
Armed Men Spotted in a Skiff Near Yemen’s Socotra ഏദൻ: യെമനിലെ സൊകോത്ര ദ്വീപിന് കിഴക്കായി സഞ്ചരിച്ചിരുന്ന ടാങ്കറിന് സമീപം ആയുധധാരികളായ നാലുപേരടങ്ങിയ ചെറുബോട്ട് എത്തിയതായി റിപ്പോർട്ട്. സംഭവത്തെ തുടർന്ന് മേഖലയിലൂടെ സഞ്ചരിക്കുന്ന കപ്പലുകൾക്ക് യുകെ മാരിടൈം ട്രേഡ് ഓപ്പറേഷൻസ് (UKMTO) ജാഗ്രതാ നിർദേശം നൽകി.
നവംബർ 16 തിങ്കളാഴ്ച പുലർച്ചെ 3.30 ഓടെയാണ് ടാങ്കറിന്റെ ക്യാപ്റ്റൻ സംഭവം റിപ്പോർട്ട് ചെയ്തത്. സൊകോത്ര ദ്വീപിൽനിന്ന് ഏകദേശം 430 നോട്ടിക്കൽ മൈൽ കിഴക്കായാണ് സംഭവം നടന്നത്. ഒരു വലിയ മാതൃകപ്പലും (മദർഷിപ്പ്) അതിൽനിന്ന് എത്തിയതെന്ന് കരുതുന്ന ചെറുബോട്ടും (സ്കിഫ്) ടാങ്കറിനെ സമീപിച്ചതായാണ് റിപ്പോർട്ട്.
ചെറുബോട്ടിൽ ആയുധങ്ങളുമായി നാലുപേരെ കണ്ടതായും അതിൽ ഒരു ഏണിയും ഉണ്ടായിരുന്നതായും ക്യാപ്റ്റൻ അറിയിച്ചതായി UKMTO വ്യക്തമാക്കി. സംഭവത്തെ സംശയാസ്പദമായ പ്രവർത്തനമായാണ് ഏജൻസി വർഗീകരിച്ചിരിക്കുന്നത്. ബന്ധപ്പെട്ട അധികൃതർ അന്വേഷണം നടത്തിവരികയാണ്.
ടാങ്കറിൽ കയറാൻ ശ്രമം നടന്നിട്ടുണ്ടോ, കപ്പൽ പിടിച്ചെടുക്കാനുള്ള നീക്കമുണ്ടായിരുന്നോ തുടങ്ങിയ കാര്യങ്ങളിൽ വ്യക്തതയില്ല. ടാങ്കറിന്റെ പേര്, പതാക, ചരക്ക്, ലക്ഷ്യസ്ഥാനം എന്നിവയും റിപ്പോർട്ടിൽ വ്യക്തമാക്കിയിട്ടില്ല.
സംഭവമുണ്ടായ മേഖലയിലൂടെ കടന്നുപോകുന്ന കപ്പലുകൾ അതീവ ജാഗ്രത പാലിക്കണമെന്നും സംശയാസ്പദമായ നീക്കങ്ങൾ ശ്രദ്ധയിൽപ്പെട്ടാൽ UKMTOയെ അറിയിക്കണമെന്നും നിർദേശിച്ചിട്ടുണ്ട്.
അറേബ്യൻ കടലിലും ഏദൻ ഉൾക്കടലിലും വാണിജ്യ കപ്പലുകൾക്കെതിരായ കടൽക്കൊള്ളാ ഭീഷണികളും ആയുധധാരികളുടെ ആക്രമണ സാധ്യതകളും സംബന്ധിച്ച ആശങ്കകൾ നിലനിൽക്കുന്ന സാഹചര്യത്തിലാണ് പുതിയ സംഭവം.





