UAE oil spill : യുഎഇയിൽ കടലിൽ ടാങ്കറിൽ നിന്നുണ്ടായ എണ്ണച്ചോർച്ചയെ തുടർന്ന് ഷാർജ, റാസൽഖൈമ, ഉമ്മുൽ ഖുവൈൻ എന്നിവിടങ്ങളിലെ ബീച്ചുകൾ താൽക്കാലികമായി അടച്ചിട്ടു. നവംബർ 6 വരെയും ബീച്ചുകൾ വീണ്ടും തുറക്കുന്നതായി ഔദ്യോഗിക പ്രഖ്യാപനം ഉണ്ടായിട്ടില്ല. തീരപ്രദേശങ്ങളിലെ മലിനീകരണം തടയുന്നതിനും പൊതുജനങ്ങളുടെ സുരക്ഷ ഉറപ്പാക്കുന്നതിനുമാണ് നിയന്ത്രണങ്ങൾ ഏർപ്പെടുത്തിയിരിക്കുന്നത്.

ഷാർജയിലെ ബീച്ചുകൾ അടച്ചത് ഒക്ടോബർ 28ന്

എണ്ണച്ചോർച്ച കടൽത്തീരങ്ങളിലേക്ക് വ്യാപിക്കുന്നത് തടയുന്നതിനുള്ള മുൻകരുതൽ നടപടിയായി ഒക്ടോബർ 28നാണ് ഷാർജ നഗരത്തിലെ ബീച്ചുകൾ അടച്ചതായി ഷാർജ ഗവൺമെന്റ് മീഡിയ ബ്യൂറോ പ്രഖ്യാപിച്ചത്.

ബീച്ചുകളുടെ സംരക്ഷണത്തിനും മലിനീകരണം തീരത്തേക്ക് വ്യാപിക്കുന്നത് തടയുന്നതിനുമായി പ്രത്യേക സംഘങ്ങളെയും ബന്ധപ്പെട്ട അധികൃതരെയും നിയോഗിച്ചിട്ടുണ്ട്. പൊതുജനങ്ങൾ സുരക്ഷാ നിർദേശങ്ങൾ പാലിക്കണമെന്നും ഔദ്യോഗിക ചാനലുകളിലൂടെ ലഭിക്കുന്ന വിവരങ്ങൾ മാത്രം വിശ്വസിക്കണമെന്നും അധികൃതർ ആവശ്യപ്പെട്ടു.

ഇതിന് മുമ്പ് ഒക്ടോബർ 23ന് എണ്ണച്ചോർച്ചയെ തുടർന്നുള്ള ആശങ്കകൾ കാരണം ഷാർജയിലെ അൽ ഹംരിയ ബീച്ചും താൽക്കാലികമായി അടച്ചിരുന്നു.

റാസൽഖൈമയിൽ എല്ലാ പൊതു ബീച്ചുകളും അടച്ചു

റാസൽഖൈമയിലെ എല്ലാ പൊതു ബീച്ചുകളും ഒക്ടോബർ 24ന് അടച്ചതായി പബ്ലിക് സർവീസസ് ഡിപ്പാർട്ട്‌മെന്റ് അറിയിച്ചിരുന്നു. അടുത്ത അറിയിപ്പ് ഉണ്ടാകുന്നതുവരെ നിയന്ത്രണം തുടരുമെന്നാണ് അധികൃതർ വ്യക്തമാക്കിയത്.

തീരപ്രദേശങ്ങളിലെത്തുന്ന താമസക്കാരും സന്ദർശകരും സുരക്ഷാ നിർദേശങ്ങൾ കർശനമായി പാലിക്കണം. ബീച്ചുകൾ വീണ്ടും തുറക്കുന്ന തീയതി സാഹചര്യം വിലയിരുത്തിയ ശേഷം അറിയിക്കുമെന്നും അധികൃതർ വ്യക്തമാക്കി. സ്ഥിരീകരിക്കാത്ത വാർത്തകളും അഭ്യൂഹങ്ങളും പ്രചരിപ്പിക്കരുതെന്നും ഔദ്യോഗിക അറിയിപ്പുകളെ മാത്രം ആശ്രയിക്കണമെന്നും നിർദേശിച്ചിട്ടുണ്ട്.

ഉമ്മുൽ ഖുവൈനിലും തീരപ്രദേശങ്ങൾ അടച്ചു

ഒക്ടോബർ 23ന് ഉമ്മുൽ ഖുവൈൻ തീരത്ത് ടാങ്കറിൽ നിന്നുള്ള എണ്ണച്ചോർച്ച ബാധിച്ചതായി കാലാവസ്ഥാ വ്യതിയാന പരിസ്ഥിതി മന്ത്രാലയം സ്ഥിരീകരിച്ചിരുന്നു. ഇതിനു പിന്നാലെയാണ് എമിറേറ്റിലെ എല്ലാ ബീച്ചുകളും തീരപ്രദേശങ്ങളും താൽക്കാലികമായി അടച്ചത്.

ഫെഡറൽ, പ്രാദേശിക അധികൃതരുമായി സഹകരിച്ച് പ്രത്യേക സംഘങ്ങൾ എണ്ണച്ചോർച്ച നിയന്ത്രിക്കുന്നതിനും ശുചീകരണ പ്രവർത്തനങ്ങൾ നടത്തുന്നതിനും രംഗത്തിറങ്ങി. മലിനീകരണത്തിന്റെ വ്യാപ്തി കണ്ടെത്തുന്നതിനായി പരിസ്ഥിതി പരിശോധനകളും ആരംഭിച്ചു.

അതേസമയം, ഷാർജ, അജ്മാൻ, ഉമ്മുൽ ഖുവൈൻ എന്നിവിടങ്ങളിൽ അനുഭവപ്പെട്ട അസാധാരണ ഗന്ധം താമസക്കാരുടെ ആരോഗ്യത്തിന് ഭീഷണിയല്ലെന്ന് മന്ത്രാലയം വ്യക്തമാക്കിയിരുന്നു.

എണ്ണച്ചോർച്ച നിയന്ത്രിച്ചു; ശുചീകരണം തുടരുന്നു

ഒക്ടോബർ 30ന് പുറത്തുവിട്ട അറിയിപ്പിൽ ടാങ്കറിൽ നിന്നുള്ള എണ്ണച്ചോർച്ച പൂർണമായി നിർത്തിയതായും പിന്നീട് കൂടുതൽ ചോർച്ച കണ്ടെത്തിയിട്ടില്ലെന്നും യുഎഇ അധികൃതർ അറിയിച്ചു.

കടൽ മലിനീകരണത്തിന്റെ തോത് ഗണ്യമായി കുറഞ്ഞതായും മന്ത്രാലയം വ്യക്തമാക്കി. എന്നാൽ ബാധിത തീരപ്രദേശങ്ങളിൽ പരിശോധന, നിരീക്ഷണം, ശുചീകരണം തുടങ്ങിയ പ്രവർത്തനങ്ങൾ തുടരുകയാണ്.

ഉപഗ്രഹ ചിത്രങ്ങൾ പ്രകാരം ഉമ്മുൽ ഖുവൈനിന് സമീപമുള്ള കടൽമേഖലയിലാണ് എണ്ണപ്പാടുകൾ കൂടുതലായി കേന്ദ്രീകരിച്ചിരുന്നത്. ഇതിന്റെ ഭാഗങ്ങൾ റാസൽഖൈമ, അജ്മാൻ, ഷാർജ തീരങ്ങളിലേക്കും വ്യാപിച്ചിരുന്നു.

മുൻകരുതൽ നടപടിയായി ബീച്ചുകൾ അടച്ചത് എല്ലാ സ്ഥലങ്ങളിലും എണ്ണമലിനീകരണം കണ്ടെത്തിയെന്നർഥമല്ലെന്നും മന്ത്രാലയം വിശദീകരിച്ചു. പൊതുജനങ്ങളുടെ സുരക്ഷയും സമുദ്രപരിസ്ഥിതിയുടെ സംരക്ഷണവും ഉറപ്പാക്കുന്നതിനായി പരിശോധനകളും ശുചീകരണ പ്രവർത്തനങ്ങളും പൂർത്തിയാകുന്നതുവരെ നിയന്ത്രണങ്ങൾ തുടരുകയാണ്.

ബീച്ചുകൾ സന്ദർശിക്കാൻ ആഗ്രഹിക്കുന്ന താമസക്കാരും വിനോദസഞ്ചാരികളും ബന്ധപ്പെട്ട അധികൃതരുടെ ഔദ്യോഗിക അറിയിപ്പുകൾ ലഭിച്ചതിന് ശേഷമേ തീരപ്രദേശങ്ങളിലേക്ക് പോകാവൂ.