
Qatar Restaurant Closures : കുവൈത്ത് സിറ്റി: സർക്കാർ സബ്സിഡി നിരക്കിൽ വിതരണം ചെയ്യുന്ന ഉൽപ്പന്നങ്ങൾ ഔദ്യോഗിക അനുമതിയില്ലാതെ വിൽപ്പന നടത്തിയ ഗ്രോസറി കടയ്ക്കെതിരെ കുവൈത്ത് അധികൃതർ നിയമനടപടി സ്വീകരിച്ചു. വാണിജ്യ മന്ത്രാലയത്തിന് കീഴിലുള്ള വാണിജ്യ നിയന്ത്രണ, ഉപഭോക്തൃ സംരക്ഷണ വിഭാഗം നടത്തിയ മിന്നൽ പരിശോധനയിലാണ് നിയമലംഘനം കണ്ടെത്തിയത്.
സർക്കാർ സാമ്പത്തിക സഹായത്തോടെ പൗരന്മാർക്കായി വിതരണം ചെയ്യുന്ന ഭക്ഷ്യവസ്തുക്കളും മറ്റ് ഉൽപ്പന്നങ്ങളും ആവശ്യമായ അനുമതിയില്ലാതെ കടയിൽ വിൽപ്പന നടത്തിയതായി പരിശോധനയിൽ വ്യക്തമായി.
2014-ലെ മന്ത്രിതല ഉത്തരവ് നമ്പർ 216-ന്റെ നാലാം അനുച്ഛേദം പ്രകാരം സർക്കാർ സബ്സിഡി ലഭിക്കുന്ന ഉൽപ്പന്നങ്ങളുടെ വിൽപ്പനയ്ക്കും വിതരണത്തിനും കർശന നിയന്ത്രണങ്ങളുണ്ട്. ബന്ധപ്പെട്ട അധികൃതരുടെ അംഗീകാരമുള്ള സ്ഥാപനങ്ങൾക്ക് മാത്രമേ ഇത്തരം ഉൽപ്പന്നങ്ങൾ കൈമാറുന്നതിനും വിൽപ്പന നടത്തുന്നതിനും അനുമതിയുള്ളൂ.
നിയമലംഘനം കണ്ടെത്തിയതിനെ തുടർന്ന് സ്ഥാപനത്തിനെതിരെ ഔദ്യോഗികമായി റിപ്പോർട്ട് തയ്യാറാക്കി. ഉത്തരവാദികൾക്കെതിരെ തുടർ നിയമനടപടികളും സ്വീകരിച്ചു.
സർക്കാർ സബ്സിഡി ഉൽപ്പന്നങ്ങളുടെ അനധികൃത വിൽപ്പന തടയുന്നതിനും വിപണിയിലെ കരിഞ്ചന്തയും ഉപഭോക്തൃ ചൂഷണവും ഒഴിവാക്കുന്നതിനുമായി വരും ദിവസങ്ങളിലും പരിശോധനകൾ ശക്തമായി തുടരുമെന്ന് അധികൃതർ മുന്നറിയിപ്പ് നൽകി.





