UAE work permit changes : അബുദാബി: യുഎഇയിലെ തൊഴിൽ നടപടിക്രമങ്ങൾ കൂടുതൽ ലളിതമാക്കുന്നതിന്റെ ഭാഗമായി 13 തരം വർക്ക് പെർമിറ്റുകൾക്കുള്ള രേഖകളും വിവരങ്ങൾ സമർപ്പിക്കേണ്ട ആവശ്യകതകളും വെട്ടിക്കുറച്ച് മാനവ വിഭവശേഷി, സ്വദേശിവൽക്കരണ മന്ത്രാലയം (MoHRE). സർക്കാരിന്റെ സീറോ ബ്യൂറോക്രസി പദ്ധതിയുടെ ഭാഗമായാണ് പുതിയ പരിഷ്കാരങ്ങൾ നടപ്പാക്കുന്നത്.
വർക്ക് പെർമിറ്റുകൾക്കായി സമർപ്പിക്കേണ്ട അനുബന്ധ രേഖകളുടെ ആവശ്യകതകൾ ഒഴിവാക്കുകയും ചില പെർമിറ്റുകൾക്ക് ആവശ്യമായ ഡാറ്റാ ഫീൽഡുകളുടെ എണ്ണം 75 ശതമാനം മുതൽ 97 ശതമാനം വരെ കുറയ്ക്കുകയും ചെയ്തിട്ടുണ്ട്. അപേക്ഷാ നടപടികൾ വേഗത്തിലാക്കാനും തൊഴിലുടമകൾക്കും ജീവനക്കാർക്കും ഉണ്ടാകുന്ന ഭരണപരമായ ബുദ്ധിമുട്ടുകൾ കുറയ്ക്കാനുമാണ് ഈ നീക്കം.
വർക്ക് പെർമിറ്റ് സേവനങ്ങളിൽ പുതിയ ഘട്ടത്തിലുള്ള പരിഷ്കാരങ്ങളാണ് മന്ത്രാലയം നടപ്പാക്കിയിരിക്കുന്നത്. നടപടിക്രമങ്ങൾ പുനഃക്രമീകരിക്കുക, ഡിജിറ്റൽ സേവനങ്ങൾ വിപുലീകരിക്കുക, അപേക്ഷകൾ വേഗത്തിൽ പൂർത്തിയാക്കുക എന്നിവയാണ് പ്രധാന ലക്ഷ്യങ്ങൾ.
പൊതുജനങ്ങളിൽ നിന്ന് അഭിപ്രായങ്ങൾ തേടി
നിലവിലുള്ള വർക്ക് പെർമിറ്റ് സേവനങ്ങൾ കൂടുതൽ ലളിതവും കാര്യക്ഷമവുമാക്കുന്നതിനായി പൊതുജനങ്ങളിൽ നിന്നും ഉപഭോക്താക്കളിൽ നിന്നും മന്ത്രാലയം നിർദേശങ്ങളും അഭിപ്രായങ്ങളും തേടിയിട്ടുണ്ട്. ജൂലൈ 30 വരെ ഓൺലൈനായി അഭിപ്രായങ്ങൾ സമർപ്പിക്കാനാണ് അവസരം നൽകിയിരിക്കുന്നത്.
ലഭിക്കുന്ന നിർദേശങ്ങൾ പരിഗണിച്ച് വർക്ക് പെർമിറ്റ് സേവനങ്ങളിൽ കൂടുതൽ മാറ്റങ്ങൾ വരുത്തുന്നതിനുള്ള അടുത്ത ഘട്ടങ്ങൾ തീരുമാനിക്കുമെന്ന് മന്ത്രാലയം അറിയിച്ചു.
ഡിജിറ്റൽ സംവിധാനത്തിലൂടെ അപേക്ഷിക്കാം
തൊഴിലുടമകൾക്കും ഉപഭോക്താക്കൾക്കും ഏകീകൃത ഡിജിറ്റൽ ചാനലുകൾ വഴി വർക്ക് പെർമിറ്റ് സേവനങ്ങൾ ലഭ്യമാക്കിയിട്ടുണ്ട്. ഓൺലൈനായി അപേക്ഷകൾ സമർപ്പിക്കാനും പുതുക്കിയ നടപടിക്രമങ്ങൾ സംബന്ധിച്ച വിവരങ്ങൾ അറിയാനും ഇതിലൂടെ സാധിക്കും.
തൊഴിൽ നടപടികൾ വേഗത്തിലാക്കുന്നതിനൊപ്പം തൊഴിലാളികളുടെ അവകാശങ്ങൾ സംരക്ഷിക്കുകയും സ്വകാര്യ മേഖലയിലെ സ്ഥാപനങ്ങൾക്ക് കൂടുതൽ സൗകര്യമൊരുക്കുകയും ചെയ്യുകയാണ് പരിഷ്കാരങ്ങളുടെ ലക്ഷ്യം.
യുഎഇയിലെ 13 തരം വർക്ക് പെർമിറ്റുകൾ ഏതൊക്കെയാണ്?
MoHRE വിവിധ തൊഴിൽ ആവശ്യങ്ങൾക്കായി 13 വിഭാഗങ്ങളിലുള്ള വർക്ക് പെർമിറ്റുകളാണ് നൽകുന്നത്. ഇവയുടെ വിശദാംശങ്ങൾ താഴെ:
- പ്രൈവറ്റ് ട്യൂട്ടറിംഗ് വർക്ക് പെർമിറ്റ്: ബാധകമായ നിയമങ്ങൾക്കും നിബന്ധനകൾക്കും വിധേയമായി സ്വകാര്യ ട്യൂഷൻ നൽകാൻ വ്യക്തികളെ അനുവദിക്കുന്ന പെർമിറ്റ്.
- യുഎഇക്ക് പുറത്തുനിന്നുള്ള തൊഴിലാളികളെ നിയമിക്കുന്നതിനുള്ള പെർമിറ്റ്: വിദേശ രാജ്യങ്ങളിൽ നിന്നുള്ള തൊഴിലാളികളെ റിക്രൂട്ട് ചെയ്യാൻ സ്ഥാപനങ്ങളെ അനുവദിക്കുന്നു. സാധാരണയായി രണ്ട് വർഷമാണ് കാലാവധി.
- ട്രാൻസ്ഫർ വർക്ക് പെർമിറ്റ്: മുൻ തൊഴിൽ ബന്ധം അവസാനിച്ച ശേഷം യുഎഇയിൽ നിലവിലുള്ള താമസക്കാരെ മറ്റൊരു സ്ഥാപനത്തിൽ നിയമിക്കാൻ സഹായിക്കുന്ന പെർമിറ്റ്. രണ്ട് വർഷമാണ് കാലാവധി.
- കുടുംബ സ്പോൺസർഷിപ്പിലുള്ള താമസക്കാർക്കുള്ള വർക്ക് പെർമിറ്റ്: കുടുംബാംഗങ്ങളുടെ സ്പോൺസർഷിപ്പിൽ യുഎഇയിൽ താമസിക്കുന്ന പ്രവാസികൾക്ക് സ്ഥാപനങ്ങളിൽ ജോലി ചെയ്യാൻ അനുവദിക്കുന്നു. രണ്ട് വർഷമാണ് കാലാവധി.
- താൽക്കാലിക വർക്ക് പെർമിറ്റ്: മറ്റൊരു സ്ഥാപനത്തിലെ ജീവനക്കാരനെ നിശ്ചിത കാലയളവിലേക്ക് താൽക്കാലികമായി ജോലിക്കെടുക്കാൻ അനുവദിക്കുന്നു. ജോലി പൂർത്തിയായാൽ ജീവനക്കാരൻ യഥാർത്ഥ തൊഴിലുടമയുടെ അടുത്തേക്ക് മടങ്ങും.
- മിഷൻ വർക്ക് പെർമിറ്റ്: പ്രത്യേക പ്രോജക്ടുകൾക്കും താൽക്കാലിക ജോലികൾക്കുമായി വിദേശത്തുനിന്ന് തൊഴിലാളികളെ നിയമിക്കാൻ സ്ഥാപനങ്ങൾക്ക് അവസരം നൽകുന്നു.
- പാർട്ട് ടൈം വർക്ക് പെർമിറ്റ്: പാർട്ട് ടൈം കരാർ അടിസ്ഥാനത്തിൽ ജീവനക്കാരെ നിയമിക്കാൻ അനുവദിക്കുന്നു. നിയമപരമായ വ്യവസ്ഥകൾ പാലിച്ചുകൊണ്ട് ഒരാൾക്ക് ഒന്നിലധികം തൊഴിലുടമകൾക്ക് കീഴിൽ ജോലി ചെയ്യാനും സാധിക്കും. രണ്ട് വർഷമാണ് പെർമിറ്റിന്റെ കാലാവധി.
യുവ തൊഴിലാളികൾക്കും വിദ്യാർഥികൾക്കും പെർമിറ്റുകൾ
- ജുവനൈൽ വർക്ക് പെർമിറ്റ്: 15 മുതൽ 18 വയസ്സുവരെയുള്ള യുവാക്കളെ നിയമിക്കാൻ സ്ഥാപനങ്ങളെ അനുവദിക്കുന്നു. പ്രായപൂർത്തിയാകാത്ത തൊഴിലാളികളുടെ സുരക്ഷ ഉറപ്പാക്കാൻ പ്രത്യേക നിബന്ധനകൾ ബാധകമാണ്.
- സ്റ്റുഡന്റ് ട്രെയിനിംഗ് ആൻഡ് എംപ്ലോയ്‌മെന്റ് പെർമിറ്റ്: യുഎഇയിൽ താമസിക്കുന്ന 15 വയസ്സോ അതിൽ കൂടുതലോ പ്രായമുള്ള വിദ്യാർഥികൾക്ക് പരിശീലനം നൽകാനും ജോലി ചെയ്യാനും അവസരമൊരുക്കുന്നു. യുഎഇ പൗരന്മാർക്കും പ്രവാസി വിദ്യാർഥികൾക്കും ഇത് ബാധകമാണ്.
യുഎഇ, ജിസിസി പൗരന്മാർക്കുള്ള പെർമിറ്റുകൾ
- യുഎഇ, ജിസിസി പൗരന്മാർക്കുള്ള വർക്ക് പെർമിറ്റ്: യുഎഇയിലെയും മറ്റ് ഗൾഫ് സഹകരണ കൗൺസിൽ (GCC) രാജ്യങ്ങളിലെയും പൗരന്മാരെ നിയമിക്കാൻ സ്ഥാപനങ്ങളെ അനുവദിക്കുന്നു. രണ്ട് വർഷമാണ് കാലാവധി.
- ഗോൾഡൻ റെസിഡൻസി വർക്ക് പെർമിറ്റ്: യുഎഇ ഗോൾഡൻ വിസയുള്ള വ്യക്തികളെ നിയമിക്കുന്നതിന് മന്ത്രാലയത്തിൽ രജിസ്റ്റർ ചെയ്ത സ്ഥാപനങ്ങൾക്ക് ലഭിക്കുന്ന പെർമിറ്റാണിത്.
- നാഷണൽ ട്രെയിനി വർക്ക് പെർമിറ്റ്: യുഎഇ പൗരന്മാർക്ക് അവരുടെ അക്കാദമിക് യോഗ്യതകൾക്ക് അനുയോജ്യമായ പരിശീലനം നൽകാൻ സ്ഥാപനങ്ങളെ അനുവദിക്കുന്നു.
- ഫ്രീലാൻസ് വർക്ക് പെർമിറ്റ്: ഒരു പ്രത്യേക തൊഴിലുടമയുടെയോ സ്ഥാപനത്തിന്റെയോ സ്പോൺസർഷിപ്പില്ലാതെ സ്വതന്ത്രമായി ജോലി ചെയ്യാൻ വ്യക്തികളെ അനുവദിക്കുന്നു. സ്വന്തം റെസിഡൻസി സ്പോൺസർഷിപ്പിലുള്ള വിദേശികൾക്കും നിബന്ധനകൾക്ക് വിധേയമായി ഫ്രീലാൻസ് ജോലികൾ ചെയ്യാം.
പ്രവാസികൾ അറിയേണ്ടത്
യുഎഇയിലെ തൊഴിൽ നടപടികൾ കൂടുതൽ ലളിതമാക്കുന്നതിനും സർക്കാർ സേവനങ്ങൾ ഡിജിറ്റൽ സംവിധാനത്തിലൂടെ ലഭ്യമാക്കുന്നതിനുമുള്ള ശ്രമങ്ങളുടെ ഭാഗമാണ് പുതിയ പരിഷ്കാരങ്ങൾ. വർക്ക് പെർമിറ്റ് അപേക്ഷകളിൽ രേഖകൾ സമർപ്പിക്കേണ്ട ആവശ്യകതകൾ കുറയുന്നതോടെ തൊഴിലുടമകൾക്കും ജീവനക്കാർക്കും നടപടികൾ കൂടുതൽ എളുപ്പമാകുമെന്നാണ് പ്രതീക്ഷിക്കുന്നത്.
പെർമിറ്റുകളുടെ യോഗ്യത, ആവശ്യമായ നിബന്ധനകൾ, അപേക്ഷാ നടപടികൾ എന്നിവയെക്കുറിച്ചുള്ള ഔദ്യോഗിക വിവരങ്ങൾക്ക് MoHRE വെബ്സൈറ്റ് സന്ദർശിക്കാം.
