Qatar Prime Minister Meets Trump at White House ദോഹ: അമേരിക്കൻ പ്രസിഡന്റ് ഡോണൾഡ് ട്രംപുമായി കൂടിക്കാഴ്ച നടത്തി ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുറഹ്മാൻ ബിൻ ജാസിം അൽതാനി. വാഷിങ്ടണിലെ വൈറ്റ് ഹൗസിൽ നടന്ന കൂടിക്കാഴ്ചയിൽ അമേരിക്കയും ഇറാനും തമ്മിലുള്ള ചർച്ചകൾ മുന്നോട്ടുകൊണ്ടുപോകുന്നതിനുള്ള മാർഗങ്ങളും പശ്ചിമേഷ്യയിലെ നിലവിലെ സാഹചര്യങ്ങളും പ്രധാന വിഷയങ്ങളായി.
അമേരിക്കൻ വൈസ് പ്രസിഡന്റ് ജെ.ഡി. വാൻസും കൂടിക്കാഴ്ചയിൽ പങ്കെടുത്തു. മേഖലയിലെ സംഘർഷങ്ങൾ അവസാനിപ്പിക്കുന്നതിനും സമാധാന കരാറിലെത്തുന്നതിനുമുള്ള നയതന്ത്ര ശ്രമങ്ങൾ സംബന്ധിച്ചും നേതാക്കൾ ചർച്ച നടത്തി.
കൂടിക്കാഴ്ചയ്ക്ക് ശേഷം ഖത്തർ പ്രധാനമന്ത്രി എക്സിലൂടെ (X) സന്തോഷം പങ്കുവെച്ചു. അമേരിക്കൻ പ്രസിഡന്റിനെയും വൈസ് പ്രസിഡന്റിനെയും വാഷിങ്ടണിൽ കാണാൻ കഴിഞ്ഞതിൽ സന്തോഷമുണ്ടെന്ന് അദ്ദേഹം വ്യക്തമാക്കി. മേഖലയിലെ സാഹചര്യങ്ങളും യുഎസ്–ഇറാൻ ചർച്ചകൾ മുന്നോട്ടുകൊണ്ടുപോകുന്നതിനുള്ള വഴികളും ചർച്ച ചെയ്തതായും കരാറിലെത്താനും മേഖലയിൽ സമാധാനം കൊണ്ടുവരാനും ലക്ഷ്യമിട്ടുള്ള ക്രിയാത്മക ചർച്ചകൾക്ക് നന്ദി അറിയിക്കുന്നതായും അദ്ദേഹം കുറിച്ചു.
ഇറാനും അമേരിക്കയും തമ്മിലുള്ള സംഘർഷം അവസാനിപ്പിക്കുന്നതിനുള്ള നയതന്ത്ര നീക്കങ്ങളിൽ ഖത്തർ പ്രധാന പങ്കാണ് വഹിക്കുന്നത്. ഇരുപക്ഷത്തിനുമിടയിൽ സന്ദേശങ്ങൾ കൈമാറുന്നതിനും അഭിപ്രായവ്യത്യാസങ്ങൾ പരിഹരിക്കുന്നതിനും ഖത്തർ ഇടപെടുന്നുണ്ട്.
മേഖലയിലെ സംഘർഷം കുറയ്ക്കുന്നതിനും ദീർഘകാല സമാധാനവും സ്ഥിരതയും ഉറപ്പാക്കുന്നതിനും നയതന്ത്ര ചർച്ചകൾ തുടരേണ്ടതിന്റെ പ്രാധാന്യം കൂടിക്കാഴ്ചയിൽ വീണ്ടും ശ്രദ്ധയിൽപ്പെട്ടു. യുഎസ്–ഇറാൻ ചർച്ചകൾക്ക് പുതിയ മുന്നേറ്റമുണ്ടാക്കാൻ കൂടിക്കാഴ്ച സഹായിക്കുമെന്ന പ്രതീക്ഷയിലാണ് മേഖലയുടെ ശ്രദ്ധ.
