40 കിലോമീറ്റർ വരെയും ഉൾനാടൻ പ്രദേശങ്ങളിലും പർവത മേഖലകളിലും 35 കിലോമീറ്റർ വരെയും എത്താം.

ഉൾനാടൻ പ്രദേശങ്ങളിൽ താപനില 34 മുതൽ 38 ഡിഗ്രി സെൽഷ്യസ് വരെയും തീരപ്രദേശങ്ങളിലും ദ്വീപുകളിലും 32 മുതൽ 36 ഡിഗ്രി വരെയും പർവത മേഖലകളിൽ 25 മുതൽ 30 ഡിഗ്രി വരെയും ആയിരിക്കും.

അറേബ്യൻ ഗൾഫിൽ കടൽ നേരിയതോ മിതമായതോ ആയിരിക്കും. ചൊവ്വാഴ്ച രാവിലെയോടെ ചില സമയങ്ങളിൽ കടൽ പ്രക്ഷുബ്ധമാകാനും സാധ്യതയുണ്ട്. ഒമാൻ കടലിൽ സ്ഥിതി പൊതുവെ ശാന്തമായിരിക്കും.

ചൊവ്വാഴ്ചയും മഴ തുടരും

ചൊവ്വാഴ്ചയും ഭാഗികമായി മേഘാവൃതമായ കാലാവസ്ഥ തുടരും. ദ്വീപുകളിലും തീരദേശ, വടക്കൻ മേഖലകളിലെ ചില ഭാഗങ്ങളിലും നേരിയ മഴ ലഭിച്ചേക്കാം. താപനില കുറയാനും വടക്കുപടിഞ്ഞാറൻ കാറ്റ് മണിക്കൂറിൽ 40 കിലോമീറ്റർ വരെ വേഗത്തിൽ വീശാനും സാധ്യതയുണ്ട്.

അറേബ്യൻ ഗൾഫിൽ കടൽ മിതമായതോ പ്രക്ഷുബ്ധമായതോ ആയിരിക്കും.

ബുധൻ, വ്യാഴം ദിവസങ്ങളിൽ ശക്തമായ മഴ

ബുധനാഴ്ചയോടെ കാലാവസ്ഥ കൂടുതൽ ശക്തമാകുമെന്നാണ് പ്രവചനം. ഇടിമേഘങ്ങൾ രൂപപ്പെടുന്നതോടെ രാജ്യത്തിന്റെ വിവിധ ഭാഗങ്ങളിൽ ഇടവിട്ടുള്ള മഴ ലഭിക്കും. ചില പ്രദേശങ്ങളിൽ ശക്തമായ മഴയ്ക്കും സാധ്യതയുണ്ട്.

തെക്കുകിഴക്കൻ കാറ്റ് വടക്കുപടിഞ്ഞാറൻ കാറ്റായി മാറുകയും ചില സമയങ്ങളിൽ ശക്തമായി വീശുകയും ചെയ്യും. കാറ്റിന്റെ വേഗം മണിക്കൂറിൽ 45 കിലോമീറ്റർ വരെ എത്താം. ഇതുമൂലം പൊടിപടലങ്ങൾ ഉയരാനും സാധ്യതയുണ്ട്.

അറേബ്യൻ ഗൾഫിലും ഒമാൻ കടലിലും ചില സമയങ്ങളിൽ കടൽ പ്രക്ഷുബ്ധമാകുകയോ അതിശക്തമായ തിരമാലകൾ ഉണ്ടാകുകയോ ചെയ്യാം.

വ്യാഴാഴ്ചയും സമാനമായ കാലാവസ്ഥ തുടരുമെന്നാണ് മുന്നറിയിപ്പ്. വിവിധ പ്രദേശങ്ങളിൽ വീണ്ടും മഴ ലഭിക്കാനും ചിലയിടങ്ങളിൽ ശക്തമായ മഴ പെയ്യാനും സാധ്യതയുണ്ട്. വ്യാഴാഴ്ച താപനിലയിൽ നേരിയ കുറവുണ്ടാകുമെന്നും ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു.