മഴയ്ക്കായി പ്രാർഥിച്ച് ഖത്തറിൽ പ്രത്യേക ഇസ്തിസ്ഖാ നമസ്കാരം സംഘടിപ്പിച്ചു. പ്രവാചകചര്യ അനുസരിച്ച് രാജ്യത്തും ജനങ്ങൾക്കും മഴ ലഭിക്കണമെന്ന പ്രാർഥനയോടെയാണ് ലുസൈൽ മുസല്ലയിൽ നമസ്കാരം നടത്തിയത്.
അമീറിന്റെ വ്യക്തിഗത പ്രതിനിധിയായ ഷെയ്ഖ് ജാസിം ബിൻ ഹമദ് അൽഥാനി, ഷെയ്ഖ് അബ്ദുല്ല ബിൻ ഖലീഫ അൽഥാനി, ഷെയ്ഖ് മുഹമ്മദ് ബിൻ ഖലീഫ അൽഥാനി, ഷെയ്ഖ് ജാസിം ബിൻ ഖലീഫ അൽഥാനി എന്നിവർ നമസ്കാരത്തിൽ പങ്കെടുത്തു.
ഷൂറ കൗൺസിൽ അധ്യക്ഷൻ ഹസൻ ബിൻ അബ്ദുല്ല അൽ ഗാനിം, നിരവധി ഷെയ്ഖുമാർ, മന്ത്രിമാർ, ഷൂറ കൗൺസിൽ അംഗങ്ങൾ, പ്രമുഖ വ്യക്തികൾ, മുതിർന്ന ഉദ്യോഗസ്ഥർ എന്നിവരും നമസ്കാരത്തിൽ പങ്കുചേർന്നു.
നമസ്കാരത്തിന് ശേഷം നടന്ന പ്രഭാഷണത്തിൽ ഷെയ്ഖ് ഡോ. യഹ്യ ബാത്തി അൽ നുഐമി വിശ്വാസികളോട് വിനയത്തോടെയും പശ്ചാത്താപത്തോടെയും ദൈവത്തോട് പ്രാർഥിക്കാൻ ആഹ്വാനം ചെയ്തു. മനുഷ്യൻ തന്റെ സ്രഷ്ടാവിനോട് എത്രത്തോളം ആശ്രയിച്ചിരിക്കുന്നു എന്നതിന്റെ പ്രകടനമാണ് ഇസ്തിസ്ഖാ നമസ്കാരമെന്ന് അദ്ദേഹം പറഞ്ഞു.
മഴ വൈകുന്നത് മനുഷ്യന്റെ പരിമിതികളും ദൈവകാരുണ്യത്തോടുള്ള നിരന്തരമായ ആവശ്യകതയും ഓർമിപ്പിക്കുന്നതാണെന്നും അദ്ദേഹം ചൂണ്ടിക്കാട്ടി. സ്വന്തം ജീവിതത്തെ വിലയിരുത്താനും പാപങ്ങളിൽ നിന്ന് വിട്ടുനിൽക്കാനും ഇത് പ്രേരണയാകണമെന്നും അദ്ദേഹം പറഞ്ഞു.
പാപമോചനം തേടുക, ആത്മാർഥമായി പശ്ചാത്തപിക്കുക, ദാനധർമങ്ങൾ ഉൾപ്പെടെയുള്ള സൽപ്രവൃത്തികൾ വർധിപ്പിക്കുക എന്നിവയ്ക്ക് അദ്ദേഹം ആഹ്വാനം ചെയ്തു. ഇത്തരം പ്രവൃത്തികൾ ദൈവകാരുണ്യം ലഭിക്കുന്നതിനും മഴ ലഭിക്കുന്നതിനും കാരണമാകുമെന്ന് അദ്ദേഹം വിശദീകരിച്ചു.
ജലത്തിന്റെ അനുഗ്രഹത്തിന് നന്ദിയുള്ളവരായിരിക്കണമെന്നും വെള്ളം പാഴാക്കാതെ സംരക്ഷിക്കണമെന്നും പ്രഭാഷണത്തിൽ അദ്ദേഹം ഓർമിപ്പിച്ചു.
