Qatar Denies $500000 Payment Claims in US വാഷിങ്ടൺ: അമേരിക്കൻ രാഷ്ട്രീയ ഉപദേഷ്ടാവ് അലക്സ് ബ്രൂസെവിറ്റ്സിന് ഖത്തറുമായി ബന്ധമുള്ള വ്യക്തികളിൽനിന്ന് അഞ്ച് ലക്ഷം ഡോളർ ലഭിച്ചെന്ന ആരോപണം തള്ളി അമേരിക്കയിലെ ഖത്തർ എംബസി. ആരോപണം അടിസ്ഥാനരഹിതവും തെറ്റുമാണെന്ന് എംബസി വ്യക്തമാക്കി.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ 2024ലെ തിരഞ്ഞെടുപ്പ് പ്രചാരണവുമായി ബന്ധപ്പെട്ട് പ്രവർത്തിച്ചിരുന്ന രാഷ്ട്രീയ കൺസൾട്ടന്റാണ് അലക്സ് ബ്രൂസെവിറ്റ്സ്. അദ്ദേഹത്തിന്റെ മുൻ ബിസിനസ് പങ്കാളിയായ ഡെറക് അറ്റ്‌ലിയാണ് ഫ്ലോറിഡയിലെ കോടതിയിൽ സമർപ്പിച്ച സിവിൽ കേസിൽ പണമിടപാട് ആരോപണം ഉന്നയിച്ചത്.
ഖത്തറുമായി ബന്ധമുള്ള വ്യക്തികളിൽനിന്ന് ഏകദേശം 5,00,000 ഡോളർ ലഭിച്ചെന്നാണ് അറ്റ്‌ലിയുടെ ആരോപണം. വെളിപ്പെടുത്താത്ത ബിസിനസ് അല്ലെങ്കിൽ കൺസൾട്ടിങ് കരാറിന്റെ ഭാഗമായാണ് പണം ലഭിച്ചതെന്നും അദ്ദേഹം ആരോപിച്ചു.
എന്നാൽ, ഖത്തർ ഭരണകൂടത്തിൽനിന്നോ ഭരണകൂടത്തിന്റെ നിർദേശപ്രകാരമോ ബ്രൂസെവിറ്റ്സിന് യാതൊരു പണവും ലഭിച്ചിട്ടില്ലെന്ന് എംബസി വ്യക്തമാക്കി. ആരോപണത്തിന് പിന്തുണ നൽകുന്ന തെളിവുകളൊന്നും ചൂണ്ടിക്കാട്ടിയിട്ടില്ലെന്നും എംബസി പ്രസ്താവനയിൽ പറഞ്ഞു.
അന്വേഷണവുമായി ബന്ധപ്പെട്ട റിപ്പോർട്ട് പ്രസിദ്ധീകരിക്കുന്നതിന് മുമ്പ് ഖത്തറിന്റെ ഔദ്യോഗിക പ്രതിനിധികളോട് പ്രതികരണം തേടാത്തതിൽ ന്യൂയോർക്ക് ടൈംസിനെയും എംബസി വിമർശിച്ചു. കോടതിയിൽ തെറ്റായ വിവരങ്ങൾ നൽകിയെന്നാരോപിച്ച് അത് തിരുത്തണമെന്ന് അറ്റ്‌ലിയുടെ അഭിഭാഷകരോട് ആവശ്യപ്പെട്ടതായും എംബസി അറിയിച്ചു.
അതേസമയം, ആരോപണങ്ങൾ അടിസ്ഥാനരഹിതമാണെന്നും കോടതിയിൽ ശക്തമായി പ്രതിരോധിക്കുമെന്നും ബ്രൂസെവിറ്റ്സിന്റെ അഭിഭാഷകൻ ബ്രാഡ്‌ഫോർഡ് കോഹൻ അറിയിച്ചു. ആരോപണങ്ങൾ സംബന്ധിച്ച് ഇതുവരെ തെളിവുകൾ പുറത്തുവന്നിട്ടില്ല. കേസ് കോടതിയുടെ പരിഗണനയിലാണ്.
