Kuwait Bahrain tourism cooperation കുവൈത്തും ബഹ്‌റൈനും തമ്മിലുള്ള വിനോദസഞ്ചാര സഹകരണം ശക്തമാക്കാനും ജിസിസി രാജ്യങ്ങൾക്കിടയിലെ യാത്രകൾ വർധിപ്പിക്കാനും പുതിയ നീക്കം. ടൂറിസം മേഖലയിലെ അനുഭവങ്ങളും വൈദഗ്ധ്യവും പങ്കുവെച്ച് കൂടുതൽ വൈവിധ്യമാർന്ന വിനോദസഞ്ചാര പദ്ധതികൾ നടപ്പാക്കാനാണ് ഇരുരാജ്യങ്ങളും ലക്ഷ്യമിടുന്നത്.
ഇതിന്റെ ഭാഗമായി ബഹ്‌റൈൻ ടൂറിസം മന്ത്രി ഫാത്തിമ അൽ സൈറഫിയും ബഹ്‌റൈനിലെ കുവൈത്ത് അംബാസഡർ ജാസിം അൽ നജ്മും കൂടിക്കാഴ്ച നടത്തി. കുവൈത്തുമായുള്ള പങ്കാളിത്തം കൂടുതൽ വിപുലീകരിക്കാൻ ബഹ്‌റൈൻ പ്രതിജ്ഞാബദ്ധമാണെന്ന് മന്ത്രി വ്യക്തമാക്കി.
ടൂറിസം മേഖലയിലെ പ്രായോഗിക പരിചയങ്ങളും സാങ്കേതിക വൈദഗ്ധ്യവും പരസ്പരം പങ്കുവെക്കുക, വിനോദസഞ്ചാര ഉൽപന്നങ്ങളിൽ വൈവിധ്യം കൊണ്ടുവരിക, ഇരുരാജ്യങ്ങളിലെയും പ്രധാന വിനോദസഞ്ചാര കേന്ദ്രങ്ങൾക്ക് കൂടുതൽ പ്രചാരം നൽകുക തുടങ്ങിയ വിഷയങ്ങൾ കൂടിക്കാഴ്ചയിൽ ചർച്ചയായി.
ജിസിസി രാജ്യങ്ങൾക്കിടയിലെ വിനോദസഞ്ചാര യാത്രകൾ പ്രോത്സാഹിപ്പിക്കുന്നതിനായി സംയുക്ത പദ്ധതികൾ വേഗത്തിലാക്കുന്നതിനെക്കുറിച്ചും യോഗം ചർച്ച ചെയ്തു. മേഖലയിലെ ടൂറിസം വികസനത്തിന് പരസ്പര സഹകരണവും ആശയവിനിമയവും നിർണായകമാണെന്ന് കുവൈത്ത് അംബാസഡർ ജാസിം അൽ നജ്മ് പറഞ്ഞു.
ബഹ്‌റൈനിലെ കുവൈത്ത് എംബസി കൗൺസിലർ അബ്ദുൽ അസീസ് അൽ ഫലാഹ്, സെക്കൻഡ് സെക്രട്ടറി ലുജൈൻ അബു അലിയാൻ എന്നിവരും കൂടിക്കാഴ്ചയിൽ പങ്കെടുത്തു.
ഇരുരാജ്യങ്ങളും തമ്മിലുള്ള സഹകരണം വിപുലീകരിക്കുന്നതിലൂടെ ഗൾഫ് മേഖലയിലെ വിനോദസഞ്ചാര രംഗത്തിന് കൂടുതൽ ഉണർവ് ലഭിക്കുമെന്നാണ് പ്രതീക്ഷ.
