Qatar recruitment agency rules : ദോഹ: ഖത്തറിൽ വിദേശത്തുനിന്ന് തൊഴിലാളികളെ റിക്രൂട്ട് ചെയ്യുന്ന ഏജൻസികളുടെ പ്രവർത്തനം നിയന്ത്രിക്കുന്നതിനായി തൊഴിൽ മന്ത്രാലയം പുതിയ തീരുമാനം പുറത്തിറക്കി. 2026-ലെ തൊഴിൽ മന്ത്രിയുടെ 61-ാം നമ്പർ തീരുമാനമാണ് ഒക്ടോബർ 25-ന് ഔദ്യോഗിക ഗസറ്റിൽ പ്രസിദ്ധീകരിച്ചത്. റിക്രൂട്ട്‌മെന്റ് ഏജൻസികൾക്ക് ലൈസൻസ് നൽകുന്നതിനും പുതുക്കുന്നതിനും തൊഴിലാളികളുടെ അവകാശങ്ങൾ സംരക്ഷിക്കുന്നതിനുമുള്ള വ്യവസ്ഥകളാണ് ഇതിൽ ഉൾപ്പെടുത്തിയിരിക്കുന്നത്.
പുതിയ നിയമപ്രകാരം, റിക്രൂട്ട്‌മെന്റ് ഏജൻസികൾ ലൈസൻസ് നേടുന്നതിനായി 7.5 ലക്ഷം ഖത്തർ റിയാലിന്റെ ഗ്യാരണ്ടി തുക മന്ത്രാലയത്തിന്റെ അക്കൗണ്ടിൽ നിക്ഷേപിക്കണം. ലൈസൻസ് കാലാവധി രണ്ട് വർഷമായിരിക്കും. നിശ്ചിത വ്യവസ്ഥകൾ പാലിച്ചാൽ ഇത് പുതുക്കാം.
ലൈസൻസ് നേടാൻ ഖത്തരി പൗരത്വം നിർബന്ധം
വ്യക്തികൾക്ക് റിക്രൂട്ട്‌മെന്റ് ഏജൻസി നടത്താനുള്ള ലൈസൻസ് ലഭിക്കാൻ ഖത്തരി പൗരനായിരിക്കണം. കുറഞ്ഞ പ്രായം 21 വയസ്സാണ്. സദാചാരവുമായി ബന്ധപ്പെട്ട കുറ്റകൃത്യങ്ങളിലോ മനുഷ്യക്കടത്തിലോ അന്തിമമായി ശിക്ഷിക്കപ്പെട്ടവർക്ക്, നിയമത്തിൽ പറയുന്ന വ്യവസ്ഥകൾക്ക് വിധേയമായി, ലൈസൻസ് ലഭിക്കില്ല.
കമ്പനികൾക്ക് ലൈസൻസ് ലഭിക്കാൻ നൂറ് ശതമാനം മൂലധനവും ഖത്തരി പൗരന്മാരുടെ ഉടമസ്ഥതയിലായിരിക്കണം. കൂടാതെ, മുഴുവൻ സമയ ഉത്തരവാദിത്തമുള്ള മാനേജർ, ആവശ്യമായ വാണിജ്യ ലൈസൻസ്, സ്ഥിരമായ ഓഫീസ് എന്നിവയും വേണം.
അപേക്ഷയിൽ തീരുമാനമെടുക്കാൻ 30 ദിവസം
ലൈസൻസിനുള്ള അപേക്ഷയ്‌ക്കൊപ്പം തിരിച്ചറിയൽ രേഖകൾ, നല്ല പെരുമാറ്റ സർട്ടിഫിക്കറ്റ്, വാണിജ്യ രജിസ്ട്രേഷൻ രേഖകൾ, ദേശീയ വിലാസ രേഖ, ഓഫീസ് വാടകക്കരാർ അല്ലെങ്കിൽ ഉടമസ്ഥാവകാശ രേഖ തുടങ്ങിയവ സമർപ്പിക്കണം.
അപേക്ഷ ലഭിച്ച തീയതി മുതൽ 30 ദിവസത്തിനുള്ളിൽ ലൈസൻസ് നൽകണോ നിരസിക്കണോ എന്ന കാര്യത്തിൽ തീരുമാനമെടുക്കുന്നതിനുള്ള നടപടികൾ പൂർത്തിയാക്കണം. അപേക്ഷ നിരസിച്ചാൽ കാരണം വ്യക്തമാക്കണം. നിരസിക്കൽ അറിയിപ്പ് ലഭിച്ച് 15 ദിവസത്തിനുള്ളിൽ മന്ത്രിക്ക് അപ്പീൽ നൽകാം.
അപേക്ഷ അംഗീകരിച്ചാൽ ഗ്യാരണ്ടി തുക നിക്ഷേപിക്കുന്നതിനും ആവശ്യമായ രേഖകൾ സമർപ്പിക്കുന്നതിനും 15 ദിവസത്തെ സമയപരിധിയുണ്ട്. ലൈസൻസ് കാലാവധി അവസാനിക്കുന്നതിന് മൂന്ന് മാസം മുമ്പ് പുതുക്കൽ നടപടികൾ ആരംഭിക്കണം.
തൊഴിലാളികളിൽ നിന്ന് റിക്രൂട്ട്‌മെന്റ് ഫീസ് ഈടാക്കരുത്
തൊഴിലാളികളെ ഖത്തറിലേക്ക് കൊണ്ടുവരുന്നതിനായി അവരിൽ നിന്ന് പണം ഈടാക്കില്ലെന്ന് റിക്രൂട്ട്‌മെന്റ് ഏജൻസി ഉറപ്പുനൽകണം. റിക്രൂട്ട്‌മെന്റിന് മുമ്പ് തൊഴിലാളിക്ക് ജോലിയുടെ സ്വഭാവം, ശമ്പളം, തൊഴിൽ കരാറിന്റെ കാലാവധി, മറ്റ് വ്യവസ്ഥകൾ എന്നിവ വ്യക്തമാക്കുന്ന രേഖ നൽകണം.
തൊഴിലാളിയുടെ യോഗ്യത തെളിയിക്കുന്ന സർട്ടിഫിക്കറ്റുകളും ആവശ്യമായ സ്വഭാവ സർട്ടിഫിക്കറ്റുകളും ഉറപ്പാക്കണം. കൂടാതെ, തൊഴിലാളികൾക്ക് അനുയോജ്യമായ താമസസൗകര്യവും ഭക്ഷണച്ചെലവും ഉൾപ്പെടെയുള്ള ജീവിതച്ചെലവുകളും സംബന്ധിച്ച നിയമവ്യവസ്ഥകൾ പാലിക്കണം.
റിക്രൂട്ട്‌മെന്റ് ഏജൻസികൾക്ക് നിശ്ചയിച്ചിട്ടുള്ള ഫീസ് പരിധി പാലിക്കണം. അധിക ഫീസ് ഈടാക്കാൻ പാടില്ല. തൊഴിലാളികളുടെയും തൊഴിലുടമകളുടെയും കരാറുകളുമായി ബന്ധപ്പെട്ട രേഖകൾ സൂക്ഷിക്കുകയും മന്ത്രാലയത്തിന്റെ നിർദേശപ്രകാരമുള്ള ഇലക്ട്രോണിക് സംവിധാനങ്ങൾ ഉപയോഗിക്കുകയും വേണം.
ഏഴ് മാസത്തെ പരീക്ഷണകാല സംരക്ഷണം
പുതിയ തീരുമാനപ്രകാരം തൊഴിലാളികൾക്കായി പ്രാരംഭമായി മൂന്ന് മാസത്തെ പരീക്ഷണകാലവും തുടർന്ന് ആറ് മാസത്തെ അധിക പരീക്ഷണകാലവും ഉൾപ്പെടുന്ന വ്യവസ്ഥകളുണ്ട്.
പ്രാരംഭ മൂന്ന് മാസത്തിനിടെ തൊഴിലാളിക്ക് ആരോഗ്യപരമായ അയോഗ്യതയുണ്ടെന്ന് കണ്ടെത്തുക, കരാർ വ്യവസ്ഥകൾ ലംഘിക്കുക, ജോലി ചെയ്യാൻ വിസമ്മതിക്കുക, ഒളിച്ചോടുക തുടങ്ങിയ നിർദിഷ്ട സാഹചര്യങ്ങളിൽ സർക്കാർ ഫീസ് ഒഴികെയുള്ള റിക്രൂട്ട്‌മെന്റ് തുക തിരിച്ചുപിടിക്കാൻ തൊഴിലുടമയ്ക്ക് അവകാശമുണ്ടാകും.
തുടർന്നുള്ള ആറ് മാസത്തെ അധിക കാലയളവിൽ, തൊഴിലാളി ജോലി ചെയ്യാൻ വിസമ്മതിക്കുക, ഒളിച്ചോടുക, വിട്ടുമാറാത്ത രോഗം ബാധിക്കുക തുടങ്ങിയ നിർദിഷ്ട സാഹചര്യങ്ങളിൽ തൊഴിലുടമയ്ക്ക് തിരികെ ലഭിക്കേണ്ട തുക ഓരോ മാസത്തെയും അടിസ്ഥാനത്തിൽ കണക്കാക്കും. ഈ കാലയളവിൽ തൊഴിലാളി തൊഴിലുടമയുടെ സേവനത്തിൽ ചെലവഴിച്ച ഓരോ മാസത്തിനും നൽകിയ തുകയുടെ 15 ശതമാനത്തിൽ കുറയാത്ത തുക തിരികെ നൽകണമെന്നാണ് വ്യവസ്ഥ; സർക്കാർ ഫീസിന്റെ മൂല്യം ഇതിൽ നിന്ന് കുറയ്ക്കും.
എന്നാൽ തൊഴിലുടമ തൊഴിലാളിയെ ആക്രമിക്കുക, സുരക്ഷയ്ക്കും ആരോഗ്യത്തിനും ഭീഷണിയാകുന്ന സാഹചര്യത്തിൽ നിർത്തുക, കരാർ വ്യവസ്ഥകൾ ലംഘിക്കുക, സമ്മതിച്ച ശമ്പളം നൽകാതിരിക്കുക തുടങ്ങിയ സാഹചര്യങ്ങളിൽ ഈ റീഫണ്ട് അവകാശം നഷ്ടപ്പെടും.
നിയമലംഘനത്തിന് ലൈസൻസ് സസ്‌പെൻഷനും റദ്ദാക്കലും
കരാർ വ്യവസ്ഥകൾ പാലിക്കാതിരിക്കുക, തൊഴിലാളികളുമായുള്ള തർക്കങ്ങൾ പരിഹരിക്കുന്നതിൽ മന്ത്രാലയവുമായി സഹകരിക്കാതിരിക്കുക, പുതിയ നിയമത്തിലെ വ്യവസ്ഥകൾ ലംഘിക്കുക തുടങ്ങിയ സാഹചര്യങ്ങളിൽ ലൈസൻസ് മൂന്ന് മാസത്തേക്ക് സസ്‌പെൻഡ് ചെയ്യാം. ആവശ്യമായ സാഹചര്യങ്ങളിൽ സമാന കാലയളവിലേക്ക് സസ്‌പെൻഷൻ നീട്ടാനും കഴിയും.
തൊഴിലാളിയിൽ നിന്ന് പണം ഈടാക്കുക, ലൈസൻസ് നേടുന്നതിനുള്ള യോഗ്യത നഷ്ടപ്പെടുക, തെറ്റായ രേഖകൾ സമർപ്പിക്കുക തുടങ്ങിയ നിർദിഷ്ട സാഹചര്യങ്ങളിൽ ലൈസൻസ് റദ്ദാക്കാം. ലൈസൻസ് റദ്ദാക്കിയാൽ തൊഴിലാളികളോടും തൊഴിലുടമകളോടുമുള്ള ബാധ്യതകൾ തീർക്കണം.
പുതിയ നിയമം പ്രാബല്യത്തിൽ വരുന്ന തീയതി മുതൽ മൂന്ന് മാസത്തിനുള്ളിൽ നിലവിലുള്ള ഏജൻസികൾ പുതിയ വ്യവസ്ഥകൾക്ക് അനുസൃതമായി പ്രവർത്തനം ക്രമീകരിക്കണം. ആവശ്യമെങ്കിൽ ഈ സമയപരിധി നീട്ടാൻ തൊഴിൽ മന്ത്രിക്ക് അധികാരമുണ്ട്.
പ്രധാന ലക്ഷ്യം: ഖത്തറിലെ തൊഴിലാളി റിക്രൂട്ട്‌മെന്റ് മേഖലയിൽ നിയന്ത്രണം ശക്തിപ്പെടുത്തുക, അനധികൃത ഫീസ് ഈടാക്കുന്നത് തടയുക, തൊഴിലാളികളുടെ അവകാശങ്ങൾ സംരക്ഷിക്കുക, റിക്രൂട്ട്‌മെന്റ് ഏജൻസികളുടെ ഉത്തരവാദിത്തം ഉറപ്പാക്കുക എന്നിവയാണ് പുതിയ തീരുമാനത്തിന്റെ ലക്ഷ്യങ്ങൾ.
