Qatar to Develop National Curriculum for Children ദോഹ: ജനനം മുതൽ മൂന്ന് വയസ്സുവരെ പ്രായമുള്ള കുട്ടികൾക്കായി സമഗ്രമായ വിദ്യാഭ്യാസ–വികസന പാഠ്യപദ്ധതി തയ്യാറാക്കുന്നതിനുള്ള ദേശീയ പദ്ധതി ഖത്തർ വിദ്യാഭ്യാസ–ഉന്നത വിദ്യാഭ്യാസ മന്ത്രാലയം ആരംഭിച്ചു. രാജ്യത്തെ നഴ്സറികളിലെ പരിചരണത്തിന്റെയും പഠനത്തിന്റെയും നിലവാരം മെച്ചപ്പെടുത്തുകയും ആദ്യകാല ശിശുവികസനത്തിന് ഏകീകൃത മാർഗരേഖ രൂപപ്പെടുത്തുകയും ചെയ്യുകയാണ് പദ്ധതിയുടെ ലക്ഷ്യം. കുട്ടികളുടെ വളർച്ചയുടെ വിവിധ ഘട്ടങ്ങൾ പരിഗണിച്ചുള്ള പഠനരീതികളും അധ്യാപകർക്കുള്ള പ്രത്യേക പരിശീലന പരിപാടികളും പദ്ധതിയുടെ ഭാഗമായി നടപ്പാക്കും.
പദ്ധതിക്ക് ‘ശുറൂഖ് അൽ ഷംസ്’ (Sunrise) എന്ന തന്ത്രപ്രധാന പരിപാടിയുടെ ഭാഗമായാണ് തുടക്കം കുറിച്ചത്. ‘ഒരു കഥ… പരിചരണത്തിലൂടെ തുടങ്ങുന്ന കഥ’ എന്നതാണ് പദ്ധതിയുടെ മുദ്രാവാക്യം. പ്രീ-കിൻഡർഗാർട്ടൻ ഘട്ടത്തിനായുള്ള പാഠ്യപദ്ധതി തയ്യാറാക്കുന്നതിനൊപ്പം അധ്യാപകർക്കായി പരിശീലന കോഴ്സുകളും നടപ്പാക്കും.
കുട്ടികളുടെ പ്രായത്തിനും വളർച്ചയുടെ പ്രത്യേകതകൾക്കും വ്യക്തിഗത ആവശ്യങ്ങൾക്കും അനുസൃതമായ വികസന മാനദണ്ഡങ്ങളും പഠനഫലങ്ങളും അടിസ്ഥാനമാക്കിയാണ് ദേശീയ പാഠ്യപദ്ധതി രൂപപ്പെടുത്തുന്നത്. ശാരീരിക ആരോഗ്യം, മാനസിക വളർച്ച, പെരുമാറ്റം, മൂല്യബോധം തുടങ്ങിയ മേഖലകൾക്ക് ഇതിൽ പ്രാധാന്യം നൽകും. ആദ്യകാല ശിശുവിദ്യാഭ്യാസ രംഗത്ത് പ്രവർത്തിക്കുന്ന അധ്യാപകരുടെ കഴിവും പരിശീലനവും മെച്ചപ്പെടുത്തുന്നതിനുള്ള പ്രത്യേക പരിപാടികളും പദ്ധതിയിൽ ഉൾപ്പെടുത്തിയിട്ടുണ്ട്.
സ്വകാര്യ വിദ്യാഭ്യാസ കാര്യ വിഭാഗത്തിന് കീഴിലുള്ള നഴ്സറി വകുപ്പ് പങ്കാളിയായാണ് പദ്ധതി നടപ്പാക്കുന്നത്. രാജ്യത്തെ നഴ്സറികൾക്ക് പാഠ്യപദ്ധതി ലഭ്യമാക്കുകയും അതിന്റെ നടപ്പാക്കൽ മേൽനോട്ടം വഹിക്കുകയും ചെയ്യുന്നത് ഈ വിഭാഗമായിരിക്കും. ഇതിലൂടെ എല്ലാ നഴ്സറികളിലും ഏകീകൃത വിദ്യാഭ്യാസ–വികസന മാർഗരേഖ ഉറപ്പാക്കാനും കുട്ടികൾക്ക് ലഭിക്കുന്ന പരിചരണത്തിന്റെയും പഠനത്തിന്റെയും നിലവാരം ഉയർത്താനും സാധിക്കുമെന്നാണ് മന്ത്രാലയത്തിന്റെ പ്രതീക്ഷ.
ഖത്തറിന്റെ ആദ്യകാല വിദ്യാഭ്യാസ സംവിധാനം വികസിപ്പിക്കുന്നതിൽ നിർണായക ചുവടുവെപ്പാണ് പദ്ധതിയെന്ന് ആദ്യകാല വിദ്യാഭ്യാസ വകുപ്പ് ഡയറക്ടറും ‘ശുറൂഖ്’ പരിപാടിയുടെ ദേശീയ മേധാവിയുമായ ദബ്യ മുഹമ്മദ് അൽ ഖുലൈഫി പറഞ്ഞു. അന്താരാഷ്ട്രതലത്തിലെ മികച്ച രീതികൾക്കൊപ്പം ഇസ്‌ലാമിക മൂല്യങ്ങളും ഖത്തറിന്റെ ദേശീയ സ്വത്വവും ഉൾക്കൊള്ളുന്ന വിദ്യാഭ്യാസ അടിത്തറയാണ് ലക്ഷ്യമിടുന്നതെന്നും കുട്ടികൾക്ക് സുരക്ഷിതവും ഉത്തേജകവുമായ പഠന–പരിചരണ അന്തരീക്ഷം ഒരുക്കുമെന്നും അവർ വ്യക്തമാക്കി.
മൂന്നു വർഷത്തെ തയ്യാറെടുപ്പിന്റെയും വിദഗ്ധരുമായും പങ്കാളികളുമായും നടത്തിയ സംയുക്ത പ്രവർത്തനത്തിന്റെയും ഫലമായാണ് പദ്ധതി ആരംഭിച്ചതെന്ന് പ്രോജക്ട് ഡയറക്ടർ ലുൽവ ഒമൈർ അൽ നുഐമി അറിയിച്ചു. ഖത്തർ സർവകലാശാലയിലെ കോളജ് ഓഫ് എജ്യുക്കേഷൻ, ആദ്യകാല ശിശുവികസന കേന്ദ്രം എന്നിവയുൾപ്പെടെയുള്ള സ്ഥാപനങ്ങൾ തയ്യാറെടുപ്പിൽ പങ്കാളികളായി. വിവിധ രാജ്യങ്ങളിലെ പാഠ്യപദ്ധതികൾ താരതമ്യം ചെയ്ത് പഠിക്കുകയും മികച്ച അന്താരാഷ്ട്ര മാതൃകകൾ വിലയിരുത്തുകയും ചെയ്ത ശേഷമാണ് ഖത്തറിന്റെ സംസ്കാരവും ദേശീയ സ്വത്വവും ആഗോള മാനദണ്ഡങ്ങളും സംയോജിപ്പിച്ചുള്ള പാഠ്യപദ്ധതി തയ്യാറാക്കിയത്.
നഴ്സറികളിലും ശിശുപരിചരണ കേന്ദ്രങ്ങളിലും വിദ്യാഭ്യാസ–വികസന രീതികൾ ഫലപ്രദമായി നടപ്പാക്കുന്നതിനായി റഫറൻസ് രേഖകളും പ്രത്യേക പരിശീലന പരിപാടികളും തയ്യാറാക്കുന്നുണ്ട്. പദ്ധതിയുമായി ബന്ധപ്പെട്ട രേഖകളുടെ 500 പകർപ്പുകൾ ഉദ്ഘാടനച്ചടങ്ങിൽ പങ്കെടുത്തവർക്ക് വിതരണം ചെയ്തു.
പ്രോജക്ട് അസിസ്റ്റന്റ് ഡയറക്ടർ അബ്ദുസ്സലാം ഇബ്രാഹിം പറയുന്നതനുസരിച്ച്, വിവിധ പ്രായവിഭാഗങ്ങൾ, വളർച്ചാ മേഖലകൾ, പ്രതീക്ഷിക്കുന്ന വികസനഫലങ്ങൾ എന്നിവ വ്യക്തമാക്കുന്ന ദേശീയ ചട്ടക്കൂടും റഫറൻസ് രേഖകളും അടിസ്ഥാനമാക്കിയാണ് പാഠ്യപദ്ധതി തയ്യാറാക്കിയത്. കുട്ടികളുടെ വിദ്യാഭ്യാസപരവും വളർച്ചാപരവുമായ ആവശ്യങ്ങൾ സമഗ്രമായി പരിഗണിക്കുന്നതിനാണ് ഈ സമീപനം.
കുട്ടിയുടെ ജീവിതത്തിലെ ആദ്യത്തെ മൂന്ന് വർഷങ്ങൾ വളർച്ചയുടെയും വ്യക്തിത്വ രൂപീകരണത്തിന്റെയും നിർണായക ഘട്ടമാണെന്ന് വിദ്യാഭ്യാസ കാര്യങ്ങളുടെ അസിസ്റ്റന്റ് അണ്ടർസെക്രട്ടറി ഇബ്രാഹിം അബ്ദുല്ല അൽ മുഹന്നദി പറഞ്ഞു. തുടർന്നുള്ള വിദ്യാഭ്യാസ ഘട്ടങ്ങളിലേക്ക് കുട്ടികളെ സജ്ജരാക്കുന്നതിലും ഈ കാലയളവിന് പ്രധാന പങ്കുണ്ടെന്നും അദ്ദേഹം ചൂണ്ടിക്കാട്ടി.
ആദ്യകാല പരിചരണത്തിന്റെയും പഠനത്തിന്റെയും ഗുണനിലവാരം മെച്ചപ്പെടുത്തുക, ദേശീയ സ്വത്വം ശക്തിപ്പെടുത്തുക, കുട്ടികളുടെ ആദ്യവർഷങ്ങളെ മനുഷ്യവിഭവ വികസനത്തിന്റെ അടിത്തറയായി കാണുക എന്നിവയാണ് പദ്ധതിയുടെ വിശാലമായ ലക്ഷ്യങ്ങൾ. രാജ്യത്തെ നഴ്സറികളിൽ ഏകീകൃത നിലവാരത്തിലുള്ള വിദ്യാഭ്യാസ–പരിചരണ സംവിധാനം രൂപപ്പെടുത്തുന്നതിനുള്ള ശ്രമങ്ങളുടെ ഭാഗമായാണ് ഖത്തർ ഈ ദേശീയ പദ്ധതി നടപ്പാക്കുന്നത്.
