UAE Five Vehicle Ownership Limit : ദുബായ്: യുഎഇയിൽ വ്യക്തിഗത താമസക്കാർക്ക് വാഹനങ്ങൾ രജിസ്റ്റർ ചെയ്യുന്നതിന് പുതിയ നിയന്ത്രണം. 2027 ജനുവരി 1 മുതൽ ഒരാൾക്ക് പരമാവധി അഞ്ച് ലൈസൻസുള്ള വാഹനങ്ങൾ മാത്രമേ സ്വന്തമായി രജിസ്റ്റർ ചെയ്യാൻ കഴിയൂ. പുതിയ ഫെഡറൽ ട്രാഫിക് ചട്ടങ്ങൾ പ്രകാരം ആദ്യ രണ്ട് വാഹനങ്ങൾക്ക് സാധാരണ നിരക്കിലും അതിനുശേഷമുള്ള വാഹനങ്ങളുടെ രജിസ്ട്രേഷനും പുതുക്കലിനും അധിക ഫീസ് നൽകേണ്ടിവരും.

2026ലെ കാബിനറ്റ് തീരുമാനം നമ്പർ 174ലാണ് ഇതുസംബന്ധിച്ച വ്യവസ്ഥകൾ ഉൾപ്പെടുത്തിയിരിക്കുന്നത്. ഗതാഗത നിയന്ത്രണം സംബന്ധിച്ച 2024ലെ ഫെഡറൽ ഡിക്രി-നിയമം നമ്പർ 14ന്റെ എക്സിക്യൂട്ടീവ് റെഗുലേഷന്റെ ഭാഗമായാണ് പുതിയ വ്യവസ്ഥകൾ നടപ്പാക്കുന്നത്.

ആദ്യ രണ്ട് വാഹനങ്ങൾക്ക് സാധാരണ നിരക്ക്

പുതിയ ചട്ടത്തിലെ ആർട്ടിക്കിൾ 89 പ്രകാരം വ്യക്തിഗത താമസക്കാർക്ക് രണ്ട് വാഹനങ്ങൾ വരെ സാധാരണ വ്യവസ്ഥകളിൽ സ്വന്തമായി രജിസ്റ്റർ ചെയ്യാം. ഇതിൽ കൂടുതലായി വാഹനങ്ങൾ രജിസ്റ്റർ ചെയ്യാനോ നിലവിലുള്ള രജിസ്ട്രേഷൻ പുതുക്കാനോ ആഗ്രഹിക്കുന്നവർ ഓരോ അധിക വാഹനത്തിനും നിശ്ചിത ഫീസ് നൽകണം.

എന്നാൽ അധിക ഫീസ് എത്രയായിരിക്കുമെന്ന് തീരുമാനത്തിൽ വ്യക്തമാക്കിയിട്ടില്ല. അഞ്ച് വാഹനങ്ങളിൽ കൂടുതലുള്ളവരുടെ നിലവിലുള്ള രജിസ്ട്രേഷനുകൾ എങ്ങനെ കൈകാര്യം ചെയ്യുമെന്ന കാര്യത്തിലും കൂടുതൽ വിശദീകരണം നൽകിയിട്ടില്ല.

കമ്പനികൾക്ക് ബാധകമാണോ?

വ്യക്തിഗത താമസക്കാരുടെ വാഹന ഉടമസ്ഥതയ്ക്കാണ് അഞ്ച് വാഹനങ്ങളുടെ പരിധി ബാധകമാകുന്നത്. കമ്പനികൾക്ക് ഇതേ രീതിയിലുള്ള സംഖ്യാ പരിധി ആർട്ടിക്കിൾ 89ൽ വ്യക്തമാക്കിയിട്ടില്ല.

പുതിയ നിയമങ്ങൾ പ്രാബല്യത്തിൽ വരുമ്പോൾ അധിക ഫീസ് യുഎഇയിലുടനീളം ഒരേ നിരക്കിലായിരിക്കുമോ എന്ന കാര്യത്തിലും വ്യക്തതയില്ല.

വാഹന രജിസ്ട്രേഷനും സുരക്ഷാ നിബന്ധനകളും

വാഹനങ്ങളുടെ ലൈസൻസിനും രജിസ്ട്രേഷനും പുതിയ നിയന്ത്രണങ്ങൾക്കൊപ്പം മറ്റ് സുരക്ഷാ നിബന്ധനകളും ആർട്ടിക്കിൾ 89ൽ ഉൾപ്പെടുത്തിയിട്ടുണ്ട്.

വാഹന ഉടമകൾക്കോ നിയമപരമായി അംഗീകൃത പ്രതിനിധികൾക്കോ ഇലക്ട്രോണിക് സംവിധാനങ്ങൾ വഴിയോ ബന്ധപ്പെട്ട ലൈസൻസിങ് അതോറിറ്റി നിർദേശിക്കുന്ന മാർഗങ്ങളിലൂടെയോ അപേക്ഷ സമർപ്പിക്കാം. നിർദേശിച്ച നടപടിക്രമങ്ങളും വ്യവസ്ഥകളും പാലിക്കേണ്ടതുണ്ട്.

വലതുവശത്ത് സ്റ്റിയറിങ് ഉള്ള വാഹനങ്ങൾക്ക് സാധാരണ ഉപയോഗത്തിനായി ലൈസൻസ് അനുവദിക്കില്ല. എന്നാൽ പ്രദർശന ആവശ്യങ്ങൾക്കായി മാത്രം ഇത്തരം വാഹനങ്ങൾ ഉപയോഗിക്കാൻ അനുമതിയുണ്ട്. റോഡ് സുരക്ഷാ മാനദണ്ഡങ്ങൾ പാലിക്കാത്ത വാഹനങ്ങൾക്കും ലൈസൻസ് ലഭിക്കില്ല.

2027 ജനുവരി 1 മുതൽ പ്രാബല്യത്തിൽ

2026 ഒക്ടോബർ 6നാണ് പുതിയ എക്സിക്യൂട്ടീവ് റെഗുലേഷൻ പുറപ്പെടുവിച്ചത്. 2027 ജനുവരി 1 മുതൽ ഇത് പ്രാബല്യത്തിൽ വരും. 1997ലെ മന്ത്രിതല തീരുമാനം നമ്പർ 130 പ്രകാരം നിലവിലുണ്ടായിരുന്ന മുൻ എക്സിക്യൂട്ടീവ് ചട്ടങ്ങൾക്ക് പകരമായാണ് പുതിയ നിയന്ത്രണങ്ങൾ നടപ്പാക്കുന്നത്.

പുതിയ വ്യവസ്ഥകൾ പ്രാബല്യത്തിൽ വരുന്നതോടെ യുഎഇയിലെ വ്യക്തിഗത വാഹന ഉടമകൾ രജിസ്ട്രേഷനും പുതുക്കലുമായി ബന്ധപ്പെട്ട നിയമങ്ങളും ഫീസുകളും ശ്രദ്ധിക്കേണ്ടിവരും

യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ*

.