UAE busts international drug ring : അബുദാബി: യുഎഇയിലേക്ക് വൻതോതിൽ ലഹരിമരുന്ന് കടത്താനുള്ള അന്താരാഷ്ട്ര സംഘത്തിന്റെ നീക്കം സുരക്ഷാ ഉദ്യോഗസ്ഥർ തകർത്തു. സംഭവവുമായി ബന്ധപ്പെട്ട് വിവിധ രാജ്യക്കാരായ 20 പേരെ അറസ്റ്റ് ചെയ്തു. രണ്ട് ലക്ഷം ക്യാപ്റ്റഗൺ ഗുളികകളും 30 കിലോയിലധികം മറ്റ് ലഹരിമരുന്നുകളുമാണ് സുരക്ഷാ സേന പിടിച്ചെടുത്തത്.
യുഎഇ നാഷണൽ ഡ്രഗ് എൻഫോഴ്‌സ്‌മെന്റ് അതോറിറ്റി, റാസൽഖൈമ പോലീസ് ജനറൽ ഹെഡ്ക്വാർട്ടേഴ്‌സ്, ഇറാഖ് ആഭ്യന്തര മന്ത്രാലയത്തിന് കീഴിലുള്ള ജനറൽ ഡയറക്ടറേറ്റ് ഫോർ നാർക്കോട്ടിക്സ് ആൻഡ് സൈക്കോട്രോപിക് സബ്സ്റ്റൻസസ് എന്നിവ സംയുക്തമായാണ് ഓപ്പറേഷൻ നടത്തിയത്. ഫെഡറൽ പബ്ലിക് പ്രോസിക്യൂഷന്റെ നിയമപരമായ ഏകോപനവും അന്വേഷണത്തിനുണ്ടായിരുന്നു.
ഗൾഫ്, അറബ്, ആഫ്രിക്കൻ, ഏഷ്യൻ രാജ്യങ്ങളിൽ നിന്നുള്ളവരാണ് അറസ്റ്റിലായ 20 പ്രതികൾ. ക്യാപ്റ്റഗൺ ഗുളികകൾക്ക് പുറമെ കൊക്കെയ്ൻ, ക്രിസ്റ്റൽ മെത്താംഫെറ്റമിൻ, കഞ്ചാവ്, ഹാഷിഷ്, സ്പൈസ് തുടങ്ങിയ ലഹരിവസ്തുക്കളും പിടിച്ചെടുത്തവയിൽ ഉൾപ്പെടുന്നു.
റാസൽഖൈമയിലെ അതിർത്തി പ്രദേശം വഴി ലഹരിമരുന്നുകൾ യുഎഇയിലേക്ക് കടത്തിയശേഷം രാജ്യത്തിന്റെ വിവിധ ഭാഗങ്ങളിൽ വിതരണം ചെയ്യാനായിരുന്നു സംഘത്തിന്റെ പദ്ധതിയെന്നാണ് അധികൃതർ വ്യക്തമാക്കിയത്.
യുഎഇയിലെയും ഇറാഖിലെയും ബന്ധപ്പെട്ട സുരക്ഷാ ഏജൻസികൾ തമ്മിൽ നടത്തിയ രഹസ്യാന്വേഷണ വിവര കൈമാറ്റത്തിലൂടെയാണ് ലഹരിക്കടത്ത് പദ്ധതിയെക്കുറിച്ച് വിവരം ലഭിച്ചത്. തുടർന്ന് നാഷണൽ ഡ്രഗ് എൻഫോഴ്‌സ്‌മെന്റ് അതോറിറ്റിയുടെ നേതൃത്വത്തിൽ വിശദമായ സുരക്ഷാ പദ്ധതി തയ്യാറാക്കി.
ലഹരിമരുന്നുകളുമായി അതിർത്തി വഴി കടക്കാൻ ശ്രമിക്കുന്നതിനിടെയാണ് സംഘത്തിലെ ചിലർ പിടിയിലായത്. ബാക്കിയുള്ളവരെ യുഎഇക്കുള്ളിൽ വിവിധയിടങ്ങളിൽ സുരക്ഷാ ഉദ്യോഗസ്ഥർ നടത്തിയ പ്രത്യേക പരിശോധനകളിലൂടെയും പതിയിരുന്നുള്ള നീക്കങ്ങളിലൂടെയും അറസ്റ്റ് ചെയ്തു.
ലഹരിമരുന്ന് കടത്തും വിതരണവും നടത്തുന്ന അന്താരാഷ്ട്ര ശൃംഖലകൾക്കെതിരായ നിർണായക നടപടിയാണ് ഇതെന്ന് നാഷണൽ ഡ്രഗ് എൻഫോഴ്‌സ്‌മെന്റ് അതോറിറ്റി അറിയിച്ചു. രാജ്യത്തിന്റെ സുരക്ഷയ്ക്കും സാമൂഹിക സുരക്ഷിതത്വത്തിനും ഭീഷണിയാകുന്ന ഇത്തരം കുറ്റകൃത്യങ്ങൾക്കെതിരെ ശക്തമായ നടപടി തുടരുമെന്നും അധികൃതർ വ്യക്തമാക്കി.
അന്താരാഷ്ട്ര തലത്തിലുള്ള സുരക്ഷാ-നിയമ നിർവഹണ ഏജൻസികൾ തമ്മിലുള്ള സഹകരണവും രഹസ്യാന്വേഷണ വിവരങ്ങൾ പങ്കുവെക്കുന്നതും ഇത്തരം കുറ്റകൃത്യങ്ങൾ തടയുന്നതിൽ നിർണായകമാണെന്നും അതോറിറ്റി ചൂണ്ടിക്കാട്ടി.
സംശയാസ്പദമായ പ്രവർത്തനങ്ങൾ ശ്രദ്ധയിൽപ്പെട്ടാൽ ബന്ധപ്പെട്ട അധികാരികളെ അറിയിക്കണമെന്ന് പൊതുജനങ്ങളോടും അധികൃതർ അഭ്യർഥിച്ചു. ലഹരിമരുന്നുകളുടെ അപകടങ്ങളിൽ നിന്ന് സമൂഹത്തെ സംരക്ഷിക്കുന്നതിന് പൊതുജനങ്ങളുടെ സഹകരണം അനിവാര്യമാണെന്നും അതോറിറ്റി വ്യക്തമാക്കി.
