Kuwait MOI Warns Against Fake WhatsApp Alerts കുവൈത്തിൽ ആഭ്യന്തര മന്ത്രാലയത്തിന്റെ പേരും ഔദ്യോഗിക ചിഹ്നങ്ങളും ദുരുപയോഗം ചെയ്ത് ബാങ്ക് ഉപഭോക്താക്കളെ ലക്ഷ്യമിട്ട് വ്യാജ സന്ദേശങ്ങൾ പ്രചരിക്കുന്നു. ബാങ്ക് അക്കൗണ്ടുകളിൽ സംശയാസ്പദമായ ഇടപാടുകൾ കണ്ടെത്തിയെന്ന വ്യാജേനയാണ് തട്ടിപ്പുകാർ ആളുകളെ സമീപിക്കുന്നത്. വാട്‌സ്ആപ്പ് വഴിയാണ് ഇത്തരം വ്യാജ രേഖകളും സന്ദേശങ്ങളും പ്രചരിപ്പിക്കുന്നത്. ബാങ്ക് വിവരങ്ങളും സ്ഥിരീകരണ കോഡുകളും കൈക്കലാക്കി സാമ്പത്തിക തട്ടിപ്പ് നടത്തുകയാണ് ലക്ഷ്യമെന്ന് അധികൃതർ മുന്നറിയിപ്പ് നൽകി.
മന്ത്രാലയത്തിന്റെ പേരിൽ വ്യാജ രേഖകൾ
ആഭ്യന്തര മന്ത്രാലയത്തിന്റെയും മന്ത്രിയുടെയും പേരും ഔദ്യോഗിക തിരിച്ചറിയൽ ചിഹ്നങ്ങളും ഉൾപ്പെടുത്തിയ വ്യാജ രേഖകളാണ് പ്രചരിക്കുന്നത്. ബാങ്ക് അക്കൗണ്ടിൽ സംശയാസ്പദമായ പ്രവർത്തനങ്ങൾ കണ്ടെത്തിയിട്ടുണ്ടെന്നും കൂടുതൽ പരിശോധനയ്ക്കായി ബാങ്കിങ് വിവരങ്ങൾ നൽകണമെന്നുമാണ് സന്ദേശങ്ങളിലൂടെ ആവശ്യപ്പെടുന്നത്.
എന്നാൽ ഇത്തരം രേഖകൾ മന്ത്രാലയം പുറത്തിറക്കിയതല്ലെന്ന് അധികൃതർ വ്യക്തമാക്കി. സംഭവത്തിൽ ആഭ്യന്തര മന്ത്രാലയത്തിന് കീഴിലുള്ള സൈബർ ക്രൈം വിഭാഗം അന്വേഷണം ആരംഭിച്ചിട്ടുണ്ട്. കുറ്റക്കാർക്കെതിരെ നിയമനടപടി സ്വീകരിക്കുമെന്നും മന്ത്രാലയം അറിയിച്ചു.
ബാങ്ക് വിവരങ്ങളും ഒടിപിയും കൈമാറരുത്
സംശയാസ്പദമായ സന്ദേശങ്ങളോട് പ്രതികരിക്കരുതെന്നും ബാങ്ക് അക്കൗണ്ട് വിവരങ്ങൾ, കാർഡ് നമ്പർ, രഹസ്യനമ്പർ, ഒറ്റത്തവണ പാസ്‌വേഡ് (ഒടിപി), മറ്റ് സ്ഥിരീകരണ കോഡുകൾ എന്നിവ ആരുമായും പങ്കുവെക്കരുതെന്നും അധികൃതർ മുന്നറിയിപ്പ് നൽകി.
ബാങ്കുകളുമായോ സർക്കാർ സ്ഥാപനങ്ങളുമായോ ബന്ധപ്പെട്ടാണെന്ന് അവകാശപ്പെട്ട് ആരെങ്കിലും ഇത്തരം വിവരങ്ങൾ ആവശ്യപ്പെട്ടാൽ ജാഗ്രത പാലിക്കണം. സംശയകരമായ സന്ദേശങ്ങളിലെ ലിങ്കുകൾ തുറക്കാതെ ബന്ധപ്പെട്ട സ്ഥാപനങ്ങളുടെ ഔദ്യോഗിക മാർഗങ്ങളിലൂടെ വിവരങ്ങൾ സ്ഥിരീകരിക്കണമെന്നും നിർദേശമുണ്ട്.
സാമ്പത്തിക വിവരങ്ങൾ കൈമാറുന്നതിന് മുമ്പ് സന്ദേശത്തിന്റെ വിശ്വാസ്യത ഉറപ്പാക്കണം. തട്ടിപ്പിന് ഇരയായതായി സംശയമുണ്ടെങ്കിൽ ഉടൻ ബാങ്കുമായി ബന്ധപ്പെടുകയും ബന്ധപ്പെട്ട അധികാരികളെ വിവരം അറിയിക്കുകയും വേണം.
