
Kuwait armed robbery cases കുവൈത്ത് സിറ്റി: പോലീസ് ഉദ്യോഗസ്ഥരാണെന്ന് വ്യാജമായി പരിചയപ്പെടുത്തി 72 മണിക്കൂറിനിടെ 11 സായുധ കവർച്ചകൾ നടത്തിയ സംഘത്തിലെ രണ്ട് സിറിയൻ പൗരന്മാരെ കുവൈത്ത് ക്രിമിനൽ സെക്യൂരിറ്റി വിഭാഗം അറസ്റ്റ് ചെയ്തു. കേസിൽ ഉൾപ്പെട്ട മൂന്നാമത്തെ പ്രതിക്കായി തിരച്ചിൽ ഊർജിതമാക്കിയിട്ടുണ്ട്.
ജലീബ് അൽ-ഷുയൂഖ് ഇൻവെസ്റ്റിഗേഷൻ ഓഫീസിന്റെ നേതൃത്വത്തിലാണ് പ്രതികളെ പിടികൂടിയത്. കഴിഞ്ഞ മൂന്ന് ദിവസത്തിനിടെ നിരവധി പ്രവാസി തൊഴിലാളികൾ കവർച്ചയ്ക്കിരയായതായി പോലീസിൽ പരാതി നൽകിയിരുന്നു.
തൊഴിലാളികളെ ലക്ഷ്യമിട്ട് കവർച്ച
അർധരാത്രിക്ക് ശേഷം സെൻട്രൽ മാർക്കറ്റുകളിലെ ജോലി കഴിഞ്ഞ് താമസസ്ഥലങ്ങളിലേക്ക് മടങ്ങാൻ ബസ് കാത്തുനടക്കുന്ന തൊഴിലാളികളെയാണ് സംഘം പ്രധാനമായും ലക്ഷ്യമിട്ടിരുന്നത്. പാർക്ക് ചെയ്ത വാഹനങ്ങൾക്കിടയിൽ ഒളിച്ചിരുന്ന പ്രതികൾ തൊഴിലാളികൾ അടുത്തെത്തുമ്പോൾ ഡിറ്റക്ടീവുകളാണെന്ന് പരിചയപ്പെടുത്തി സമീപിക്കും.
തുടർന്ന് തിരിച്ചറിയൽ രേഖകളും ബാഗുകളും പരിശോധിക്കണമെന്ന് ആവശ്യപ്പെടും. ഇതിനിടെ കത്തി കാട്ടി ഭീഷണിപ്പെടുത്തുകയും മർദിക്കുകയും ചെയ്താണ് പണവും മൊബൈൽ ഫോണുകളും കവർന്നിരുന്നത്.
പുലർച്ചെ നടത്തിയ പരിശോധനയിൽ പ്രതികൾ പിടിയിൽ
പരാതികൾ വർധിച്ചതോടെ മാർക്കറ്റുകൾക്ക് സമീപം പോലീസ് നിരീക്ഷണം ശക്തമാക്കിയിരുന്നു. പുലർച്ചെ 2.30ഓടെ ഒരു വാണിജ്യ മാർക്കറ്റിൽ വീണ്ടും കവർച്ച നടന്നതായി വിവരം ലഭിച്ചതിനെ തുടർന്ന് സുരക്ഷാ ഉദ്യോഗസ്ഥർ സ്ഥലത്തെത്തി.
തുടർന്ന് വാഹനത്തിനടിയിൽ ഒളിച്ചിരുന്ന ഒന്നാം പ്രതിയെ പിടികൂടി. രക്ഷപ്പെടാൻ ശ്രമിച്ച രണ്ടാമത്തെ പ്രതിയെ പിന്തുടർന്ന് കീഴടക്കുകയായിരുന്നു.
അറസ്റ്റിനിടെ പ്രതികൾ ഉദ്യോഗസ്ഥരെ ആക്രമിച്ചതായും ഇതിൽ ഒരു ഡിറ്റക്ടീവിന് പരിക്കേറ്റതായും റിപ്പോർട്ടുണ്ട്. പട്രോൾ വാഹനത്തിനും കേടുപാടുകൾ സംഭവിച്ചു.
വ്യാജ തിരിച്ചറിയൽ കാർഡുകളും ആയുധങ്ങളും പിടിച്ചെടുത്തു
ഇരകളിലൊരാൾ കവർച്ചയുടെ ദൃശ്യങ്ങൾ മൊബൈൽ ഫോണിൽ പകർത്തിയത് അന്വേഷണത്തിൽ നിർണായകമായി. പ്രതികളുടെ പക്കൽനിന്ന് കവർന്നെടുത്ത പണവും ആക്രമണത്തിന് ഉപയോഗിച്ച ഒരു വാളും രണ്ട് കത്തികളും പോലീസ് കണ്ടെടുത്തു.
സുരക്ഷാ ഉദ്യോഗസ്ഥരാണെന്ന് തെറ്റിദ്ധരിപ്പിക്കാൻ ഉപയോഗിച്ചിരുന്ന വ്യാജ തിരിച്ചറിയൽ കാർഡുകളും പിടിച്ചെടുത്തിട്ടുണ്ട്.
ചോദ്യം ചെയ്യലിൽ പ്രതികൾ കുറ്റം സമ്മതിച്ചതായും മൂന്നാമത്തെ കൂട്ടാളിയെക്കുറിച്ചുള്ള വിവരങ്ങൾ നൽകിയതായും റിപ്പോർട്ടിൽ പറയുന്നു. ഇയാളെ കണ്ടെത്തുന്നതിനുള്ള അന്വേഷണം തുടരുകയാണ്.
പൊതുജനങ്ങളുടെ സുരക്ഷയ്ക്ക് ഭീഷണിയാകുന്നവർക്കും സുരക്ഷാ ഉദ്യോഗസ്ഥരായി ആൾമാറാട്ടം നടത്തുന്നവർക്കുമെതിരെ കർശന നടപടി സ്വീകരിക്കുമെന്ന് ആഭ്യന്തര മന്ത്രാലയം വ്യക്തമാക്കി. കുറ്റവാളികളെ പിടികൂടുന്നതിനുള്ള സുരക്ഷാ പരിശോധനകൾ ശക്തമായി തുടരുമെന്നും മന്ത്രാലയം അറിയിച്ചു.





