Kuwait Marks 35 Years Since Last Oil Well Fire കുവൈത്ത് സിറ്റി: പുകമറയിൽ പകൽ പോലും രാത്രിയായ ദിനങ്ങൾ, ആകാശത്തുനിന്ന് പെയ്തിറങ്ങിയ കറുത്ത മഴ, കത്തിയമർന്ന എണ്ണക്കിണറുകൾ… കുവൈത്തിന്റെ ചരിത്രത്തിലെ ഏറ്റവും വലിയ പാരിസ്ഥിതിക ദുരന്തങ്ങളിലൊന്നിന് അന്ത്യം കുറിച്ചിട്ട് 35 വർഷം. 1991 നവംബർ ആറിനാണ് ഇറാഖി അധിനിവേശ സേന കത്തിച്ച കുവൈത്തിലെ അവസാന എണ്ണക്കിണറിലെ തീ അണച്ചത്. മൂന്ന് പതിറ്റാണ്ടിലേറെ പിന്നിട്ടിട്ടും ആ ദുരന്തത്തിന്റെ ഓർമകൾ രാജ്യത്തിന്റെ ചരിത്രത്തിൽ മായാതെ നിൽക്കുന്നു.

1990 ഓഗസ്റ്റ് രണ്ടിനാണ് ഇറാഖ് കുവൈത്ത് അധിനിവേശം നടത്തിയത്. 1991 ഫെബ്രുവരിയിൽ അന്താരാഷ്ട്ര സേനയുടെ ഇടപെടലിനെത്തുടർന്ന് ഇറാഖി സൈന്യം പിൻവാങ്ങുന്നതിനിടെ രാജ്യത്തെ പ്രധാന എണ്ണപ്പാടങ്ങളിലെ നൂറുകണക്കിന് എണ്ണക്കിണറുകൾക്ക് തീയിട്ടു. ഇതോടെ കുവൈത്ത് ലോകം കണ്ട ഏറ്റവും വലിയ പാരിസ്ഥിതിക, സാമ്പത്തിക ദുരന്തങ്ങളിലൊന്നിലേക്ക് തള്ളപ്പെട്ടു.

737 എണ്ണക്കിണറുകൾക്ക് തീകൊളുത്തി

ഇറാഖി സൈന്യം പിൻവാങ്ങുന്നതിന് മുമ്പ് കുവൈത്തിലെ 737 എണ്ണക്കിണറുകൾക്കാണ് തീയിട്ടത്. ഇതിൽ 54 എണ്ണക്കിണറുകൾ പൂർണമായും നശിച്ചു. അഹ്മദി, ബുർഗാൻ, അൽ മഖ്വ, മിനാഗിഷ്, വഫ്ര തുടങ്ങിയ പ്രധാന എണ്ണപ്പാടുകളിലേക്കാണ് തീ വ്യാപിച്ചത്.

എണ്ണക്കിണറുകൾക്ക് പുറമെ എണ്ണ ശേഖരണ കേന്ദ്രങ്ങളും കയറ്റുമതി ടെർമിനലുകളും ആക്രമിക്കപ്പെട്ടു. ഇതോടെ തീപിടിത്തത്തിന്റെ വ്യാപ്തി വർധിക്കുകയും രാജ്യത്തിന്റെ എണ്ണ ഉൽപ്പാദന മേഖലയിൽ വലിയ നാശനഷ്ടങ്ങൾ സംഭവിക്കുകയും ചെയ്തു.

പുകമറയിൽ മുങ്ങിയ ആകാശം; കറുത്ത മഴ

എണ്ണക്കിണറുകളിൽനിന്ന് ഉയർന്ന കറുത്ത പുക മാസങ്ങളോളം കുവൈത്തിന്റെ ആകാശത്തെ മൂടി. പകൽ സമയത്തുപോലും സൂര്യപ്രകാശം തടയപ്പെട്ടതോടെ പല പ്രദേശങ്ങളിലും ഇരുട്ട് അനുഭവപ്പെട്ടു. എണ്ണയുടെ അവശിഷ്ടങ്ങളും കരിയും കെട്ടിടങ്ങളിലും സസ്യങ്ങളിലും പതിച്ചു. കരയിലെയും കടലിലെയും ജീവജാലങ്ങളെയും ദുരന്തം ബാധിച്ചു.

കുവൈത്തിൽനിന്നുയർന്ന പുക അയൽരാജ്യങ്ങളിലേക്കും വ്യാപിച്ചു. ബഹ്റൈൻ, സൗദി അറേബ്യ, ഖത്തർ, ഇറാൻ, ഒമാൻ തുടങ്ങിയ രാജ്യങ്ങളിലും പുകയുടെ സാന്നിധ്യം അനുഭവപ്പെട്ടു. എണ്ണയുടെ അവശിഷ്ടങ്ങൾ കലർന്ന കറുത്ത മഴയും ചില പ്രദേശങ്ങളിൽ റിപ്പോർട്ട് ചെയ്യപ്പെട്ടു. അന്തരീക്ഷ മലിനീകരണം ഗുരുതരമായ ആരോഗ്യ, പാരിസ്ഥിതിക ആശങ്കകൾക്ക് വഴിവെച്ചു.

പ്രതിദിനം 120 ദശലക്ഷം ഡോളറിന്റെ നഷ്ടം

എണ്ണക്കിണറുകളിലെ തീപിടിത്തം കുവൈത്തിന്റെ സമ്പദ്‌വ്യവസ്ഥയെയും സാരമായി ബാധിച്ചു. പ്രതിദിനം നാല് മുതൽ ആറു ദശലക്ഷം ബാരൽ വരെ അസംസ്കൃത എണ്ണയുടെ ഉൽപ്പാദന നഷ്ടമുണ്ടായതായാണ് കണക്കുകൾ. ഏകദേശം 23 ദശലക്ഷം ബാരൽ എണ്ണ പാഴായതായും റിപ്പോർട്ടുകളുണ്ട്.

അന്നത്തെ കണക്കനുസരിച്ച് പ്രതിദിന സാമ്പത്തിക നഷ്ടം ഏകദേശം 120 ദശലക്ഷം അമേരിക്കൻ ഡോളറായിരുന്നു. എണ്ണ ഉൽപ്പാദനവും കയറ്റുമതിയും തടസ്സപ്പെട്ടതിനു പുറമെ പരിസ്ഥിതിക്കും ആരോഗ്യ മേഖലയ്ക്കും വലിയ ആഘാതമുണ്ടായി.

27 രാജ്യാന്തര സംഘങ്ങൾ; 10,000ത്തിലധികം പേർ

എണ്ണക്കിണറുകളിലെ തീ അണയ്ക്കാൻ കുവൈത്ത് വിപുലമായ അന്താരാഷ്ട്ര സഹായം തേടി. 27 വിദേശ സംഘങ്ങളിൽനിന്നായി 10,000ത്തിലധികം വിദഗ്ധരും ഉദ്യോഗസ്ഥരും അഗ്നിശമന പ്രവർത്തനങ്ങളിൽ പങ്കെടുത്തു. ഇതിനായി 5,800ലധികം പ്രത്യേക വാഹനങ്ങളും ഉപകരണങ്ങളും വിന്യസിച്ചു.

കുവൈത്ത് ഓയിൽ കമ്പനിയുടെ നേതൃത്വത്തിൽ പ്രത്യേക ദൗത്യസംഘങ്ങളും രൂപീകരിച്ചു. തീ അണയ്ക്കുന്നതിനൊപ്പം എണ്ണ ഉൽപ്പാദനം എത്രയും വേഗം പുനരാരംഭിക്കാനുള്ള പ്രവർത്തനങ്ങളും സമാന്തരമായി നടന്നു. പരിമിതമായ അനുഭവസമ്പത്തുണ്ടായിരുന്ന കുവൈത്ത് അഗ്നിശമന സംഘവും നിർണായക പങ്കുവഹിച്ചു. 41 എണ്ണക്കിണറുകളിലെ തീ അണയ്ക്കാൻ കുവൈത്ത് സംഘത്തിന് സാധിച്ചു.

1991 നവംബർ ആറിന് അവസാന തീയും അണഞ്ഞു

മാസങ്ങൾ നീണ്ട കഠിന പരിശ്രമത്തിനൊടുവിൽ 1991 നവംബർ ആറിന് അഹ്മദിയിലെ ബുർഗാൻ എണ്ണപ്പാടത്തെ അവസാന കിണറിലെ തീയും അണച്ചു. അന്തരിച്ച അമീർ ശൈഖ് ജാബർ അൽ അഹ്മദ് അൽ ജാബർ അൽ സബാഹിന്റെ സാന്നിധ്യത്തിലായിരുന്നു അവസാന കിണറിലെ തീ അണച്ചതിന്റെ ചടങ്ങ്.

ഇതോടെ കുവൈത്തിന്റെ ചരിത്രത്തിലെ വലിയൊരു പാരിസ്ഥിതിക ദുരന്തത്തിന് അവസാനമായി. എണ്ണമേഖലയുടെ പുനർനിർമാണത്തിനും ഉൽപ്പാദനശേഷി വീണ്ടെടുക്കുന്നതിനുമുള്ള പുതിയ ഘട്ടത്തിനും തുടക്കമായി.

നാശത്തിൽനിന്ന് വീണ്ടെടുപ്പിലേക്ക്

എണ്ണക്കിണറുകളിലെ തീ അണച്ചതോടെ കുവൈത്തിന്റെ പുനർനിർമാണ പ്രവർത്തനങ്ങൾ വേഗത്തിലായി. എണ്ണമേഖലയിലെ നാശനഷ്ടങ്ങൾ വിലയിരുത്താനും തകർന്ന അടിസ്ഥാനസൗകര്യങ്ങൾ പുനഃസ്ഥാപിക്കാനും പ്രത്യേക സമിതികൾ രൂപീകരിച്ചു. എണ്ണ ഉൽപ്പാദനം പുനരാരംഭിക്കുന്നതിനും കയറ്റുമതി ശേഷി വീണ്ടെടുക്കുന്നതിനും മുൻഗണന നൽകി.

ദുരന്തത്തിന്റെ ദീർഘകാല പാരിസ്ഥിതിക പ്രത്യാഘാതങ്ങൾ പഠിക്കാൻ വിവിധ രാജ്യങ്ങളിൽനിന്നുള്ള ശാസ്ത്രജ്ഞരും പരിസ്ഥിതി വിദഗ്ധരും കുവൈത്തിലെത്തി. അന്താരാഷ്ട്ര തലത്തിൽ ചർച്ചകളും പഠനങ്ങളും നടന്നു.

അവസാന എണ്ണക്കിണറിലെ തീ അണച്ചതിന്റെ 35-ാം വാർഷികം കുവൈത്തിന് ദുരന്തത്തെ അതിജീവിച്ച് പുനർനിർമാണത്തിലൂടെ മുന്നേറിയ ചരിത്രത്തിന്റെ ഓർമപ്പെടുത്തൽ കൂടിയാണ്. രാജ്യത്തിന്റെ സമ്പദ്‌വ്യവസ്ഥയുടെ ജീവനാഡിയായ എണ്ണമേഖലയെ വീണ്ടെടുക്കാൻ കുവൈത്തും അന്താരാഷ്ട്ര സമൂഹവും നടത്തിയ കൂട്ടായ പരിശ്രമത്തിന്റെ അടയാളമായി ഈ ദിനം ഇന്നും ഓർമിക്കപ്പെടുന്നു.

കൂടുതൽ കുവൈറ്റ് വാർത്തകൾക്ക് ചാനൽ ഇപ്പോൾ തന്നെ ഫോളോ ചെയ്യൂ