Kuwait Airport Bans Photography : കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിനുള്ളിൽ ജീവനക്കാർക്കും വിവിധ സ്ഥാപനങ്ങൾക്കും മൊബൈൽ ഫോണുകൾ, ക്യാമറകൾ, മറ്റ് സാങ്കേതിക ഉപകരണങ്ങൾ എന്നിവ ഉപയോഗിച്ച് ഫോട്ടോ എടുക്കുന്നതിനും വീഡിയോ ചിത്രീകരിക്കുന്നതിനും ലൈവ് സ്ട്രീമിങ് നടത്തുന്നതിനും വിലക്കേർപ്പെടുത്തി.
2026 നവംബർ 5-ന് സിവിൽ ഏവിയേഷൻ അതോറിറ്റി ആക്ടിങ് ഡയറക്ടർ ജനറൽ എൻജിനീയർ സാദ് അൽ ഒതൈബി പുറത്തിറക്കിയ സർക്കുലർ നമ്പർ 60/2026 പ്രകാരമാണ് പുതിയ നിയന്ത്രണം.
വിലക്ക് വിമാനത്താവളത്തിന്റെ മുഴുവൻ മേഖലയിലും
കുവൈത്ത് അന്താരാഷ്ട്ര വിമാനത്താവളത്തിന്റെ മുഴുവൻ പരിസരത്തും വിലക്ക് ബാധകമായിരിക്കും. യാത്രക്കാരുടെ ടെർമിനലുകൾ, ഭരണകാര്യ കെട്ടിടങ്ങൾ, സാങ്കേതിക വിഭാഗങ്ങളുടെ കെട്ടിടങ്ങൾ, സിവിൽ ഏവിയേഷൻ അതോറിറ്റിയുടെ കീഴിലുള്ള മറ്റ് സ്ഥാപനങ്ങൾ എന്നിവയും ഇതിൽ ഉൾപ്പെടും.
വിമാനത്താവളത്തിലെ ആഭ്യന്തര രേഖകൾ, ഔദ്യോഗിക കത്തിടപാടുകൾ എന്നിവയുടെ ചിത്രമെടുക്കുന്നതിനും അവ പ്രസിദ്ധീകരിക്കുന്നതിനും വിലക്കുണ്ട്. സുരക്ഷാ നടപടിക്രമങ്ങൾ, സുരക്ഷാ സംവിധാനങ്ങൾ, പരിശോധനാ കേന്ദ്രങ്ങൾ, നിരീക്ഷണ ക്യാമറകൾ, വിമാനങ്ങളുടെ നീക്കങ്ങൾ, വിമാനത്താവളത്തിലെ പ്രവർത്തനങ്ങൾ എന്നിവയുമായി ബന്ധപ്പെട്ട വിവരങ്ങൾ ചിത്രീകരിക്കുകയോ പുറത്തുവിടുകയോ ചെയ്യാനും അനുമതിയുണ്ടാകില്ല.
നിയമനടപടി നേരിടേണ്ടിവരും
കുവൈത്ത് അന്താരാഷ്ട്ര വിമാനത്താവളവും അനുബന്ധ സൗകര്യങ്ങളും രാജ്യത്തെ നിർണായകവും സുരക്ഷാപരമായി അതീവ പ്രാധാന്യമുള്ളതുമായ കേന്ദ്രങ്ങളായതിനാലാണ് നിയന്ത്രണം ഏർപ്പെടുത്തിയതെന്ന് സിവിൽ ഏവിയേഷൻ അതോറിറ്റി വ്യക്തമാക്കി.
വിമാനത്താവളത്തിലെ ജീവനക്കാരുടെയും യാത്രക്കാരുടെയും സ്വകാര്യത സംരക്ഷിക്കുക, പ്രവർത്തനങ്ങളുടെ സുരക്ഷ ഉറപ്പാക്കുക, പൊതുതാൽപര്യം സംരക്ഷിക്കുക എന്നിവയും തീരുമാനത്തിന് പിന്നിലുണ്ട്.
സർക്കുലറിലെ രണ്ടാം അനുച്ഛേദം പ്രകാരം നിർദേശങ്ങൾ ലംഘിക്കുന്നവർക്കെതിരെ കുവൈത്തിലെ നിലവിലുള്ള നിയമങ്ങൾക്കും ചട്ടങ്ങൾക്കും തീരുമാനങ്ങൾക്കും അനുസൃതമായി നിയമനടപടി സ്വീകരിക്കും.
അതിനാൽ വിമാനത്താവളത്തിനുള്ളിൽ ജോലി ചെയ്യുന്നവരും അവിടെ പ്രവർത്തിക്കുന്ന സ്ഥാപനങ്ങളിലെ ജീവനക്കാരും പുതിയ നിർദേശങ്ങൾ കർശനമായി പാലിക്കേണ്ടിവരും.
