Dubai Run 2026;ദുബൈയിലേക്ക് പോകുന്നവർ ശ്രദ്ധിക്കുക! നാളെ പ്രധാന റോഡുകൾ അടയ്ക്കും; ഗതാഗത നിയന്ത്രണവുമായി ആർടിഎ

Dubai Run 2026;ദുബൈ: ദുബൈ ഫിറ്റ്‌നസ് ചലഞ്ചിന്റെ ഭാഗമായി സംഘടിപ്പിക്കുന്ന ‘ദുബൈ റൺ 2026’ ഞായറാഴ്ച (നവംബർ 22) നടക്കുന്നതിനാൽ നഗരത്തിലെ പ്രധാന റോഡുകളിൽ ഗതാഗത നിയന്ത്രണം ഏർപ്പെടുത്തും. പുലർച്ചെ 3 മണി മുതൽ രാവിലെ 10 മണി വരെയാണ് റോഡുകൾ അടച്ചിടുകയെന്ന് ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ) അറിയിച്ചു. വാഹനയാത്രക്കാർ യാത്രകൾ മുൻകൂട്ടി ആസൂത്രണം ചെയ്യണമെന്നും ബദൽ പാതകൾ ഉപയോഗിക്കണമെന്നും അധികൃതർ നിർദേശിച്ചു.

അടച്ചിടുന്ന റോഡുകൾ ഏതൊക്കെ?

ദുബൈ റണ്ണിനോടനുബന്ധിച്ച് താഴെ പറയുന്ന പ്രധാന റോഡുകളിലാണ് ഗതാഗത നിയന്ത്രണം ഏർപ്പെടുത്തുന്നത്.

  • ട്രേഡ് സെന്റർ ജങ്ഷൻ മുതൽ അൽ സഫ പാലം വരെയുള്ള ശൈഖ് സായിദ് റോഡ്.
  • അഡ്രസ് ഹോട്ടൽ മുതൽ ഫാഷൻ പാർക്കിങ് വരെയുള്ള ശൈഖ് മുഹമ്മദ് ബിൻ റാഷിദ് ബൊളിവാർഡ്.
  • ശൈഖ് സായിദ് റോഡിനും അൽ ഖൈൽ റോഡിനും ഇടയിലുള്ള ലോവർ ഫിനാൻഷ്യൽ സെന്റർ സ്ട്രീറ്റ്.
  • ശൈഖ് സായിദ് റോഡ് മുതൽ അൽ ബൗർസ സ്ട്രീറ്റ് വരെയുള്ള അൽ സുകൂക്ക് സ്ട്രീറ്റ്.

വാഹനയാത്രക്കാർക്ക് ബദൽ പാതകൾ

ഗതാഗത തടസ്സങ്ങൾ ഒഴിവാക്കാൻ അപ്പർ ഫിനാൻഷ്യൽ സെന്റർ സ്ട്രീറ്റ്, സബീൽ പാലസ് റോഡ്, അൽ വാസൽ റോഡ്, അൽ ഖൈൽ റോഡ് എന്നീ ബദൽ പാതകൾ ഉപയോഗിക്കണമെന്ന് ആർടിഎ നിർദേശിച്ചു.

മെട്രോ സർവീസുകൾ നേരത്തേ ആരംഭിക്കും

ദുബൈ റണ്ണിൽ പങ്കെടുക്കുന്നവരുടെ യാത്രാസൗകര്യം കണക്കിലെടുത്ത് ഞായറാഴ്ച ദുബൈ മെട്രോയുടെ പ്രവർത്തന സമയം ദീർഘിപ്പിക്കും. പരിപാടി കഴിഞ്ഞ് മടങ്ങുന്നവർക്കായി ഷട്ടിൽ ബസ് സർവീസുകളും ഒരുക്കിയിട്ടുണ്ട്.

5 കിലോമീറ്റർ ഓട്ടത്തിൽ പങ്കെടുക്കുന്നവർ വേൾഡ് ട്രേഡ് സെന്റർ മെട്രോ സ്റ്റേഷനിലും 10 കിലോമീറ്റർ ഓട്ടത്തിൽ പങ്കെടുക്കുന്നവർ എമിറേറ്റ്സ് ടവേഴ്‌സ് മെട്രോ സ്റ്റേഷനിലുമാണ് ഇറങ്ങേണ്ടത്.

ദുബൈ മാൾ, ദുബൈ മാൾ സബീൽ, ദുബൈ വേൾഡ് ട്രേഡ് സെന്റർ എന്നിവിടങ്ങളിലായി ഏകദേശം 15,000 പാർക്കിങ് സൗകര്യങ്ങളും ഒരുക്കിയിട്ടുണ്ട്. മെട്രോ യാത്രയ്ക്കായി നോൾ കാർഡിൽ ആവശ്യമായ ബാലൻസ് ഉറപ്പാക്കണമെന്നും നിർദേശമുണ്ട്.

രാവിലെ 6.30ന് ദുബൈ റൺ ആരംഭിക്കും

ഞായറാഴ്ച രാവിലെ 6.30നാണ് ദുബൈ റൺ ആരംഭിക്കുന്നത്. മ്യൂസിയം ഓഫ് ദി ഫ്യൂച്ചറിന് സമീപമുള്ള ശൈഖ് സായിദ് റോഡിൽ നിന്നാണ് രണ്ട് റൂട്ടുകളും ആരംഭിക്കുന്നത്.

കുടുംബങ്ങൾക്കും തുടക്കക്കാർക്കും അനുയോജ്യമായ അഞ്ച് കിലോമീറ്റർ റൂട്ട് ബുർജ് ഖലീഫ, ദുബൈ ഓപ്പറ എന്നിവ കടന്ന് ദുബൈ മാളിന് സമീപം അവസാനിക്കും. പത്ത് കിലോമീറ്റർ റൂട്ട് ദുബൈ കനാൽ പാലം കടന്ന് ശൈഖ് സായിദ് റോഡിലൂടെ സഞ്ചരിച്ച് ഡിഐഎഫ്‌സി ഗേറ്റ് ബിൽഡിങ്ങിന് സമീപം അവസാനിക്കും.

രാവിലെ എട്ട് മണിക്ക് സ്റ്റാർട്ട് ലൈൻ അടയ്ക്കും. പരിപാടി ഒൻപത് മണിയോടെ അവസാനിക്കും. വാഹനയാത്രക്കാർ ഗതാഗത നിയന്ത്രണങ്ങൾ ശ്രദ്ധിച്ച് യാത്രകൾ ക്രമീകരിക്കണമെന്ന് ആർടിഎ അറിയിച്ചു.

യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ

Related Posts

Leave a Reply

Your email address will not be published. Required fields are marked *