ദുബായിൽ ചുട്ട കോഴി വാങ്ങുന്നവർ സൂക്ഷിക്കുക, ‘പ്രവാസികളുടെ ഇഷ്ട ഗ്രേവിക്ക്’ വിലക്ക്: നിരോധനത്തിന് പിന്നിൽ സുപ്രധാന കണ്ടെത്തൽ

ദുബായ്: യുഎഇയിലെ മലയാളികളടക്കമുള്ള പ്രവാസികൾക്ക് ഏറെ പ്രിയപ്പെട്ട വിഭവമാണ് ഗ്രിൽഡ് ചിക്കൻ. ഇതോടൊപ്പം ലഭിക്കുന്ന പ്രത്യേക ഗ്രേവിയും പലരുടെയും ഇഷ്ടമാണ്. എന്നാൽ ഗ്രിൽഡ് ചിക്കനൊപ്പം ചില റസ്റ്ററന്റുകൾ നൽകുന്ന ഗ്രേവി ഭക്ഷ്യവിഷബാധയ്ക്ക് കാരണമായേക്കാമെന്ന മുന്നറിയിപ്പുമായി രംഗത്തെത്തിയിരിക്കുകയാണ് ദുബായ് മുനിസിപ്പാലിറ്റി. കോഴിയിറച്ചി ചുടുന്ന യന്ത്രത്തിന് താഴെ ശേഖരിക്കുന്ന കൊഴുപ്പും ഇറച്ചിനീരും കലർന്ന ദ്രാവകം ഗ്രേവിയായോ ചട്ണിയായോ വിളമ്പുന്ന രീതിക്കാണ് അധികൃതർ വിലക്കേർപ്പെടുത്തിയിരിക്കുന്നത്.

പച്ച കോഴിയിറച്ചിയിൽനിന്നുള്ള നീര് ഈ ദ്രാവകത്തിൽ കലരാൻ സാധ്യതയുണ്ട്. ആവശ്യമായ താപനിലയിൽ ചൂടാകാത്തതിനാൽ ദോഷകരമായ ബാക്ടീരിയകൾ നിലനിൽക്കാനും ഇത് കാരണമാകും. ഇത്തരത്തിലുള്ള ഗ്രേവി കഴിക്കുന്നത് ഭക്ഷ്യവിഷബാധയ്ക്ക് വഴിവയ്ക്കാമെന്നാണ് ഭക്ഷ്യസുരക്ഷാ വിദഗ്ധരുടെ മുന്നറിയിപ്പ്.

പച്ച കോഴിയും വേവിച്ച കോഴിയും ഒരുമിച്ച് വയ്ക്കരുത്

ഗ്രിൽ മെഷീനിൽ പച്ച കോഴിയിറച്ചി വേവിച്ച ഇറച്ചിക്ക് മുകളിലായി വയ്ക്കുന്നതും ഗുരുതരമായ ഭക്ഷ്യസുരക്ഷാ വീഴ്ചയാണെന്ന് അധികൃതർ ചൂണ്ടിക്കാട്ടി. പച്ച കോഴിയിറച്ചിയിൽനിന്ന് ഒഴുകുന്ന നീര് താഴെയുള്ള വേവിച്ച ഇറച്ചിയിൽ വീഴുന്നതിലൂടെ ബാക്ടീരിയ മലിനീകരണത്തിന് സാധ്യതയുണ്ട്. ഇത് ഭക്ഷ്യവിഷബാധയ്ക്ക് കാരണമായേക്കാം.

അതുപോലെ, ഉപഭോക്താവ് പകുതി ചിക്കൻ മാത്രം വാങ്ങിയാൽ ബാക്കി വരുന്ന ഭാഗം വീണ്ടും ഗ്രിൽ മെഷീനിൽ സൂക്ഷിക്കുന്ന രീതിയും സുരക്ഷിതമല്ല. ഇത്തരം ഇറച്ചി ശരിയായ താപനില നിയന്ത്രണമുള്ള സംവിധാനത്തിൽ സൂക്ഷിക്കണമെന്നാണ് നിർദേശം.

ഭക്ഷ്യസുരക്ഷാ പരിശീലനത്തിൽ ഗിന്നസ് റെക്കോർഡ്

നവംബർ 17ന് ദുബായ് വേൾഡ് ട്രേഡ് സെന്ററിൽ നടന്ന 20-ാമത് ദുബായ് ഇന്റർനാഷനൽ ഫുഡ് സേഫ്റ്റി കോൺഫറൻസിന്റെ ഭാഗമായാണ് പ്രത്യേക പരിശീലന പരിപാടി സംഘടിപ്പിച്ചത്. ‘ഗ്രിൽ സേഫ്’ എന്ന പേരിൽ നടത്തിയ പരിപാടിക്ക് ദുബായ് മുനിസിപ്പാലിറ്റിയിലെ പ്രിൻസിപ്പൽ ഫുഡ് സേഫ്റ്റി സ്പെഷ്യലിസ്റ്റ് ബോബി കൃഷ്ണ നേതൃത്വം നൽകി.

റസ്റ്ററന്റുകൾ, കഫെറ്റീരിയകൾ, സൂപ്പർമാർക്കറ്റുകൾ എന്നിവിടങ്ങളിൽ ഗ്രിൽഡ് ചിക്കൻ തയ്യാറാക്കുകയും വിൽക്കുകയും ചെയ്യുന്ന ജീവനക്കാർക്കും മാനേജർമാർക്കുമാണ് പരിശീലനം നൽകിയത്. ഒരേസമയം ഏറ്റവും കൂടുതൽ പേർ പങ്കെടുത്ത ഭക്ഷ്യസുരക്ഷാ ക്ലാസ്, ഏറ്റവും കൂടുതൽ രാജ്യങ്ങളിൽനിന്നുള്ളവർ പങ്കെടുത്ത ഭക്ഷ്യസുരക്ഷാ ക്ലാസ് എന്നീ രണ്ട് വിഭാഗങ്ങളിൽ ഗിന്നസ് ലോക റെക്കോർഡും ദുബായ് മുനിസിപ്പാലിറ്റി സ്വന്തമാക്കി.

ഭക്ഷണം പാകം ചെയ്യുന്നതിൽ മാത്രം ഭക്ഷ്യസുരക്ഷ അവസാനിക്കുന്നില്ലെന്നും അത് കൈകാര്യം ചെയ്യുന്നതിലും സൂക്ഷിക്കുന്നതിലും ശുചിത്വം പാലിക്കുന്നതിലും ഒരുപോലെ ശ്രദ്ധ വേണമെന്നും വിദഗ്ധർ ഓർമിപ്പിച്ചു.

പരാതി അറിയിക്കാൻ ടോൾ ഫ്രീ നമ്പർ

റസ്റ്ററന്റുകളിൽ ഇത്തരം ഭക്ഷ്യസുരക്ഷാ വീഴ്ചകൾ ശ്രദ്ധയിൽപ്പെട്ടാൽ അധികൃതരെ അറിയിക്കണമെന്ന് ദുബായ് മുനിസിപ്പാലിറ്റി ഉപഭോക്താക്കളോട് നിർദേശിച്ചിട്ടുണ്ട്. ഇതിനായി 800 900 എന്ന ടോൾ ഫ്രീ നമ്പറിൽ പരാതി നൽകാം.

അതേസമയം, ഗ്രിൽഡ് ചിക്കൻ കഴിക്കുന്നത് ഒഴിവാക്കണമെന്നല്ല അധികൃതരുടെ നിർദേശം. സുരക്ഷിതമായ രീതിയിൽ തയ്യാറാക്കിയ ചിക്കൻ തന്നെ ഉപഭോക്താക്കൾക്ക് ലഭിക്കുന്നുവെന്ന് ഉറപ്പാക്കുകയാണ് ലക്ഷ്യം. അടുക്കളയിലെ ശുചിത്വവും ശരിയായ പാചകരീതിയും ഭക്ഷണത്തിന്റെ സുരക്ഷിതമായ സംഭരണവുമാണ് ഇതിൽ പ്രധാനം.


യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ

Related Posts

Leave a Reply

Your email address will not be published. Required fields are marked *

© 2026 Pravasi News Daily - WordPress Theme by WPEnjoy