Kuwait reckless driving arrest : കുവൈത്ത് സിറ്റി: സോഷ്യൽ മീഡിയയിൽ പ്രചരിച്ച അപകടകരമായ ഡ്രൈവിങ് വീഡിയോയുടെ അടിസ്ഥാനത്തിൽ അശ്രദ്ധമായി വാഹനമോടിച്ചയാളെ ആഭ്യന്തര മന്ത്രാലയം അറസ്റ്റ് ചെയ്തു. മറ്റുള്ളവരുടെ ജീവൻ അപകടത്തിലാക്കുന്ന രീതിയിൽ വാഹനമോടിച്ച സംഭവത്തിൽ ഡ്രൈവർക്കെതിരെ നിയമനടപടി സ്വീകരിക്കുകയും വാഹനം പിടിച്ചെടുത്ത് ക്രഷറിലേക്ക് അയക്കുകയും ചെയ്തു.
അലി സബാഹ് അൽ സേലം പ്രദേശത്താണ് സംഭവം നടന്നത്. സോഷ്യൽ മീഡിയയിൽ പ്രചരിച്ച വീഡിയോ ശ്രദ്ധയിൽപ്പെട്ടതിനെ തുടർന്ന് ആഭ്യന്തര മന്ത്രാലയത്തിന് കീഴിലുള്ള ഓപ്പറേഷൻസ് ആൻഡ് പട്രോൾസ് വിഭാഗത്തിലെ വെഹിക്കിൾ ഓപ്പറേഷൻസ് യൂണിറ്റ് അന്വേഷണം ആരംഭിച്ചു.
ഫീൽഡ് നിരീക്ഷണത്തിന്റെയും പരിശോധനയുടെയും അടിസ്ഥാനത്തിൽ അഹമ്മദി ഗവർണറേറ്റിലെ സുരക്ഷാ ഡയറക്ടറേറ്റ് വാഹനം കണ്ടെത്തി പിടിച്ചെടുത്തു. തുടർന്ന് വാഹനം അലി സബാഹ് അൽ സേലം പോലീസ് സ്റ്റേഷനിലേക്ക് മാറ്റി. മറ്റുള്ളവരുടെ ജീവൻ അപകടത്തിലാക്കിയതിന് വാഹന ഉടമയ്‌ക്കെതിരെ കേസ് രജിസ്റ്റർ ചെയ്തു.
തുടർന്ന് പിടിച്ചെടുത്ത വാഹനം ക്രഷറിലേക്ക് അയച്ചു. സുരക്ഷാ നിയന്ത്രണ വിഭാഗത്തിന്റെ സഹായത്തോടെ ജനറൽ ട്രാഫിക് ഡിപ്പാർട്ട്മെന്റ് നടത്തിയ അന്വേഷണത്തിലാണ് ഡ്രൈവറെ കണ്ടെത്തി അറസ്റ്റ് ചെയ്തത്.
അറസ്റ്റിലായ വ്യക്തിക്കെതിരെ ആവശ്യമായ നിയമനടപടികൾ സ്വീകരിച്ച ശേഷം സെൻട്രൽ ജയിലിലേക്ക് മാറ്റിയതായി അധികൃതർ അറിയിച്ചു.
അശ്രദ്ധമായ ഡ്രൈവിങും റോഡിലെ അപകടകരമായ പ്രവൃത്തികളും നിരന്തരം നിരീക്ഷിച്ചുവരികയാണെന്ന് ആഭ്യന്തര മന്ത്രാലയം വ്യക്തമാക്കി. മറ്റ് റോഡ് ഉപയോക്താക്കളുടെ ജീവനും സുരക്ഷയ്ക്കും ഭീഷണിയാകുന്ന രീതിയിൽ വാഹനമോടിക്കുന്നവർക്കെതിരെ കർശന നിയമനടപടി സ്വീകരിക്കുമെന്നും മന്ത്രാലയം മുന്നറിയിപ്പ് നൽകി.
