Fujairah Road Accident ഫുജൈറ: യുഎഇയിലെ ഫുജൈറയിലുണ്ടായ ദാരുണമായ വാഹനാപകടത്തിൽ മലയാളി കുടുംബത്തിലെ മൂന്ന് പേർ മരിച്ചു. 21 വയസ്സുള്ള ഇരട്ട സഹോദരങ്ങളായ മുഹമ്മദ് അസ്മിൽ, സഹോദരി മിസ്ന ജുബിൻ, ഇവരുടെ ബന്ധു മൂന്ന് വയസ്സുകാരനായ മുഹമ്മദ് ഫായിസ് എന്നിവരാണ് മരിച്ചത്. അപകടത്തിൽ പരിക്കേറ്റ കുടുംബത്തിലെ മറ്റ് നാല് പേർ ആശുപത്രിയിൽ ചികിത്സയിലാണ്. ഇവരുടെ ആരോഗ്യനില അപകടനില തരണം ചെയ്തതായി കുടുംബാംഗങ്ങൾ അറിയിച്ചതായി റിപ്പോർട്ടുകളുണ്ട്.
മലപ്പുറം ജില്ലയിലെ എ.ആർ നഗർ സ്വദേശിയായ സിദ്ദീഖിന്റെ മക്കളാണ് മരിച്ച ഇരട്ട സഹോദരങ്ങൾ. ഇവർ ഏറെക്കാലമായി ഫുജൈറയിലാണ് താമസിച്ചിരുന്നത്. സിദ്ദീഖിന്റെ മൂത്ത മകളുടെ മകനാണ് അപകടത്തിൽ മരിച്ച മൂന്ന് വയസ്സുകാരൻ ഫായിസ്.
ഷാർജയിൽനിന്ന് മടങ്ങുന്നതിനിടെ അപകടം
കുടുംബം ഷാർജയിൽനിന്ന് ഫുജൈറയിലെ വീട്ടിലേക്ക് മടങ്ങുന്നതിനിടെയാണ് അപകടമുണ്ടായത്. ബുധനാഴ്ച രാത്രി അർധരാത്രിയോടെയായിരുന്നു സംഭവം. കുടുംബാംഗങ്ങൾ സഞ്ചരിച്ചിരുന്ന കാർ ഒരു ട്രക്കുമായി കൂട്ടിയിടിക്കുകയായിരുന്നുവെന്നാണ് പ്രാഥമിക വിവരം. കാർ ഓടിച്ചിരുന്നത് മരിച്ച ഇരട്ട സഹോദരങ്ങളിൽ ഒരാളായ 21കാരനായിരുന്നു.
അപകടത്തിൽ മൂത്ത മകൾക്കും മറ്റ് മൂന്ന് കുട്ടികൾക്കും പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചു. പരിക്കേറ്റവരുടെ ആരോഗ്യനിലയിൽ ആശ്വാസകരമായ പുരോഗതിയുണ്ടെന്നാണ് കുടുംബാംഗങ്ങൾ അറിയിച്ചത്.
ട്രക്കും നിരവധി വാഹനങ്ങളും കൂട്ടിയിടിച്ചു
ഫുജൈറയിലേക്കുള്ള പ്രവേശന കവാടത്തിന് സമീപം ശൈഖ് ഖലീഫ ബിൻ സായിദ് റോഡിലാണ് ട്രക്കും നിരവധി വാഹനങ്ങളും ഉൾപ്പെട്ട ഗുരുതര അപകടമുണ്ടായതെന്ന് ഫുജൈറ പൊലീസ് അറിയിച്ചു. അർധരാത്രിക്ക് ശേഷമാണ് അപകടം നടന്നത്. അപകടത്തിൽ നിരവധി പേർ മരിക്കുകയും മറ്റുള്ളവർക്ക് പരിക്കേൽക്കുകയും ചെയ്തതായി പൊലീസ് സ്ഥിരീകരിച്ചു.
വിവരമറിഞ്ഞ ഉടൻ പൊലീസ്, ആംബുലൻസ്, സിവിൽ ഡിഫൻസ് വിഭാഗങ്ങളിലെ പ്രത്യേക സംഘങ്ങൾ സ്ഥലത്തെത്തി. പരിക്കേറ്റവർക്ക് പ്രാഥമിക ചികിത്സ നൽകിയ ശേഷം ആശുപത്രികളിലേക്ക് മാറ്റി. അപകടസ്ഥലത്ത് സുരക്ഷാ നടപടികൾ സ്വീകരിക്കുകയും ഗതാഗതം നിയന്ത്രിക്കുകയും ചെയ്തു.
അപകടകാരണം അന്വേഷിക്കുന്നു
അപകടത്തിന്റെ സാഹചര്യങ്ങളും കാരണങ്ങളും കണ്ടെത്തുന്നതിനായി ബന്ധപ്പെട്ട അധികൃതർ അന്വേഷണം ആരംഭിച്ചിട്ടുണ്ട്. അപകടത്തിൽപ്പെട്ട വാഹനങ്ങളുടെയും യാത്രക്കാരുടെയും കൃത്യമായ വിവരങ്ങൾ പരിശോധിച്ചുവരികയാണ്.
അപകടത്തെക്കുറിച്ച് സ്ഥിരീകരിക്കാത്ത വിവരങ്ങളും അഭ്യൂഹങ്ങളും പ്രചരിപ്പിക്കരുതെന്ന് ഫുജൈറ പൊലീസ് പൊതുജനങ്ങളോട് അഭ്യർഥിച്ചു. മരണസംഖ്യയും പരിക്കേറ്റവരുടെ വിവരങ്ങളും ഉൾപ്പെടെയുള്ള കാര്യങ്ങൾ ഔദ്യോഗിക സ്രോതസ്സുകളിൽനിന്ന് മാത്രം അറിയണമെന്നും പൊലീസ് നിർദേശിച്ചു.
റോഡ് നിയമങ്ങൾ കർശനമായി പാലിക്കുക, അനുവദനീയമായ വേഗപരിധി മറികടക്കാതിരിക്കുക, വാഹനങ്ങൾക്കിടയിൽ സുരക്ഷിത അകലം നിലനിർത്തുക തുടങ്ങിയ നിർദേശങ്ങളും പൊലീസ് ആവർത്തിച്ചു.
